យោងទៅតាមការផ្សាយលើហ្វេសប៊ុកសហព័ន្ធកីឡាប្រដាល់គុនខ្មែរ នាថ្ងៃទី២៣ ខែកុម្ភៈ លោក តែម ម៉ឺន បានបញ្ជាក់ប្រាប់ក្នុងពិធីបិទវគ្គបណ្តុះបណ្តាល អាជ្ញាកណ្តាល ចៅក្រមកីឡាប្រដាល់គុនខ្មែរកម្រិតបឋមឆ្នាំ២០២២ នៅមជ្ឈមណ្ឌលកីឡាកងយោធពលខេមរភូមិន្ទ ថាវគ្គបណ្ដុះបណ្ដាលនេះ មិនត្រឹមតែជាការពង្រឹងសមត្ថភាពរបស់អាជ្ញាកណ្ដាល ឬចៅក្រម តែប៉ុណ្ណោះទេ ប៉ុន្ដែក៏ផ្ដល់ឱកាសដល់កីឡាករចាស់ៗ ដែលបានបញ្ចប់អាជីពប្រកួត អាចបន្ដចូលរួមជួយក្នុងវិស័យកីឡាប្រដាល់គុនខ្មែរផងដែរ។ នោះ មានន័យថាសហព័ន្ធ នៅតែលើកទឹកចិត្ត និងរក្សាធនធានល្អ ដើម្បីអភិវឌ្ឍវិស័យកីឡាគុនខ្មែរ ម្យ៉ាងវិញទៀត កីឡាករទាំងនោះ អាចចូលរួមជួយវិស័យមួយនេះ បានទៅតាមសមត្ថភាពរបស់ខ្លួន។ 
  

 

ប្រធានសហព័ន្ធរូបនេះ បន្ដទៀតថា អាជ្ញាកណ្ដាល និងចៅក្រម ដែលបានឆ្លងកាត់វគ្គបណ្ដុះបណ្ដាលនេះ ត្រូវមានឆន្ទៈបំពេញការងារឲ្យបានល្អបំផុត នៅលើសង្វៀន។ ក្នុងវគ្គនេះ មានសិក្ខាកាមមកពីវិទ្យាស្ថានជាតិ អប់រំកាយ និងកីឡា, មន្ទីរអប់រំកាយ និងកីឡា និងអតីតកីឡាករប្រដាល់គុនខ្មែរ ដូចនេះ អ្នកទាំងនោះងាយនិងទទួលយកបានូវអ្វី ដែលបានរៀនអំពីវគ្គមួយនេះ។
 

គួរបញ្ជាក់ផងដែរថា វគ្គបណ្ដុះបណ្ដាលនេះ មានសិក្ខាកាមចូលរួម ៣៦រូប ក្នុងនោះ ២រូបជាស្ដ្រី ដែលធ្វើចាប់ពីថ្ងៃទី២០ ដល់ថ្ងៃទី២២ ខែកុម្ភៈ៕