«ទោះបីជារាងកៀកព្រឹត្តិការណ៍ស៊ីហ្គេមក៏ដោយ យើងទៅវៀតណាមនេះ គឺមិនមែនទៅដើរលេងទេ​ គឺយើងទៅដើម្បីចូលរួមលេងនៅក្លិបគេដើម្បីប្រកួតប្រជែង។ អ៊ីចឹង! ខ្ញុំគិតថាពួកយើងទៅចូលរួមនៅក្លិបវៀតណាមនេះ គឺយើងអាចទទួលបានបទពិសោធថ្មីផ្សេងទៀតសម្រាប់ស៊ីហ្គេម»។ កីឡាករ វឿន វាសនា និយាយដូច្នេះ។ 

 

កីឡាករ វឿន វាសនា រំពឹងថា ការបង្ហាញខ្លួននៅក្នុងក្លិបវៀតណាម នឹងកាន់តែល្អជាងមុន ខណៈការប្រកួតខិតមកដល់។ «ការចេញទៅវៀតណាមលើកនេះ ខ្ញុំគិតថាល្អជាងលើកមុន ព្រោះថាកៀកស៊ីហ្គេម យើងទទួលបានបទពិសោធភ្លាម យើងត្រលប់មកកម្ពុជាភ្លាម យើងនឹងប្រកួតភ្លាមតែម្តង»។ វឿន វាសនា និយាយបែបនេះ។

 

ចំណែកលោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បញ្ជាក់ថា តម្លៃខ្លួន វឿន វាសនា លើកទីពីរនេះ គឺគុណនឹងពីរ បើធៀបលើកមុន ដែលមានតម្លៃខ្លួនជាង១ម៉ឺនដុល្លារ ត្រឹមរយៈពេលមួយសប្តាហ៍ប៉ុណ្ណោះ។

 

លោក អាំង សិរីពិសិដ្ឋ និយាយថា៖«ខ្ញុំបានទម្លាយជាព័ត៌មាន ប៉ុន្តែជាប្រហើរៗទេ ថាកីឡាករ វឿន វាសនា គាត់នឹងចេញទៅក្រៅប្រទេសជាប់កាតព្វកិច្ចទៅក្លិបដដែល (Lavie Long An) ដែលឆ្នាំមុន(២០២២)តម្លៃខ្លួនរបស់គាត់ជាង១ម៉ឺន ហើយឆ្នាំនេះ(២០២៣)តម្លៃខ្លួនរបស់គាត់គុណនឹងពីរ(ស្មើជាង២ម៉ឺនដុល្លារ)»៕