ការពិនិត្យឡើងវិញអំពីភាពវឹកវររមុនការប្រកួតវគ្គផ្តាច់ព្រ័ត្រពានរង្វាន់ UEFA Champions League រវាងក្រុម Liverpool និង Real Madrid បាននិយាយថា អ្នករៀបចំ UEFA ទទួលខុសត្រូវចំពោះព្រឹត្តិការណ៍ ដែលបានកើតឡើងរួមទាំងការខកខានមួយចំនួនធំ ដែលស្ទើរតែនាំទៅរកគ្រោះមហន្តរាយ។
បន្ទាប់ពីមានការចេញផ្សាយការពិនិត្យឡើងវិញលក្ខណៈឯករាជ្យមួយ ថ្ងៃទី១៣ កុម្ភៈ ស្ថាប័នបាល់ទាត់កំពូលអឺរ៉ុប UEFA បានបង្ហាញការសុំទោសទៅកាន់ក្រុម Liverpool ចំពោះការចោទប្រកាន់ទៅកាន់អ្នកគាំទ្រ រួមទាំងការប្រមាថផ្សេងៗ។
រឿងរ៉ាវនាការប្រកួតរវាង Liverpool ទល់ Real Madrid នាវគ្គផ្តាចព្រ័ត្រ UCL បានពន្យាពេលជាង ៣៦នាទី បន្ទាប់ពីអ្នកគាំទ្រហង្សក្រហមរាប់ពាន់នាក់ បានជួបបញ្ហាដោយមិនអាចចូលក្នុងកីឡដ្ឋាន Stade de France សម្រាប់ការប្រកួតកាលពីថ្ងៃទី២៨ ខែឧសភា ឆ្នាំ ២០២២។ ការប្រកួតនោះ Real Madrid យកឈ្នះ Liverpool ១-០ គ្រងតំណែងជើងឯកលើកទី១៤ លើសក្រុមណាទាំងអស់ក្នុងពិភពលោក។
ពេលដែលអ្នកគាំទ្រ Liverpool ច្រើននាក់ បាននាំគ្នាសម្រុកចូលកីឡដ្ឋានដើម្បីឱ្យទាន់ការប្រកួត ខណៈនោះមន្ត្រីប៉ូលិសបារាំង បានប្រើប្រាស់កាំភ្លើងឧស្ម័នបង្ហួរទឹកភ្នែកបាញ់ដាក់ពួកគេ ដែលក្នុងនោះក៏មានអ្នកគាំទ្រជាស្ត្រី និងកុមារ។ មូលហេតុនៃការកក់ស្ទះនៃអ្នកគាំទ្រក្រៅកីឡដ្ឋាន ដោយកាលនោះមន្រ្តីរៀបចំការប្រកួតបារាំង និង UEFA បានស្តីបន្ទោសថាអ្នកគាំទ្រ Liverpool បានប្រើប្រាស់សំបុត្រប្រកួតក្លែងក្លាយ។ តែទោះយ៉ាងណាការពិនិត្យឡើងវិញបញ្ជាក់ថា គ្មានភស្តុតាងគ្រប់គ្រាន់ឡើយ ដើម្បីគាំទ្រលើរឿងស្តីបន្ទោសនេះ។
«ការប្រកួតផ្តាច់ព្រ័ត្រនឹងក្លាយជាការចងចាំមួយដែលជាគ្រានៃទុក្ខសម្រាប់អ្នកគាំទ្រដ៏ច្រើន ។ប៉ុន្តែក៏គួរតែជាការំលឹកមួយអំពីស្ថានភាពដ៏អាក្រក់បែបនេះ គឺយើងពិតជាមិនចង់ធ្វើសាក្សីម្តងទៀតនោះទេនាពេលអនាគត នៅក្នុងព្រឹត្តិការណ៍កីឡាណាមួយក្នុងអឺរ៉ុប ឬកន្លែងណាផ្សេងនៅលើពិភពលោក។ ការជៀសវាងគ្រោះមហន្តរាយនាពេលអនាគត និងការកែលម្អសេវាកម្មដែលផ្តល់ទៅឱ្យក្នុងព្រឹត្តិការណ៍កីឡាបាល់ទាត់គឺជាគោលបំណងនៃក្រុមប្រឹក្សាអំឡុងដំណើរការស៊ើបអង្កេតនេះ។»។ នេះបើតាមសម្តីលោក Tiago Brandao Rodrigues ដែលជាសមាជិកសភាព័រទុយហ្កាល់ដែលគ្រប់គ្រងលើការស៊ើបអង្កេតរឿងការប្រកួត Liverpool និង Real Madrid។
ក្រោយការប្រកួតពីរបាយការណ៍ស៊ើបអង្កេតរួចមក អគ្គលេខាធិការ UEFA លោក Theodore Theodoridis បានតំណាងឱ្យ UEFA ចេញមុខសុំទោសដូច្នេះថា៖«សូមអភ័យទោសដោយស្មោះអស់ពីចិត្តម្តងទៀតចំពោះអ្នកគាំទ្រទាំងអស់ ដែលរងផលប៉ះពាល់ដោយព្រឹត្តិការណ៍ដែលលាតត្រដាង អំពីអ្វីដែលគួរតែជាការប្រារព្ធកម្មវិធីដ៏កំពូលឱ្យបានល្អបំផុតមួយ។ យើងពិតជាចង់សុំទោសដល់អ្នកគាំទ្រ Liverpool FC នូវបទពិសោធន៍អាក្រក់ដែលពួកគេទទួលបានក្នុងការចូលរួមការប្រកួត ហើយសុំទោសនូវអ្វីដែលយើងបានស្តីបន្ទោសទៅលើពួកគេ និងការពន្យាពេលការប្រកួត។»។
ក្រោយពេលរបាយការណ៍បានចេញផ្សាយមិនបានប៉ុន្មានម៉ោងផងនោះក្លិប Liverpool ក៏បានចេញសេចក្តីថ្លែងការណ៍បង្ហាញពីការខកចិត្តយ៉ាងខ្លាំង ចំពោះបញ្ហាដែលពួកគេបានជួបប្រទះអំឡុងពេលប្រកួតវគ្គផ្តាច់ព្រ័ត្រទល់ Real Madrid។
Liverpool ក៏បានអំពាវនាវឱ្យមានការផ្សព្វផ្សាយឱ្យទូលំទូលាយនូវរបាយការណ៍ ដែលបានរកឃើញដោយក្រុមស្ថាប័នឯករាជ្យទៅកាន់អ្នកគាំទ្រខ្លួន ដើម្បីអ្នកគាំទ្រទាំងនោះ ទទួលបាននូវការសុំទោសដោយក្តីគោរព និងទទួលបានយុត្តិធម៌ក្រោយរង់ចាំអស់រយៈពេល ៨ខែពីការស៊ើបអង្កេត៕