សម្តេច ស ខេង អរគុណចំពោះជប៉ុន ដែលជួយគាំទ្រគម្រោងអភិវឌ្ឍន៍នានា និងតែងយកចិត្តទុកដាក់ជួយឧបត្ថម្ភដល់ដំណើរការអភិវឌ្ឍនៅកម្ពុជា ជាពិសេសទៅលើវិស័យសេដ្ឋកិច្ច។ សម្តេច រម្លឹកថា ការជួយគាំទ្ររបស់ជប៉ុនលើដំណើរការរៀបចំការបោះឆ្នោតឃុំ-សង្កាត់លើកដំបូងនៅកម្ពុជា កាលពីឆ្នាំ២០០២ ជាការចាប់ផ្ដើមដំណើរការកំណែទម្រង់វិមជ្ឈការ និងវិសហមជ្ឈការ ដោយផ្ទេរអំណាចទៅដល់រដ្ឋបាលថ្នាក់ក្រោមជាតិ។ 

 

សម្ដេច ជឿជាក់ថា ជប៉ុន នឹងនៅតែបន្តគាំទ្រដល់កិច្ចការទាំងនេះ ជាពិសេសទៅលើការងារកំណែទម្រង់វិមជ្ឈការ និងវិសហមជ្ឈការ។ សម្តេច ក៏សង្ឃឹមដែរថា ជប៉ុន នឹងនៅតែបន្តគាំទ្រលើការបណ្តុះបណ្តាលធនធានមនុស្ស សម្រាប់វិស័យរដ្ឋបាលថ្នាក់ក្រោមជាតិ។ 

 

រដ្ឋមន្រ្តីមហាផ្ទៃ សង្កត់ធ្ងន់ដូច្នេះថា៖«សមិទ្ធផលជាតិ ក៏ដូចជាជោគជ័យសំខាន់ៗលើការអភិវឌ្ឍសង្គម ដែលកម្ពុជាសម្រេចបានរហូតមកដល់ពេលនេះ ពិតជាមិនអាចកាត់ផ្តាច់ពីការចូលរួមចំណែកដ៏មានសារសំខាន់ពីសំណាក់រដ្ឋាភិបាល និងប្រជាជនជប៉ុននោះឡើយ»៕