សមាគមអ្នកផលិត និងនាំចេញផលិតផលត្រចៀកកាំកម្ពុជា នៅថ្ងៃទី ៦ ខែមករា បានបញ្ជាក់ថា ពិធីដាក់ឱ្យដេញថ្លៃសម្បុកត្រចៀកកាំ ធ្វើឡើងក្នុងគោលបំណងជួយម្ចាស់ផ្ទះអភិរក្សសត្វត្រចៀកកាំ ក្នុងការលក់សម្បុកត្រចៀកកាំ និងស្វែងរកដៃគូ ឬអ្នកប្រមូលទិញ ។ ជាពិសេសជួយសម្រួលដល់ម្ចាស់អាជីវកម្មកែច្នៃ សំបុកត្រចៀកកាំ  ដើម្បីទទួលបានការផ្គត់ផ្គង់ ប្រកបដោយ គុណភាព បរិមាណសមស្រប និងមានភាពទៀងទាត់ ។

  

 

លោកស្រី ប្រាប់ Thmey Thmey 25 ដូច្នេះថា៖«សមាគម រៀបចំកម្មវិធីដេញថ្លៃនេះ គឺដើម្បីផ្សាភ្ជាប់រវាងអ្នកអភិរក្សសត្វត្រចៀកកាំ និងអ្នកផលិត ដើម្បីធ្វើឱ្យវិស័យសម្បុកត្រចៀកកាំយើងកាន់តែរីកចម្រើន។ ពិសេស យើងជួយឱ្យពួកគាត់ងាយរកទីផ្សារ និងងាយធ្វើឱ្យផលិតផលខ្មែរយើងកាន់តែមានស្តង់ដារ និងអាចនាំចេញទៅប្រទេសខាងក្រៅបាន»។ 
 

យោងលើរបាយការណ៍របស់អគ្គនាយកដ្ឋានកិសកម្ម ក្នុងឆ្នាំ២០២០ កម្ពុជាមាន​ផ្ទះត្រចៀកកាំចំនួន ​៨៧២​ផ្ទះ ដែលអាចផ្តល់ផលចន្លោះពី១តោន ទៅ១តោនកន្លះក្នុងមួយខែ។​ ​សម្បុកត្រចៀកកាំ​ទើបប្រមូល មានតម្លៃចាប់ពី៧០០ ទៅ៩០០ដុល្លារ​ក្នុងមួយគីឡូក្រាម និងសម្បុក​​​​​​​​​ត្រចៀកកាំដែល​អាច​បរិភោគបាន មានតម្លៃ​ចាប់ពី ១ ៥០០ ទៅ២ ០០០ដុល្លារក្នុងមួយគីឡូក្រាម។ 
 

គួបញ្ជាក់ថា កាលពីខែតុលា ឆ្នាំ ២០២២ កម្ពុជា បានចុះអនុស្សរណៈនៃការយោគយល់ ជាមួយមជ្ឈមណ្ឌលពាណិជ្ជកម្មកម្ពុជា មានមូលដ្ឋាននៅទីក្រុងសៀមិន ប្រទេសចិន ក្នុងការជំរុញការនាំចេញសម្បុកត្រចៀកកាំកម្ពុជា។ MOU នេះ មានគោលដៅ ស្វែងរកដៃគូផលិត និងផ្គត់ផ្គង់ផលិតផលសម្បុកត្រចៀកកាំ, កិច្ចគាំពារឱ្យមានការបង្កើតរោងចក្រកែច្នៃផលិតផលទឹកមាត់ត្រចៀកកាំ។ 
 

ជាងនេះទៅទៀត MOU នេះ ក៏ជំរុញឱ្យមានការបើកច្រកពាណិជ្ជកម្ម លើផលិតផលទឹកមាត់ត្រចៀកកាំរវាងកម្ពុជា-ចិន និងការពង្រឹងបណ្តាញធុរកិច្ច តាមរយៈការរៀបចំព្រឹត្តិការណ៍ពាណិជ្ជកម្មផ្សេងៗ ដូចជា វេទិការធុរកិច្ច ជំនួបពាណិជ្ជកម្ម និងពិព័រណ៍ពាណិជ្ជកម្មជាដើម៕