ក្នុងសេចក្ដីថ្លែងការណ៍មួយ ក្រសួងការពារជាតិកូរ៉េខាងត្បូងបញ្ជាក់ថា បាឡុងរបស់ក្រុងព្យុងយ៉ាង​បាន​ហោះចូ​ល​ដែលអាកាសខ្លួនក្នុងរយៈពេលខ្លីមួយប៉ុណ្ណោះ។ ប៉ុន្តែសេចក្ដីថ្លែងការណ៍នេះ មិនបាន​បញ្ជាក់​ការឆ្លើយតបរបស់​កូរ៉េខាងត្បូងយ៉ាងណាឡើយ។
 

បាឡុងនោះបានចាកចេញពីដែនអាកាសកូរ៉េខាងត្បូងប៉ុន្មានម៉ោងក្រោយមក ហើយមន្ត្រីកូរ៉េខាងត្បូង​ជឿជាក់ថា ជាបាឡុងព្យាករណ៍អាកាសធាតុ និងមិនមានបំណងស៊ើបការណ៍ដើម្បី ប្រមូល​ព័ត៌មាន​នោះឡើយ។ នេះបើយោងតាមទីភ្នាក់ងារព័ត៌មាន Yonhap។
 

ជាការកត់សម្គាល់ របាយការណ៍ខាងលើនេះកើតឡើយក្រោយរឿងរ៉ាវដូចគ្នានេះកើតឡើងនៅអាម៉េរិក ដែលរកឃើញបាឡុងចិនដែរនោះ។ អាម៉េរិកចាត់ទុកបាឡុងជាឧបករណ៍ស៊ើបការណ៍ ហើយក៏បាញ់ទម្លាក់ ដែលធ្វើឱ្យចិនខឹងសម្បារយ៉ាងខ្លាំង។ 

 

គួរបញ្ជាក់ថា ភាព​តានតឹង​បាន​កើនឡើង​រវាង​កូរ៉េ​ទាំងពីរ ដោយ​កូរ៉េខាងជើង​បាន​ធ្វើតេស្ត​មី​ស៊ី​លជាច្រើន​ក្នុងកំណត់ត្រា​មួយ​កាលពី​ឆ្នាំមុន ហើយ​កូរ៉េខាងត្បូង ក៏ធ្វើសមយុទ្ធទ្រង់ទ្រាយធំ​ជាមួយ​​អាម៉េរិក​ក្នុង​ការបង្ហាញ​កម្លាំង​យោធា​។ លើសពីនេះ ដ្រូនរបស់កូរ៉េខាងជើងចំនួន៥គ្រឿង បាន​ឆ្លងចូលទៅដែន​អាកាសកូរ៉េខាងត្បូង កាលពីថ្ងៃទី២៦ ខែធ្នូ ដែលមួយក្នុងចំណោមនោះ បានចូលទៅក្នុងតំបន់ហាមឃាត់​ការ​ហោះហើរ ដែលនៅជុំវិញការិយាល័យប្រធានាធិបតីកូរ៉េខាងត្បូង៕