ក្រោយចប់សវនាការ លោក ជូង ជូងី មេធាវីរបស់លោក ថាច់ សេដ្ឋា បានប្រាប់អ្នកគាំទ្រគណបក្សភ្លើងទៀន ដែលឈរចាំនៅខាងក្រៅសាលាឧទ្ធរណ៍ភ្នំពេញយ៉ាងដូច្នេះថា៖«មិនដោះលែងទេ»។ លោកមេធវី អះអាងថា លោក នឹងទៅជួបលោក ថាច់ សេដ្ឋា នៅពន្ធនាគារ ហើយនឹងបន្តធ្វើទៅតាមនីតិវិធី ដែលលោក ថាច់ សេដ្ឋា ចង់បាន។ 
 

យ៉ាងណា លោកមេធាវី ពុំបានបញ្ជាក់ពីហេតុផលរបស់សាលាឧទ្ធរណ៍ភ្នំពេញ ដែលបន្តឃុំខ្លួនលោក ថាច់ សេដ្ឋា ឡើយ។ សារព័ត៌មានថ្មីៗ បានហៅទូរស័ព្ទទៅលោក ដើម្បីចង់ដឹងពីហេតុផលរបស់សាលាឧទ្ធរណ៍ តែលោក ពុំទទួលការហៅចូល។ 
 

ក្រៅពីសមាជិក-សមាជិកា និងអ្នកគាំទ្រទូទៅ គេ ក៏ឃើញមានថ្នាក់ដឹកនាំមួយចំនួនរបស់គណបក្សភ្លើងទៀន ទៅចូលរួមឃ្លាំមើលអង្គសវនាការលើសំណុំរឿងលោក ថាច់ សេដ្ឋា នៅក្រៅសាលាឧទ្ធរណ៍ភ្នំពេញផងដែរ ដូចជា លោក សុន ឆ័យ ជាអនុប្រធាន និងលោក លី សុធារ៉ាយុត្តិ ជាអគ្គលេខាធិការ ជាដើម។ 
 

សូមរម្លឹកថា លោក ថាច់ សេដ្ឋា ត្រូវសមត្ថកិច្ច ចាប់ខ្លួន កាលពីអំឡុងខែមករា ឆ្នាំ២០២៣ ពីបទចេញសែកស្អុយ ឬសែកគ្មានសាច់ប្រាក់។ ក្រោយមក១ថ្ងៃប៉ុណ្ណោះ លោកមេធាវី ជូង ជូងី ក៏សរសេរបណ្តឹងទៅកាន់សាលាឧទ្ធរណ៍ ដើម្បីសុំជំទាស់នឹងដីការបស់សាលាដំបូងរាជធានីភ្នំពេញ ដែលសម្រេចឃុំខ្លួនលោក ថាច់ សេដ្ឋា៕