ជាតិ
សេដ្ឋកិច្ច
ការសិក្សាគម្រោងផ្លូវល្បឿនលឿនភ្នំពេញ-សៀមរាប នឹងចប់នៅខែកញ្ញា លោក ស៊ុន ចាន់ថុល ថ្លែងក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ ២០២២ និងទិសដៅការងារឆ្នាំ ២០២៣ កាលពីថ្ងៃទី១៥កុម្ភៈ
× កិច្ចព្រមព្រៀងស្តីពីផ្លូវល្បឿនលឿនភ្នំពេញ-សៀមរាប អាចសម្រេចបាននៅក្នុងខែកញ្ញា ឆ្នាំ២០២៣។ នេះជាការលើកឡើងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដែលកំពុងជំរុញក្រុមហ៊ុនឱ្យពន្លឿននៃការសិក្សាធ្វើផ្លូវល្បឿនលឿននៃខ្សែទីបីរបស់កម្ពុជានេះ។
«ការសិក្សាផ្លូវល្បឿនលឿនភ្នំពេញ-សៀមរាប គឺក្រុមហ៊ុនបានសន្យាថា នឹងធ្វើឱ្យហើយ និងឈានទៅចុះហត្ថលេខាលើFramework Agreement [កិច្ចព្រមព្រៀងក្របខ័ណ្ឌការងារ] នៅក្នុងខែកញ្ញា ឆ្នាំ ២០២៣»។ លោក ស៊ុន ចាន់ថុល ថ្លែងបែបនេះក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ ២០២២ និងទិសដៅការងារឆ្នាំ ២០២៣ របស់ក្រសួងសាធារណការ នាថ្ងៃទី ១៥ ខែកុម្ភៈ។
លោកបានអះអាងថា គម្រោងផ្លូវល្បឿនលឿនភ្នំពេញ-សៀមរាបនេះ គឺជាគម្រោងអទិភាពដែលក្រសួងសាធារណការកំពុងខិតខំជំរុញឱ្យចេញជារូបរាង។
កន្លងមកលោក ស៊ុន ចាន់ថុល បានលើកឡើងថា មានក្រុមហ៊ុនចំនួន៤ បានស្នើសុំក្រសួងសាធារណការ និងដឹកជញ្ជូន សិក្សាធ្វើផ្លូវល្បឿនលឿនពីភ្នំពេញ-ខេត្តសៀមរាប។ ដ្បិតការសិក្សានេះមិនទាន់សម្រេចជាផ្លែផ្កា ប៉ុន្តែលោករដ្ឋមន្ត្រីសាធារណការ រំពឹងខ្ពស់ថា អនាគត កម្ពុជានឹងមានផ្លូវល្បឿនលឿនពីភ្នំពេញទៅខេត្តសៀមរាប។
ក្នុងពិធីសម្ពោធដាក់ឱ្យប្រើប្រាស់ស្ថានីយបញ្ចូលថាមពលយានយន្តអគ្គិសនី និងពិធីប្រគល់-ទទួលយានយន្តអគ្គិសនី នៅទីស្ដីការក្រសួង នាព្រឹកថ្ងៃទី២៩វិច្ឆិកា ឆ្នាំ២០២២ លោក ស៊ុន ចាន់ថុល មានប្រសាសន៍យ៉ាងដូច្នេះ៖ «ខ្ញុំជឿជាក់ ថា ថ្ងៃមុខយើងនឹងមានផ្លូវល្បឿនលឿនភ្នំពេញ ទៅ សៀមរាប ផងដែរ»។
សូមជម្រាបថា ផ្លូវល្បឿនលឿនខ្សែដំបូងដែលកម្ពុជាកំពុងប្រើប្រាស់សព្វថ្ងៃនេះ គឺ ភ្នំពេញ-ព្រះសីហនុ មានតម្លៃជាង២០០០លានដុល្លារអាម៉េរិក។ ផ្លូវល្បឿនលឿនក្រោមទុនវិនិយោគរបស់ក្រុមហ៊ុនចិននេះ ត្រូវបានដាក់ឱ្យដំណើរការជាផ្លូវការ នៅថ្ងៃទី១វិច្ឆិកា ឆ្នាំ២០២២។ សម្រាប់ផ្លូវល្បឿនលឿនពីភ្នំពេញ-បាវិត ក្រោមទុនវិនិយោគជិត១ ៧០០លានដុល្លារ កម្ពុជាគ្រោងបើកការដ្ឋានសាងសង់នៅអំឡុងពាក់កណ្តាលឆ្នាំ២០២៣៕
Tag:
ផ្លូវល្បឿនលឿន
សៀមរាប
© រក្សាសិទ្ធិដោយ thmeythmey.com