រដ្ឋលេខាធិការក្រសួងបរិស្ថាន លោក សៅ សុភាព បានអានចំណុចសំខាន់ៗដែលសម្រេចបាន និងឆ្លងការជជែកផុសផុល ពីភាគីចូលរួមប្រមាណជិត៤០ប្រទេស ក្នុងវេទិកាខាងលើ។ លោកបន្តថា វេទិកានេះមានប្រភេទភាគច្រើនចូលរួម និងមួយផ្នែកតូចចូលរួមតាមប្រព័ន្ធ អនឡាញ។ 

 

ក្នុងសន្និសីទសារព័ត៌មានក្រោយបិទបញ្ចប់វេទិកាជាផ្លូវការ លោក សៅ សុភាព បានបញ្ជាក់ថា វេទិកាថ្នាក់តំបន់នេះ ផ្តោតលើកិច្ចប្រជុំពេញអង្គចំនួន៨ ដែលរួមមាន ការបង្កើតភាពរួមគ្នាក្នុងការ សម្រេចបាន SDGs និងកិច្ចព្រមព្រៀងទីក្រុងប៉ារីស ស្ដីពីការប្រែប្រួលអាកាសធាតុតាមរយៈ សេដ្ឋកិច្ចចក្រា, សេដ្ឋកិច្ចចក្រាឆ្ពោះទៅរកទេសចរណ៍ប្រកបដោយនិរន្តរភាព, សេដ្ឋកិច្ចចក្រា ឆ្ពោះទៅនិរន្តរភាពប្រព័ន្ធអេកូឡូស៊ីបឹងទន្លេសាប , សេដ្ឋកិច្ចចក្រា និងសហគ្រាសខ្នាតតូច និងមធ្យម (SMEs)។ បន្ថែមពីនោះ គឺការផ្សារភ្ជាប់ចន្លោះខ្វះខាតនៃហេដ្ឋារចនាសម្ព័ន្ធ 3R ឆ្ពោះទៅរកសង្គមគ្មានសំណល់, ការប្រើប្រាស់ផលិតផលមេត្រីភាពបរិស្ថានជំនួសឱ្យប្លាស្ទិក ដែលអាចប្រើតែម្ដង,​ ការពិគ្រោះយោបល់លើសេចក្ដីព្រាង 3R ឆ្នាំ២០២៤-២០៣៤ និងសេចក្ដីព្រាងចុងក្រោយនៃរបាយការណ៍លើកទី២ ស្ដីពីស្ថានភាព 3Rs នៅអាស៊ី និងប៉ាស៊ីហ្វិក ការជំរុញសេដ្ឋកិច្ចចក្រា ឆ្ពោះទៅរកការសម្រេចបាននូវគោលដៅអភិវឌ្ឍន៍​ប្រកបដោយចីរភាព។

 

ឆ្លើយតបសំណួរអ្នកសារព័ត៌មាន ដែលចោទសួរជុំវិញកម្ពុជាក្នុងការខិតខំប្រឹងប្រែងដោះស្រាយ បញ្ហាបរិស្ថាន លោក សៅ សុភាព ឆ្លើយថា ក្រសួងបរិស្ថានដែលជាសេនាធិការ បានយកបញ្ហា​នេះជាអាទិភាព និងបង្កើតគោលនយោបាយជាច្រើន ក្នុងន័យធ្វើឱ្យល្អប្រសើរ។ មន្រ្តីរូបនេះបន្តថា ក្រសួងបានដោះស្រាយបញ្ហាការគ្រប់គ្រងសំណល់រឹង សំណល់ទីប្រជុំជន សំណល់គ្រោះថ្នាក់ គិតគូរពីគុណភាពដី ទឹក ខ្យល់ រហូតដល់ពិនិត្យ និងអនុវត្តន៍វិធានការការ​រំខានដោយសំឡេងផង។

 

លោក សៅ សុភាព បន្ថែមថា ក្រសួងបរិស្ថានយកចិត្តទុកដាក់ខ្ពស់ និងជំរុញការប្រើប្រាស់ និងកែច្នៃឡើងវិញ រួមនិងការដាក់គោលដៅ ផែនការយុទ្ធសាស្រ្ដបៃតង ការរៀបចំសំណង់​នគរូបនីយកម្មឱ្យមានភាពបៃតង។ល។

 

ជុំវិញការគ្រប់គ្រងសំណល់នេះដែរ លោក KAZASHIGE ENDO នាយកមជ្ឈមណ្ឌល UNCRD បានឱ្យដឹងថា គេមិនអាចផ្តោតលើបញ្ហាជាក់លាក់នៃមូលហេតុនៃការបំពុលបរិស្ថានបានទេ។ ហើយដើម្បីគ្រប់គ្រងបញ្ហានេះបាន គឺត្រូវគ្រប់គ្រងកំណើនប្រជាជននៅលើសាកលលោក​ជាមុនសិន។​ ក្នុងនោះដែរ UNCRD ក៏ធ្វើការផ្តោតលើការអនុវត្តទីក្រុងឆ្លាតវៃដែរ ដោយផ្តោត​លើគោលការណ៍ 3R និងសេដ្ឋកិច្ចចក្រា ដែលជាផ្នែកមួយសម្រាប់ការអភិវឌ្ឍ​សេដ្ឋកិច្ច។

 

សូមបញ្ជាក់ថា វេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ ស្ដីពី 3R និងសេដ្ឋកិច្ចចក្រា ក្រោមប្រធាន សមហរណកម្មសេដ្ឋកិច្ចចក្រាទៅក្នុងការអភិវឌ្ឍលើគ្រប់វិស័យឆ្ពោះទៅសម្រេច បានសង្គមគ្មានប្លាស្ទិក និងគោលដៅអភិវឌ្ឍន៍ប្រកបដោយចីរភាព។ វេទិកាលើកទី១២ នឹងធ្វើឡើងនៅប្រទេសវៀតណាម៕