អត្រាអ្នកស្លាប់ដោយគ្រោះរញ្ជួយដីនៅតួកគី និងស៊ីរីបានកើនឡើងយ៉ាងឆាប់រហ័សពីមួយថ្ងៃទៅមួយថ្ងៃ។ តាមរបាយការណ៍ចុងក្រោយអ្នកស្លាប់សរុបបានកើនពី២៨០០០នាក់ ​នៅថ្ងៃទី១២ ខែកុមុ្ភៈ ទៅដល់ជិត​៣៤០០០នាក់នៅថ្ងៃទី១៣ ខែកុម្ភៈ។ ដោយឡែកស៊ីរីផ្ទាល់មានអ្នកស្លាប់ជាង ៤៣០០នាក់។ 
 

មន្រ្តីជាន់ខ្ពស់ UN ទទួលបន្ទុកកិច្ចការជំនួយ លោក Martin Griffiths បាននិយាយថា ស៊ីរីត្រូវការជំនួយច្រើនសម្រាប់ជនរងគ្រោះរាប់លាននាក់ដែលគ្មានជំរក។ លោកអះអាងថា ការផ្គត់ផ្គង់ជំនួយមានភាពយឺតយ៉ាវខ្លាំងចំពោះស៊ីរីដែលជាកន្លែងមានសង្គ្រាមជាច្រើនឆ្នាំ មានប្រព័ន្ធសុខាភិបាលទន់ខ្សោយស្រាប់ ហើយឥឡូវត្រូវរងគ្រោះដោយរញ្ជួយដីទៀត។ 
 

«ពួកយើងបរាជ័យចំពោះការជួយប្រជាជន​នៅ​ភាគ​ពាយ័ព្យ​ស៊ីរី។ ពួកគេប្រាកដជាមានអារម្មណ៍ថាត្រូវគេបោះបង់ចោល ពេលកំពុងស្វែងរកជំនួយអន្តរជាតិតែមិនទាន់ឃើញមកដល់»។ លោក Martin Griffiths លើកឡើងបែបនេះលើបណ្ដាញសង្គម Twitter។ 
 

យោងតាមទីភ្នាក់ងារព័ត៌មាន AFP ក្បួនរថយន្តដឹកជំនួយសង្គ្រោះរបស់ UN ចំនួន១០គ្រឿងបានដឹកជញ្ជូនសម្ភារៈសម្រាប់ស្នាក់នៅ កម្រាលប្លាស្ទិក ខ្សែពួរ ភួយ ពូក និងកំរាលពូក ទៅភាគពាយព្យស៊ីរីដោយចូលតាមរយៈច្រកព្រំដែន Bab al-Hawa ពីតួកគី។ យ៉ាងណាមិញ លោក Griffiths បញ្ជាក់ថា ជំនួយនៅតែត្រូវការបន្ថែមទៀត។
 

ប្រធានគម្រោង World Vision ប្រចាំស៊ីរី លោក Clynton Beukes ​បាន​និយាយ​ថា បើ​ធៀប​នឹង​​តួកគី ក្រុម​ជួយ​សង្គ្រោះ​មាន​តិច​តួច​ណាស់នៅ​ស៊ីរី។ លោកក៏និយាយដល់ក្រុមអ្នកសង្គ្រោះក្នុងគ្រាអាសន្នមួកស (White Helmets) ថាពួកគេក៏ព្រមានពីពេលវេលាដែលកាន់តែខើចទៅចំពោះការជួយសង្គ្រោះប្រជាជនស៊ីរីដែរ។ 
 

គួរបញ្ជាក់ថា ភាគពាយព្យស៊ីរី ជាកន្លែងមួយដែលពិបាកទៅដល់បំផុតដែលធ្វើឱ្យជំនួយទៅដល់យឺតយ៉ាវ។ ច្រក Bab al-Hawa ជាចំណុចតែមួយគត់ដែលអាចឱ្យជំនួយអន្តរជាតិទៅដល់ប្រជាជននៅក្នុងតំបន់នោះ ព្រោះតំបន់នោះកាន់កាប់ដោយក្រុមឧទ្ទាមបន្ទាប់ពីសង្គ្រាមស៊ីវិលជិត១២ឆ្នាំកន្លងមក។ ច្រកព្រំដែនផ្សេងទៀតត្រូវបានបិទដើម្បីគាបសង្កត់ក្រុមឧទ្ទាម។ 
 

មកទល់ពេលនេះ ក្រៅពីជំនួយពីអន្តរជាតិ ស៊ីរីបានទទួលជំនួយមនុស្សធម៌ពីរុស្ស៊ី អ៊ីស្រាអែល អង់គ្លេស អ៊ីរ៉ង់ និងហ្ស៊កដានីជាដើម៕