ចាប់តាំងពីការចាប់ផ្តើមសង្រ្គាមជិតមួយឆ្នាំមកនេះ កុមារដែលមានអាយុចាប់ពី៤ខែឡើងទៅ ត្រូវបានរុស្ស៊ីនាំយកទៅជំរំចំនួន៤៣កន្លែងនៅទូទាំងប្រទេសរុស្ស៊ី តំបន់គ្រីមៀ និងស៊ីបេរី ខណៈទីក្រុងមូស្គូមានគោលបំណងបញ្ជ្រាបទស្សនៈស្នេហាជាតិ និងការអប់រំផ្នែកយោធារបស់រុស្ស៊ីដល់កុមារទាំងនេះ។ នេះបើតាមរបាយការណ៍ចេញផ្សាយដោយមជ្ឈមណ្ឌលស្រាវជ្រាវមនុស្សធម៌ Yale ដែលមានការគាំទ្រ និងជំនួយពីក្រសួងបរទេសអាម៉េរិក។ 
 

លោក Nathaniel Raymond អ្នកស្រាវជ្រាវមួយរូបរបស់ស្ថាប័នខាងលើ បានលើកឡើងថា រុស្ស៊ីកំពុងរំលោភបំពានយ៉ាងច្បាស់លើអនុសញ្ញាទីក្រុងហ្សឺណែវមាត្រា៤ ស្តីពីការទទួលជនស៊ីវិលក្នុងអំឡុងពេលសង្រ្គាម​ ក៏ដូចជាប្រព្រឹត្តបទល្មើសចាប់ខ្លួន និងបង្ខាំងកុមារអ៊ុយក្រែនផងដែរ។ 
 

របាយការណ៍ខាងលើ ពឹងផ្អែកលើរូបភាពផ្កាយរណប និងប្រភពសាធារណៈ។ ក្នុងរបាយការណ៍ កុមារយ៉ាងហោចណាស់៦ពាន់នាក់ត្រូវបានបញ្ជូនទៅជំរុំភៀសខ្លួន ប៉ុន្តែតួលេខនេះទំនងជាខ្ពស់ជាងនេះទៅទៀត។ 
 

«សកម្មភាពរុស្ស៊ីក្នុងករណីខ្លះអាចចាត់ទុកជាឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ»។ លោក Nathaniel Raymond​ បានប្រាប់អ្នកកាសែតនៅថ្ងៃទី១៤ ខែកុម្ភៈបែបនេះ។ លើសពីនេះ របាយការណ៍នេះក៏បានអំពាវនាវឱ្យស្ថាប័នអព្យាក្រឹតមួយចូលទៅកាន់ជំរំជនភៀសខ្លួនរបស់រុស្ស៊ីជាបន្ទាន់ដើម្បីបញ្ឈប់ការចាប់ខ្លួន និងបង្ខាំងកុមារអ៊ុយក្រែន។ 
 

នាពេលថ្មីៗនេះ រដ្ឋាភិបាលអ៊ុយក្រែន អះអាងថា កុមារអ៊ុយក្រែនប្រមាណ១៤,៧០០នាក់ត្រូវបាននិរទេសទៅរុស្ស៊ីដែលកុមារមួយចំនួនកំពុងត្រូវបានគេរំលោភបំពានផ្លូវភេទផង៕