ក្រសួងការពារជាតិជប៉ុន នៅថ្ងៃទី១៤ ខែកុម្ភៈ បានអះអាងថា បាឡុងឈ្លបការណ៍ចិន បានហោះចូលដែនអាកាសខ្លួនយ៉ាងហោចណាស់ ៣លើក ចាប់តាំងពីឆ្នាំ២០១៩ មក។​ ទាក់ទិននឹងបញ្ហានេះ រដ្ឋាភិបាលក្រុងតូក្យូ បានប្រាប់ក្រុងប៉េកាំងយ៉ាងច្បាស់ៗថា ការបំពាន ដែនអាកាសជប៉ុនដោយបាឡុងចារកិច្ចចិន ជារឿងមិនអាចទទួលយកបាន។

 

ក្រោយមានការចោទប្រកាន់ពីជប៉ុន ក្រសួងការបរទេសចិន បានប្រតិកម្មយ៉ាងខ្លាំង និងច្រានចោល ហើយថែមទាំងហៅខ្លួនឯងថា ជាប្រទេសដែលមានការទទួលខុសត្រូវទៀត។ 

 

«យើងតែងគោរពយ៉ាងម៉ត់ចត់ចំពោះច្បាប់អន្តរជាតិ គោរពអធិបតេយ្យ និងបូរណភាពដែនដីរបស់ប្រទេសទាំងអស់»។ អ្នកនាំពាក្យក្រសួងការបរទេសចិន លោក Wang Wenbin បានបញ្ជាក់បែបនេះទៅកាន់អ្នកសារព័ត៌មាន ដែលបានសួរជុំវិញការចោទប្រកាន់របស់ជប៉ុនលើបាឡុងរបស់ចិន។ 

 

ក្នុងសន្និសីទសារព័ត៌មាននៅថ្ងៃទី១៥ ខែកុម្ភៈ មន្រ្តីក្រសួងការបរទេសរូបនេះ បានបន្តថា ដោយគ្មានព័ស្តុតាងជាក់លាក់ ភាគីក្រុងតូក្យូ បានចោទប្រកាន់ដោយគ្មានមូលដ្ឋានច្បាស់លាស់ ដើម្បីបង្ខូច និងវាយប្រហារក្រុងប៉េកាំង។​

 

នៅចំពោះមុខអ្នកសារព័ត៌មានជាច្រើនរូប អ្នកនាំពាក្យក្រសួងការបរទេសចិន បានលើកឡើងជាថ្មីថា បាឡុងចិន ដែលហោះចូលដែនអាកាសអាម៉េរិក ជាបាឡុងប្រើប្រាស់ក្រោមហេតុផលស៊ីវិលប៉ុណ្ណោះ និងបានកើតឡើងដោយអចេតនា។ ត្រង់ចំនុចនេះ លោក Wang បានជំរុញឱ្យភាគីក្រុងតូក្យូ ទទួលយកហេតុការណ៍កើតឡើងដោយគ្មានការរំពឹងទុក និងបញ្ឈប់ការពន្លើសលើស្ថានភាពបច្ចុប្បន្ន។ 

 

គួររំឮកថា តាមការបញ្ជាក់របស់ក្រសួងការពារជាតិ នៅក្នុងឆ្នាំ២០២៩ ជប៉ុនបានចាប់សញ្ញាបានវត្ថុហោះពណ៌ស នៅលើក្រុងភាគនិរតី Kagoshima, នៅក្នុងខែមិថុនា ឆ្នាំ២០២០ នៅលើក្រុងភាគឦសាន Miyagi និងក្នុងឆ្នាំ២០២១ នៅលើក្រុង Aomori៕