បើតាមលោក David Arakhamia សមាជិកសភាសភាអ៊ុយក្រែន និងប្រធានសមាជិកក្នុងសភានៃគណបក្សបម្រើប្រជាជន (Servant of the People) លោក Oleksii Reznikov រដ្ឋមន្ត្រី​ការពារជាតិអ៊ុយក្រែន នឹងត្រូវផ្ទេរតំណែងទៅជារដ្ឋមន្ត្រីផ្សេង ខណៈតំណែងជា​រដ្ឋមន្ត្រី​ការពារជាតិនឹងជំនួសដោយលោក Kyrylo Budanov ដែលជាប្រធានទីភ្នាក់ងារចារកម្មយោធា (GUR) ។
 

លើសពីនេះ លោក Arakhamia ក៏បានបន្ថែមថា ភ្នាក់ងារកងកម្លាំងរបស់អ៊ុយក្រែន ដូចជាក្រសួងការពារជាតិ មិនគួរដឹកនាំដោយអ្នកនយោបាយ​ក្នុងអំឡុងពេលសង្រ្គាមឡើយ តែគួរតែដឹកនាំដោយបុគ្គលដែលមានប្រវត្តិទាក់ទងនឹងផ្នែកការពារជាតិ ឬសន្តិសុខ។ បើតាមលោក​ Arakhamia លោក Reznikov នឹងត្រូវបានតែងតាំងជារដ្ឋមន្ត្រីក្រសួងឧស្សាហកម្មយុទ្ធសាស្ត្រ​វិញ។ យ៉ាងណាមិញលោក Arakhamia មិនបាន​បញ្ជាក់​ថា​ការ​ផ្លាស់​ប្តូរ​នេះ​នឹង​ត្រូវ​​ធ្វើ​ជា​ផ្លូវ​ការ​នៅ​ពេល​ណា​នោះ​ទេ។
 

នៅថ្ងៃដដែល លោក Reznikov បានប្រាប់ប្រព័ន្ធផ្សព្វផ្សាយអនឡាញ Fakty ICTV របស់អ៊ុយក្រែនថា ការសម្រេចចិត្តរុះរើតំណែងណាមួយគឺអាស្រ័យលើការរៀបចំរបស់ប្រធានាធិបតីអ៊ុយក្រែនលោក ​វ៉ូឡូឌីមៀ ហ្សេលេនស្គី ខណៈលោកបានបញ្ជាក់ថាលោកមិនទាន់ទទួលបានព័ត៌មានអ្វីនៅឡើយ។ 
 

«ប្រសិនបើខ្ញុំបានទទួលដំណឹងនេះភ្លាមៗពីប្រធានាធិបតីអ៊ុយក្រែន ឬនាយករដ្ឋមន្ត្រី ខ្ញុំនឹងបដិសេធវាពីព្រោះខ្ញុំមិនមានជំនាញលើផ្នែកនេះឡើយ»។ លោក Reznikov បានបញ្ជាក់បន្ថែមបែបនេះ។ 
 

យ៉ាងណាមិញ មកទល់ពេលនេះ មិនមានសេចក្តីថ្លែងការណ៍ណាមួយពីប្រធានាធិបតីអ៊ុយក្រែនលោក ​វ៉ូឡូឌីមៀ ហ្សេលេនស្គី ពីការជំនួសតំណែងលោក Reznikov នេះនៅឡើយ។ លោក Reznikov ជាអតីតមេធាវីដែលបានក្លាយជារដ្ឋមន្ត្រីការពារជាតិក្នុងខែវិច្ឆិកា ឆ្នាំ ២០២១ កន្លងទៅ នៅប៉ុន្មានខែមុនពេលដែលរុស្ស៊ីចាប់ផ្តើមការវាយប្រហារនៅថ្ងៃទី២៤ ខែកុម្ភៈ ឆ្នាំ២០២២។​ 
 

ការរុះរើតំណែងរបស់រដ្ឋមន្ត្រីការពារជាតិនេះ បានកើតឡើងស្របពេលដែលអ៊ុយក្រែនកំពុងព្រួយបារម្ភថារុស្ស៊ីអាចនឹងកំពុងរៀបចំផែនការវាយលុកថ្មីដ៏ធំនៅក្នុងខែនេះ។ អ៊ុយក្រែនវិញបច្ចុប្បន្នក៏​កំពុង​រៀបចំ​ផែនការ​វាយលុកថ្មីផងដែរ ខណៈ​កំពុង​រង់ចាំ​ការផ្គត់ផ្គង់​រថក្រោះ​ប្រយុទ្ធពី​លោកខាងលិច និងសម្ព័ន្ធមិត្តបន្ថែម៕