នៅក្នុងឃាតកម្មឆ្នាំ១៩៩៤ ជនរងគ្រោះមួយរូប ត្រូវបានបាញ់សម្លាប់ដោយបុរសពាក់ម៉ាស់ចំនួនពីររូប នៅពីមុខផ្ទះរបស់លោក Lamar Johnson។ តុលាការនៅក្នុងរដ្ឋ Missouri បានចោទប្រកាន់លោក Lamar Johnson ពីបទល្មើសឃាតកម្ម។ យ៉ាងណាមិញ បទល្មើសនេះ ត្រូវបានលោក Lamar Johnson ច្រានចោល ដោយសារលោកមិននៅផ្ទះ ក្នុងពេលកើតហេតុ។ 

ក្រោយជាប់ពន្ធនាគាររយៈពេល ២៨ឆ្នាំ លោក Lamar Johnson ត្រូវបានដោះលែង បន្ទាប់ពីតុលាការ Missouri រកឃើញថាគ្មានពិរុទ្ធភាពលើបទល្មើសឃាតកម្មនេះ។ លោកចៅក្រម David Mason នៅថ្ងៃទី១៤ ខែកុម្ភៈ បានអះអាងថា សាក្សីពីរនាក់ បានផ្តល់ព័ស្តុតាងយ៉ាងច្បាស់លាស់ និងទុកចិត្តបានថា លោក Lamar Johnson គ្មានពិរុទ្ធភាព។ 

 

«នេះ គឺជារឿងអស្ចារ្យ»។ លោក Lamar Johnson បានបញ្ជាក់បែបនេះ បន្ទាប់ពីដើរចេញពីបន្ទប់តុលាការ។ 

 

ជាការពិត នៅក្នុងឆ្នាំ២០២១ រដ្ឋអាជ្ញា លោកស្រី Kim Gardner បានដាក់ពាក្យស្នើ ដើម្បីស្វះស្វែងរកការដោះលែងលោក Johnson រួចហើយ បន្ទាប់ពីមានការស៊ើបអង្កេតជាមួយអង្គការច្បាប់មួយ។

 

ក្រោយពីសវនាការចុងក្រោយជុំវិញរឿងក្តីលោក Johnson ក្រុមអ្នកច្បាប់ បានរិះគន់ការិយាល័យអគ្គរដ្ឋអាជ្ញាប្រចាំយ៉ាងខ្លាំង ក្រោមហេតុផលមិនទម្លាក់បទចោទលើលោក Jonhson។ ចំណែកអ្នកនាំពាក្យការិយាល័យអគ្គរដ្ឋអាជ្ញា បានអះអាងថា ខ្លួនត្រូវតែការពារនីតិរដ្ឋ និងការពារសាលក្រមដែលបានសម្រេចលើកដំបូង។ ទន្ទឹមនេះ អ្នកនាំពាក្យការិយាល័យអគ្គរដ្ឋអាជ្ញា បានប្រកាសថា នឹងមិនបន្តចាត់វិធានការលើរឿងក្តីនេះឡើយ៕