ជាតិ
យុវជនសកម្ម សេវាល្អ
កំពង់ធំ៖ មេប៉ុស្តិ៍ឃុំកំពង់ស្វាយ លើកទឹកចិត្តឱ្យពលរដ្ឋបន្តរាយការណ៍ករណីហិង្សាក្នុងគ្រួសារ មកសមត្ថកិច្ច
11, Feb 2023 , 8:59 am        
រូបភាព
ដោយ៖ ជឿង ស្រីចាន់(យុវជនឃុំកំពង់ស្វាយ)
ស្រុកកំពង់ស្វាយ, កំពង់ធំ៖ ករណីអំពើហិង្សាក្នុងគ្រួសារ នៅឃុំកំពង់ស្វាយ ស្រុកកំពង់ស្វាយ ខេត្តកំពង់ធំ បានថយចុះគួរឱ្យកត់សម្គាល់ ដោយសារពលរដ្ឋមានចំណេះដឹងច្រើនជាងមុន ហើយពួកគេបាន​រាយការណ៍ទៅសមត្ថកិច្ចភ្លាមៗពេលកើតហេតុ។ នេះបើតាមការអះអាងរបស់លោក ប៉ាង ម៉េង មេប៉ុស្តិ៍នគរបាលឃុំកំពង់ស្វាយ ដែល​លោកបន្តថា ការរាយការណ៍របស់ពលរដ្ឋ បានធវើឱ្យ​សមត្ថកិច្ច ចុះជួយអន្តរាគមន៍ បញ្ឈប់ហិង្សាបានទាន់ពេលវេលា។

 
បើតាមលោក ម៉េង មូលហេតុដែលនាំឱ្យកើតមានអំពើហិង្សាក្នុងគ្រួសារ គឺភាគច្រើនមកពីស្ថានភាពជីវភាពគ្រួសារ ​ការលេងល្បែងស៊ីសង និងការប្រើប្រាស់គ្រឿងស្រវឹងជាដើម។ ​លោក ប៉ាង ម៉េង បញ្ជាក់យ៉ាងដូច្នេះ៖ «ធ្វើឱ្យប៉ះពាល់ដល់ឃុំ បាត់បង់សុវត្ថិភាពភូមិឃុំ ដែលពលរដ្ឋមានការឈ្លោះប្រកែកគ្នាគ្រប់ទីកន្លែង។ ម្យ៉ាងទៀតហិង្សា បានធ្វើឱ្យប៉ះពាល់ដល់គ្រួសារខ្លាំងមែនទែន ដូចជា វាយសម្ភារប្រើប្រាស់ កូនមិនបានរៀនសូត្រជាដើម»។ 
 
មេប៉ុស្ដិ៍រូបនេះ បន្ថែមថាការសម្របសម្រួលករណីហិង្សានេះ មានការលំបាកខ្លះដែរ ប៉ុន្តែក្នុងនាមជាសមត្ថកិច្ច ត្រូវតែព្យាយាមស្វែងរកវិធីសាស្រ្តជួយដោះស្រាយ ឱ្យពលរដ្ឋក្នុងភូមិឃុំដោយសន្តិវិធី មិនមានការលម្លៀងទៅខាងណានោះទេ។ ​
 
បើតាម លោក ម៉េង បច្ចុប្បន្ន សមត្ថកិច្ចនៅតែបន្តចុះអប់រំ ណែនាំប្រជាពលរដ្ឋនៅក្នុងឃុំ អំពីផលប៉ះពាល់នៃការប្រើប្រាស់អំពើហិង្សានេះ។ លើសពីនេះ កម្លាំងនគរបាលក៏បន្តចុះល្បាតជាប្រចាំនៅតាមភូមិ ដើម្បីពិនិត្យ និងតាមដានករណីលួចលាក់លេងល្បែងស៊ីសងដែលវាក៏ជាការរួមចំណែកឱ្យកើតមានអំពើហិង្សាផងដែរនោះ។
 
ក្រៅពីកិច្ចអន្តរាគមន៍ពីអាជ្ញាធរឃុំ លោក ប៉ាង ម៉េង ក៏បន្តអំពាវនាវដល់ប្រជាពលរដ្ឋ ឱ្យនៅតែបន្តចូលរួម​យ៉ាងសកម្មជាមួយអាជ្ញាធរ នៅក្នុងការរាយការណ៍បញ្ហាហិង្សា ឬភាពអសកម្មនានា ដើម្បីឱ្យកម្លាំងប៉ុស្តិ៍បានចុះអន្តរាគមន៍ទាន់ពេល និងរួម​គ្នាលុបបំបាត់​អំពើហិង្សា និងសកម្មភាពដែលបង្កអសន្តិសុខនានា៕
 
អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)
 
 
 

Tag:
 គ្រឿងញៀន
  ប៉ាង ម៉េង
  ភូមិឃុំមានសុវត្ថិភាព
© រក្សាសិទ្ធិដោយ thmeythmey.com