កូរ៉េខាងជើង នៅព្រឹកថ្ងៃទី២០ ខែកុម្ភៈ បានបាញ់មីស៊ីលបាលីស្ទិកចំនួនពីរគ្រាប់ទៅក្នុងសមុទ្រខាងកើត ក្រោយបានបាញ់មីស៊ីលបាលីស្ទិកអន្តរទ្វីប (ICBM) បានពីរថ្ងៃ។ ការបាញ់មីស៊ីលជាបន្តបន្ទាប់នេះ បានធ្វើឱ្យប្រទេសជាច្រើនបង្ហាញការព្រួយបារម្ភ និងថ្កោលទោសលើកូរ៉េខាងជើង។ 
 

បើទោះបីជាកន្លងមក ប្រទេសនានាបានថ្កោលទោសសកម្មភាពកូរ៉េខាងជើងក្តី ក្រុមប្រឹក្សាសន្តិសុខ UN មិនបាន​ថ្កោលទោសរួមជាផ្លូវការនៅឡើយ ដ្បិតចិននិងរុស្ស៊ីតែងប្រើសិទ្ធិវ៉េតូប្រឆាំងនឹងវិធានការផ្សេងៗលើកូរ៉េខាងជើង។ ចិននិងរុស្ស៊ីបានលើកហេតុផលថា ការដាក់សម្ពាធបន្ថែមទៀតលើកូរ៉េខាងជើងនឹងមិនអាចជួយបន្ធូរបន្ថយភាពតានតឹងឡើយ។ កាលពីខែឧសភាឆ្នាំមុន ប្រទេសទាំង​២ ក៏បានវ៉េតូលើការជំរុញដែលដឹកនាំដោយអាម៉េរិកដើម្បីដាក់ទណ្ឌកម្មបន្ថែមលើកូរ៉េខាងជើងដែរ។ 
 

នៅថ្ងៃទី២០ ខែកុម្ភៈ ឯកអគ្គរដ្ឋទូតអាម៉េរិកប្រចាំ UN លោកស្រី  Linda Thomas-Greenfield លើកឡើងថា ការការពារកូរ៉េខាងជើងចំពោះសកម្មភាពដែលខ្លួនបានប្រព្រឹត្តគឺកំពុងធ្វើឱ្យតំបន់អាស៊ីនិងពិភពលោកមានហានិភ័យនៃជម្លោះ។ 
 

«កង្វះសកម្មភាពរបស់ក្រុមប្រឹក្សាគឺអាក្រក់ជាងការអាម៉ាស់ទៅទៀត។ វាអាចបង្កជាគ្រោះថ្នាក់»។ លោកស្រី Linda Thomas-Greenfield បានលើកឡើងបែបនេះប្រាប់ក្រុមប្រឹក្សាសន្តិសុខក្នុងកិច្ចប្រជុំនៅថ្ងៃទី២០ ខែកុម្ភៈ មុនជំរុញឱ្យមានការដាក់ទណ្ឌកម្មលើកូរ៉េខាងជើង។ 
 

យ៉ាងណាមិញ ឯកអគ្គរដ្ឋទូតចិនប្រចាំ UN លោក Dai Bing អះអាងថា កិច្ចប្រជុំជាបន្តបន្ទាប់និងការអំពាវនាវឱ្យមានការដាក់ទណ្ឌកម្មបន្ថែមទៀតលើកូរ៉េខាងជើង គឺមិនអំណោយផលសម្រាប់ការដោះស្រាយបញ្ហានេះទេ។ 
 

គួរបញ្ជាក់ថា ការចេញ​ថ្កោលទោសរួមរបស់ក្រុមប្រឹក្សាសន្តិសុខ អាចកើតឡើងទៅបានលុះត្រាតែមានការយល់ព្រមពីសមាជិកទាំង១៥។ វិធានការលើកចុងក្រោយដែលក្រុមប្រឹក្សាសន្តិសុខបានចាត់លើកូរ៉េខាងជើង គឺតាំងពីឆ្នាំ ២០១៧ មកម្ល៉េះ ក្រោយកូរ៉េខាងជើងព្យាយាមអភិវឌ្ឍកម្មវិធីអាវុធនុយក្លេអ៊ែររបស់ខ្លួន៕