លោក Martin Griffiths ទៅដល់ទីក្រុង Kahramanmaras នៅភាគខាងត្បូងតួកគីដែលជាចំណុចកណ្ដាលនៃការរញ្ជួយដីលើកទីមួយកម្រិត៧,៨រ៉ិចទ័រដែលវាយប្រហារនៅព្រឹកថ្ងៃទី៦ ខែកុម្ភៈ។ ប្រហែលមួយម៉ោងបន្ទាប់ រញ្ជួយដីកម្រិត៧,៥រ៉ិចទ័រមួយទៀត ក៏វាយប្រហារតួកគី ហើយធ្វើឱ្យប៉ះពាល់ដល់ប្រជាជនស៊ីរីក្បែរខាងថែមទៀត។

 

បើតាមទិន្នន័យពីក្រុមគ្រូពេទ្យ និងអ្នកសង្រ្គោះ តួកគីមានអ្នកស្លាប់២៤៦១៧នាក់ ឯស៊ីរីមាន៣៥៧៤នាក់ដែរ។ 

 

ប៉ុន្តែលោក Griffiths ប្រាប់ទូរទស្សន៍ Sky News ថា​ វាជារឿងពិបាកក្នុងការប៉ាន់ស្មានចំនួនឱ្យត្រឹមត្រូវ ព្រោះត្រូវចូលរុករកក្រោមបំណែកអាគារបែកបាក់តែម្ដង។ លោកអះអាងថា ចំនួននឹងកើនទ្វេដង ឬច្រើនជាងនេះថែមទៀត។

 

បុគ្គលិកជួយសង្រ្គោះរាប់ពាន់នាក់ កំពុងបំពេញការងារយ៉ាងញាប់ដៃញាប់ជើងដើម្បីរុករកអ្នករស់រានមានជីវិតទាំងដែលអាកាសធាតុត្រជាក់នៅអូសបន្លាយនៅឡើយ។ ក្រុមជួយសង្រ្គោះបរទេស ក៏កំពុងជួយតួកគីក្នុងការស្វែងរកជនរងគ្រោះដែរ​ ខណៈជំនួយកំពុងទៅដល់ទាំងតួកគី និងស៊ីរី៕