អន្តរជាតិ
ហ្វីលីពីននិងអាម៉េរិក ពិភាក្សាអំពីការល្បាតរួមគ្នារបស់ឆ្មាំសមុទ្រនៅសមុទ្រចិនខាងត្បូង
× មន្ត្រីក្រុងម៉ានីលនៅថ្ងៃទី២០ ខែកុម្ភៈបានលើកឡើងថា ហ្វីលីពីន និងអាម៉េរិកកំពុងពិភាក្សាគ្នាលើការល្បាតនាវាឆ្មាំសមុទ្ររួមគ្នានៅសមុទ្រចិនខាងត្បូងដើម្បីគាំទ្រសេរីភាពនៃការធ្វើនាវាចរណ៍ ទីដែលការប្រទាញប្រទង់អធិបតេយ្យនៅតែមានរវាងចិន និងប្រទេសក្នុងតំបន់។
អ្នកនាំពាក្យឆ្មាំឆ្នេរសមុទ្រហ្វីលីពីន (PCG) លើបញ្ហាសមុទ្រចិនខាងត្បូង លោក Jay Tarriela ប្រាប់ទូរទស្សន៍ CNN ប្រចាំហ្វីលីពីនថា កិច្ចពិភាក្សាជាមួយអាម៉េរិកបានរីកចម្រើនហួសពី ដំណាក់កាលដំបូង ហើយលទ្ធភាពនៃការអនុវត្តការល្បាតរួមគ្នាគឺមានកម្រិតខ្ពស់។ យ៉ាងណាមិញលោក Tarriela មិនបានផ្តល់ព័ត៌មានលម្អិតអំពីទំហំ ឬពេលវេលានៃការល្បាតដែល បានស្នើឡើងនោះទេ។
ការបញ្ជាក់នេះបានកើតឡើងក្រោយអាម៉េរិកនិង ហ្វីលីពីនកាលពីដើមខែកុម្ភៈ យល់ព្រមចាប់ផ្តើមការល្បាតរួមគ្នាឡើងវិញនៅសមុទ្រចិនខាងត្បូង។
«វាមានផ្លូវដែលអាចទៅរួចចាប់តាំងពីក្រសួងការពារជាតិអាម៉េរិកក៏បានគាំទ្រការល្បាតរួមគ្នាជាមួយកងទ័ពជើងទឹកហ្វីលីពីន និងកងទ័ពជើងទឹកអាម៉េរិក។ ដូច្នេះមានភាពប្រាកដប្រជាសម្រាប់ការល្បាតរួមគ្នាពិសេសនេះដែលនឹងកើតឡើងរវាងឆ្មាំឆ្នេរសមុទ្រនៃ ប្រទេសទាំងពីរ»។ លោក Tarriela សង្កត់ធ្ងន់បែបនេះរួចបន្តថា វាក៏អាចទៅរួចចំពោះការល្បាតនៅសមុទ្រចិនខាងត្បូងដើម្បីគាំទ្រសេរីភាពធ្វើនាវាចរណ៍របស់រដ្ឋាភិបាលអាម៉េរិកផងដែរ។
ជុំវិញរឿងនេះ អតីតមេបញ្ជាការរងនៃកងទ័ពជើងទឹកហ្វីលីពីនលោក Rommel Jude Ong ប្រាប់ទីភ្នាក់ងារព័ត៌មាន Reuters នៅថ្ងៃដដែលថា គំនិតនៃការដាក់ពង្រាយនាវាឆ្មាំឆ្នេរសមុទ្រនៅសមុទ្រចិនខាងត្បូងជំនួសឱ្យកងទ័ពជើងទឹកនឹងកាត់បន្ថយការគណនាខុស និងរារាំងចិនពីការស្វែងរកលេសដើម្បីបង្កើនភាពតានតឹងនៅក្នុងផ្លូវទឹកផងដែរ។
គួរបញ្ជាក់ថា ហ្វីលីពីនបានអនុញ្ញាតឱ្យអាម៉េរិកចូលប្រើមូលដ្ឋានទ័ពចំនួន៤បន្ថែមទៀត ខណៈអាម៉េរិកអាចចូលប្រើប្រាស់បានរហូតដល់៥កន្លែងរួចមកហើយ។ បន្ថែមពីនេះ មេបញ្ជាការឆ្មាំសមុទ្រហ្វីលីពីនឧត្តមនាវីឯក Artemio Abu កាលពីថ្ងៃទី៦ ខែកុម្ភៈបាន លើកឡើងថា ហ្វីលីពីនក៏កំពុងពង្រីកវត្តមានរបស់ខ្លួននៅសមុទ្រជម្លោះសមុទ្រចិនខាងត្បូង ដោយដាក់ពង្រាយនាវា និងបន្ថែមជើងហោះហើរដើម្បីការពារដែនសមុទ្រ និងអ្នកនេសាទរបស់ប្រទេស៕
© រក្សាសិទ្ធិដោយ thmeythmey.com