ស្ថានទូតរុស្ស៊ី នៅថ្ងៃទី១៧ ខែកុម្ភៈ បានរៀបចំសន្និសីទសារព័ត៌មានរបស់ខ្លួនដោយមានការចូលពីអ្នកកាសែតដោយផ្ទាល់ជាលើកដំបូង ក្រោយរៀបចំតាមអនឡាញជាច្រើនលើកដោយសារការរាលដាលជំងឺកូវីដ-១៩។ ក្រៅពីបកស្រាយ និងការពារអ្វីដែលកើតឡើងនៅអ៊ុយក្រែនដែលរុស្ស៊ីចាត់ទុកជាប្រតិបត្តិការពិសេស ទំនាក់ទំនងជាមួយកម្ពុជា ក៏ត្រូវបានមន្ត្រីសា្ថនទូតរុស្ស៊ីលើកឡើងដែរ ដោយរុស្ស៊ីត្រៀមធ្វើការជាមួយកម្ពុជាលើវិស័យនានា។

 

 

នាកម្មវិធីដដែល ស្ថានទូតរុស្ស៊ី ក៏បានលើកឡើងពីការចូលរួមតំណាងកម្ពុជាក្នុងការប្រកួតកីឡា Phygital លើកទី៣ នៅទីក្រុង Kazan ដែលធ្វើនៅថ្ងៃទី៥-១១ ខែកុម្ភៈ ហើយបានទស្សនាទីក្រុងនេះដែរ។​ ក្រុមកម្ពុជា ទទួលបានចំណាត់ទី៣។ មន្រ្តីស្ថានទូតរុស្ស៊ី Sofia Orboskaia បញ្ជាក់ថា រុស្ស៊ីក៏ត្រៀមជាស្រេចក្នុងការពង្រីកកិច្ចសហប្រតិបត្តិការបន្ថែមទៀតលើវិស័យកីឡា និងយុវជនជាមួយកម្ពុជា។

 

លើសពីនេះ មន្ត្រីស្ថានទូតរុស្ស៊ី ក៏បានប្រកាសពីការត្រៀមធ្វើការជាមួយកម្ពុជាលើការងារដោះមីន និងយោធា។ ជំនួយការអនុព័ន្ធយោធាស្ថានទូតរុស្ស៊ី លោក Sergei Shimulin ក៏និយាយដែរថា រុស្ស៊ីគោរពកម្ពុជាដើម្បីធ្វើកិច្ចសហប្រតិបត្តិការជាមួយប្រទេសណាក៏បានលើកិច្ចការដោះមីននេះ​ ហើយក្រសួងការបរទេសរុស្ស៊ីក៏បានពន្យល់ជំហររបស់ខ្លួនដល់កម្ពុជារួចហើយដែរ។ 

 

ក្នុងខែមកកន្លងទៅ កម្ពុជា​ ដោយមានកិច្ចសហប្រតិបត្តិការជាមួយជប៉ុន បានផ្ដល់ការបណ្ដុះបណ្ដាលដោះមីនដល់អ៊ុយក្រែនចំនួន១សប្ដាហ៍ក្រោមគោលការណ៍មនុស្សធម៌។ បើតាមលោក Shimulin រុស្ស៊ីក៏អាចបញ្ជូនកម្លាំងរបស់ខ្លួនមកកម្ពុជាសម្រាប់កិច្ចសហប្រតិបត្តិការនេះដែរ បើមានសំណើពីភាគីកម្ពុជា ខណៈរុស្ស៊ីស្វាគមន៍ទទួលសំណើជានិច្ច។

 

ទាក់ទងទំនាក់ទំនងវិស័យយោធាវិញ ឆ្លើយតបនឹងសំណួរថា រុស្ស៊ីអាចធ្វើសមយុទ្ធជាមួយកម្ពុជាឬយ៉ាងណា មន្រ្តីអនុព័ន្ធយោធាដដែល និយាយថា រុស្ស៊ីជាប្រទេសលំដាប់ទី២លើពិភពលោកលើផ្នែកយោធានេះ ហើយមានបទពិសោធច្រើន។ លោក Shimulin បន្ថែមថា រុស្ស៊ីក៏អាចធ្វើការជាមួយប្រទេសណាដែលចង់រៀនសូត្រពីរុស្ស៊ីដែរ។

 

«ប្រសិនបើកម្ពុជាត្រូវការជំនួយណាមួយពីរុស្ស៊ី រុស្ស៊ីនឹងពិចារណានៅពេលទទួលបានសំណើផ្លូវការ។» មន្រ្តីយោធាខាងលើបញ្ជាក់បែបនេះ៕​