លោក Conor Nestor បានបញ្ជាក់ប្រាប់សារព័ត៌មានថ្មីៗតាមតេលេក្រាមថា ព្រះខ័នរាជស្វាយរៀង មានកីឡាករក្មេងៗ ដែលត្រូវការបទពិសោធន៍ប្រកួតជាច្រើន ដូច្នេះខ្លួននឹងយកការប្រកួតក្នុងលីគខាប់ ឲ្យកីឡាករ បញ្ចេញសមត្ថភាព និងបន្សាំ មុនពេលលីគកំពូលកម្ពុជារដូវកាលនេះ ចាប់ផ្ដើម។
 

«យើង មានកីឡាករថ្មីៗ និងក្មេងៗ ជាច្រើន ហើយយើងអត់មានពេលវេលាគ្រប់គ្រាន់ក្នុងការរៀបចំខ្លួនទេ។ ដូច្នេះ យើងនឹងយកការប្រកួតនេះ ដើម្បីពង្រឹងកីឡាករឲ្យពួកគេយល់កាន់តែច្បាស់។»។ គ្រូបង្វឹកព្រះខ័នរាជ ស្វាយរៀង បាននិយាយដូច្នេះ។
 

ដោយឡែក លោក Oleg Starynskyi គ្រូភ្នំពេញក្រោន បង្ហាញការប្ដេជ្ញាចិត្តខ្ពស់ ក្នុងការប្រកួត Cambodian League Cup នេះ ដោយចាត់ទុករាល់ការប្រកួតទាំងអស់ ជាប្រកួតសំខាន់បំផុត។ គ្រូបង្វឹករូបនេះ ជឿថា ក្រុមព្រះខ័នរាជ ស្វាយរៀង នឹងព្យាយាមសងសឹក យកឈ្នះភ្នំពេញក្រោន ព្រោះបានបរាជ័យក្នុងការដណ្ដើមពានរង្វាន់លីគកំពូលកម្ពុជា កាលពីរដូវកាល២០២២។ លោក Oleg Starynskyi បាននិយាយប្រាប់សារព័ត៌មានថ្មីៗ តាមតេលេក្រាមថា៖«ព្រះខ័នរាជ ស្វាយរៀង ផ្លាស់ប្ដូរច្រើនអំឡុងពេលសម្រាក ក្រោយបញ្ចប់រដូវកាល។ កីឡាករ មានកម្លាំងចិត្តយ៉ាងខ្លាំង ក្នុងការប្រកួតសងសឹកចំពោះការចាញ់នារដូវកាលមុន។ ជ័យជម្នះ មានសារសំខាន់ណាស់សម្រាប់យើង សម្រាប់ការប្រកួតដើម្បីឡើងទៅកំពូលតារាងពូល B។»។

ក្នុងថ្ងៃជាមួយគ្នានោះ សូលទីឡូអង្គរ ត្រូវជួបជាមួយ អង្គរថាយហ្គឺរ នៅកីឡដ្ឋានហនុមាន វេលាម៉ោង ៣:៤៥រសៀល ខណៈពេល អាយ អេស អាយ ដង្កោសែនជ័យ ស្វាគមន៍ ណាហ្គាវើលដ៍ នៅកីឡដ្ឋាន AIA KMH Sport Park៕