ខ្សែប្រយុទ្ធសញ្ជាតិអង់គ្លេសរកបានគ្រាប់ទី២៦៧ សម្រាប់ក្រុម Spurs តាមរយៈការស៊ុតបញ្ចូលទី១គ្រាប់ក្នុងជ័យជម្នះរបស់ក្រុមមាន់ខ្នាយមាសលើក្រុមម្ចាស់ការពារតំណែងជើងឯក Man City។ 

ក្នុងវ័យ២៩ឆ្នាំ Kane បានបំបែកកំណត់ត្រារបស់អតីតកីឡាករអង់គ្លេស Jimmy Greaves​ ដែលធ្លាប់ស៊ុតបញ្ចូលទីឱ្យក្រុម Spurs បាន២២៦គ្រាប់ ក្នុងការបង្ហាញខ្លួន៣៧៩ប្រកួត។
 

ក្រោយបំបែកកំណត់ត្រាលោក Greaves នេះ ប្រធានក្រុមជម្រើសជាតិអង់គ្លេស ក៏ដាក់គោលដៅបំបែកកំណត់ត្រាអតីតខ្សែប្រយុទ្ធឆ្នើម Alan Shearer ក្នុងនាមអ្នករកគ្រាប់បាល់ច្រើនបំផុតនៅលីគកំពូលអង់គ្លេសចំនួន ២៦០គ្រាប់។ Kane សព្វថ្ងៃរកបាន២០០គ្រាប់នៅ Premier League ដោយតាមពីក្រោយ Wayne Rooney ដែលរកបាន២០៨គ្រាប់។
 

តាមរយៈជ័យជម្នះ ១-០ នេះ Spurs កើន៣៩ពិន្ទុ ពីការប្រកួត២២លើក ស្ថិតនៅចំណាត់ថ្នាក់ទី៥បណ្តោះអាសន្ន។ ដោយឡែកបរាជ័យរបស់ Man City បានបង្អាក់ពួកគេ តាមពិន្ទុក្រុមកំពូលតារាង Arsenal។
 

Man City ក្រុមការពារជើងឯក មាន៤៥ពិន្ទុដដែលពីការប្រកួត២១លើក ស្ថិតនៅលេខ២ តាមពិន្ទុក្រុមកាំភ្លើងធំដែលចាញ់ Everton ១-០ ចំនួន៥ពិន្ទុ។ យ៉ាងណា Arsenal នៅសល់១ប្រកួតក្នុងដៃ។
 

Manchester United ឡើងទៅលេខ៣វិញ ដោយរកបាន៤២ពិន្ទុ បន្ទាប់ពីឈ្នះ Crystal Palace ២-១ ខណៈ Newcastle United ធ្លាក់ទៅលេខ៤វិញក្រោយស្មើ West Ham ១-១ មាន៤០ពិន្ទុ៕