រដ្ឋមន្ត្រីការពារជាតិអាល្លឺម៉ង់ Boris Pistorius បានធ្វើដំណើរទស្សនកិច្ចដ៏គួរឱ្យភ្ញាក់ផ្អើលមួយទៅកាន់ទីក្រុងកៀវនៅថ្ងៃទី៧ ខែកុម្ភៈ។ នេះ​ជាដំណើរទស្សនកិច្ចក្រៅប្រទេសជាលើកដំបូងរបស់លោកចាប់តាំងពីឡើងកាន់តំណែង។ 

 

ក្នុងសេចក្ដីប្រកាសក្រោយជំនួបជាមួយរដ្ឋមន្រ្តីការពារជាតិអ៊ុយក្រែន Oleksii Reznikov លោក Pistorius​ បានលើកឡើងថា អាល្លឺម៉ង់ ដាណឺម៉ាក និងហូឡង់​ នឹងបញ្ជូនរថក្រោះ Leopard 1 ចន្លោះពី២០ទៅ២៥គ្រឿងទៅអ៊ុយក្រែន​នៅរដូវក្តៅនេះ និងប្រមាណ៨០គ្រឿងទៀតនឹងបញ្ជូនទៅនៅចុងឆ្នាំនេះ និង១០០គ្រឿងទៀតនៅឆ្នាំ ២០២៤។ 

 

យ៉ាងណាមិញ អាល្លឺម៉ង់ មិនបញ្ជាក់ច្បាស់ពីចំនួនរថក្រោះខ្លួននឹងផ្ដល់ឱ្យអ៊ុយក្រែនឡើយ ទោះជាអ៊ុយក្រែនចង់បានច្រើនក្ដី។ 

 

«ចំនួនរថក្រោះដែលត្រូវបញ្ជូនទៅបានកំណត់រួចហើយ ប៉ុន្តែវាត្រូវជួសជុលនិងបំពាក់ឡើងវិញ សម្រាប់ការប្រយុទ្ធ ដូច្នេះយើងមិនដឹងថាចំនួនប៉ុន្មានទេដែលអាចបញ្ជូនទៅ»។ អធិការបតីរងអាល្លឺម៉ង់ Robert Habeck បានប្រាប់អ្នកកាសែតបែបនេះបន្ទាប់ពីជួបជាមួយរដ្ឋមន្ត្រីការបរទេសអាម៉េរិក អាន់តូនី ប្លីងខិន និងទីប្រឹក្សាសន្តិសុខជាតិលោក Jake Sullivanរួច។ 

 

បើតាមសេចក្តីថ្លែងការណ៍រួមរបស់ដាណឺម៉ាក អាល្លឺម៉ង់ និងហូឡង់ អ៊ុយក្រែននឹងទទួលបានរថក្រោះ Leopard 1 A5 យ៉ាងហោចណាស់១០០គ្រឿងក្នុងប៉ុន្មានខែខាងមុខ ក៏ដូចជាទទួលការបណ្តុះបណ្តាល ជំនួយផ្នែកដឹកជញ្ជូន គ្រឿងបន្លាស់ និងកញ្ចប់គ្រាប់រំសេវជាដើម។ យ៉ាងណាមិញ បើតាមសេចក្តីថ្លែងការណ៍ដដែល ព័ត៌មានលម្អិត​នៃ​កិច្ច​ព្រម​ព្រៀងជាមួយ​ក្រុមហ៊ុនផលិត​រថក្រោះនេះមិនទាន់បានបញ្ចប់នៅឡើយ។

 

ទន្ទឹមនឹងការប្រកាសនេះ រដ្ឋមន្ត្រីការពារជាតិហូឡង់លោកស្រី Kasja Ollongren បាននិយាយថា រថក្រោះ Leopard 1​ ជាអាវុធដែលសក្តិសមសម្រាប់ការប្រយុទ្ធ បើទោះបីជាវាជាម៉ូដែលចាស់ក៏ដោយ។
 

ក្នុងសេចក្ដីប្រកាសរួម ដាណឺម៉ាក អាល្លឺម៉ង់ និងហូឡង់បញ្ជាក់ថា គំនិតផ្តួចផ្តើមបញ្ជូនរថក្រោះ Leopard 1 នេះទៅអ៊ុយក្រែនគឺដើម្បីបើកឱកាសសម្រាប់ប្រមូលដៃគូបន្ថែមទៀត ខណៈបែលហ្ស៊ិកក៏បានបង្ហាញចំណាប់អារម្មណ៍ដើម្បីចូលរួមផងដែរ៕