នៅពេលថ្មីៗនេះ នាវាល្បាតចិន បានបាញ់ភ្លើងឡាស៊ែរដាក់នាវាល្បាតហ្វីលីពីន នៅក្នុងដែនទឹកជម្លោះក្នុងសមុទ្រចិនខាងត្បូង។ ក្រសួងការបរទេសហ្វីលីពីន ក៏បានដាក់ការតវ៉ាជាមួយចិនជុំវិញបញ្ហានេះដែរ។ ប៉ុន្មានថ្ងៃបន្ទាប់ លោក Ferdinand Marcos Jr ប្រធានាធិបតីហ្វីលីពីន បានប្តេជ្ញាការពារដែនដីរបស់ខ្លួន។ 

 

«ហ្វីលីពីននឹងមិនបាត់បង់ដែនដីរបស់ខ្លួនសូម្បីតែបន្តិចឡើយ»។ លោក Marcos Jr បានសង្កត់ធ្ងន់បែបនេះ នៅក្នុងសុន្ទរកថាមួយក្នុងថ្ងៃទី១៨ ខែកុម្ភៈ ដោយបន្តថា យើងនឹងបន្តគោរពបូរណភាពដែនដី និងអធិបតេយ្យ ដោយផ្អែកទៅនឹងរដ្ឋធម្មនុញ្ញហ្វីលីពីន និងច្បាប់អន្តរជាតិ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

បើតាមប្រធានាធិបតីរូបនេះ រដ្ឋាភិបាលក្រុងម៉ានីល នឹងធ្វើការជាមួយប្រទេសជិតខាង ដើម្បីការពារសុវត្ថិភាព និងសន្តិសុខរបស់ប្រជាជនខ្លួន។ ទន្ទឹមនេះ មេដឹកនាំហ្វីលីពីន ក៏បានយល់ឃើញផងដែរពីភាពតានតឹងភូមិសាស្រ្តនយោបាយនៅក្នុងតំបន់ ដែលធ្វើឱ្យប៉ះពាល់ដល់ការប្រកាន់ខ្ជាប់សន្តិភាព និងគំរាមកំហែងសន្តិសុខ និងស្ថិរភាពប្រទេស តំបន់ និងពិភពលោក។ 

 

គួររំឭកថា នៅក្នុងឆ្នាំ២០២២ប៉ុណ្ណោះ រដ្ឋាភិបាលក្រុងម៉ានីល បានដាក់ការតវ៉ាជាមួយក្រុងប៉េកាំងរហូតដល់ទៅជិត ២០០លើក ពាក់ព័ន្ធនឹងសកម្មភាពចិន នៅក្នុងសមុទ្រចិនខាងត្បូង៕