ដោយពិភពលោកកំពុងមានជម្លោះ ភាពតានតឹង និងបញ្ហាចម្រូងចម្រាសជាច្រើន ចិន បានសម្រេចបង្កើតការិយាល័យរៀបចំអង្គការអន្តរជាតិសម្រាប់សន្ធានកម្ម (IOMed) ថ្មីមួយ ដែលមានមូលដ្ឋាននៅក្នុងក្រុងហុងកុង ក្នុងថ្ងៃទី១៦ ខែកុម្ភៈ។ 

 

នៅក្នុងពិធីសម្ពោធអង្គការសន្ធានកម្មអន្តរជាតិមួយនេះ លោកវ៉ាង យី សមាជិកការិយាល័យនយោបាយនៃបក្សកុម្មុយនីស្តចិន ក៏បានផ្ញើលិខិតអបអរសាទរផង។ បើតាមលោកវ៉ាង ពិភពលោក កំពុងស្ថិតនៅក្នុងច្របូកច្របល់ វិវដ្តទៅរកឯកប៉ូលនិយម មានគំនិតបែបសង្រ្គាមត្រជាក់ និងគំរាមសម្លុត។ 

 

ត្រង់ចំណុចនេះ លោកវ៉ាង បានអះអាងថា ក្នុងនាមជាប្រទេសមហាអំណាចដែលមានការទទួលខុសត្រូវ ចិនតែងជាប្រទេសដែលជួយកសាងពិភពលោក សន្តិភាព ការពារសណ្តាប់ធ្នាប់អន្តរជាតិ ផ្តល់សេវាសាធារណៈ និងស្វះស្វែងរកមធ្យោបាយសម្រាប់សេចក្តីសម្រេចប្រកបដោយសន្តិភាពលើជម្លោះអន្តរជាតិ ក្នុងកាលៈទេសៈថ្មី។ 

 

ស្របគ្នានេះ រដ្ឋមន្រ្តីការបរទេសចិន លោក ឈីន កាង ក៏បានថ្លែងសារតាមប្រព័ន្ធវីដេអូផងដែរ នៅក្នុងថ្ងៃទី១៦ ខែកុម្ភៈ។ លោកឈីង បានអះអាងថា ការិយាល័យរៀបចំអង្គការអន្តរជាតិសម្រាប់សន្ធានកម្មនឹងជាអង្គការច្បាប់អន្តររដ្ឋាភិបាលដំបូង សម្រាប់ជួយដោះស្រាយវិវាទអន្តរជាតិ តាមរយៈសន្ធានកម្ម។

 

ប្រមុខការទូតចិន ក៏បានអំពាវនាវឱ្យមានការចូលរួមពីសំណាក់ប្រទេសកំពុងអភិវឌ្ឍ ការពង្រឹងការហ្វឹកហាត់លើការសម្របសម្រួលសម្រាប់ប្រទេសកំពុងអភិវឌ្ឍ ហើយធ្វើការដើម្បីបង្កើតយន្តការដោះស្រាយជម្លោះ៕