អន្តរជាតិ
ស្ត្រីអាហ្វហ្កានីស្ថានប្រឈមនឹងគ្រោះថ្នាក់បន្ថែមទៀត ប្រសិនលោកខាងលិចដកជំនួយ
× អង្គការវិបត្តិអន្តរជាតិ International Crisis Group (ICG) បានលើកឡើងនៅក្នុងរបាយការណ៍មួយចេញនៅថ្ងៃទី២៣ខែកុម្ភៈថា បណ្តាប្រទេសលោកខាងលិចបានប្រថុយបង្កគ្រោះថ្នាក់បន្ថែមទៀតដល់ស្ត្រីអាហ្វហ្កានីស្ថានតាមរយៈការដកមូលនិធិនិងផ្អាកប្រតិបត្តិការនៅប្រទេសនេះដើម្បីប្រឆាំងនឹងគោលនយោបាយរបស់ក្រុមតាលីបង់ដែលប៉ះពាល់យ៉ាងធ្ងន់ធ្ងរដល់ស្ត្រី។
បើតាមអង្គការវិបត្តិអន្តរជាតិដែលមានមូលដ្ឋាននៅទីក្រុងព្រុចសែល មហាអំណាចខាងក្រៅគួរតែចាប់ក្រុមតាលីបង់ឱ្យទទួលខុសត្រូវចំពោះការហាមឃាត់ស្រ្តី និងក្មេងពីការទទួលបានការអប់រំថ្នាក់មធ្យមសិក្សា និងសកលវិទ្យាល័យ និងធ្វើការឱ្យអង្គកាក្រៅរដ្ឋាភិបាល។ ប៉ុន្តែពួកគេគួរតែជៀសវាងការចាកចេញពីប្រទេសនេះ និងទុកឱ្យស្ត្រីអាហ្វហ្កានីស្ថានមិនទទួលបានសេវាគាំទ្រណាមួយនោះ។
«ម្ចាស់ជំនួយកំពុងងាកចេញពីអាហ្វហ្កានីស្ថានដោយស្អប់ខ្ពើមចំពោះការរឹតត្បិតរបស់ពួកតាលីបង់លើសេរីភាពជាមូលដ្ឋានរបស់ស្ត្រី។ ទោះជាយ៉ាងណាក៏ដោយ ការកាត់ជំនួយជាការផ្ញើសារអំពីសិទ្ធិស្ត្រីនឹងធ្វើឱ្យស្ថានការណ៍កាន់តែអាក្រក់សម្រាប់ជនជាតិអាហ្វហ្កានីស្ថានទាំងអស់»។ ទីប្រឹក្សាជាន់ខ្ពស់របស់ ICG នៅអាហ្វហ្កានីស្ថានលោក Graeme Smith លើកឡើងបែបនេះ។
កន្លងមក អង្គការសប្បុរសធម៌ជាច្រើនបានផ្អាកប្រតិបត្តិការរបស់នៅអាហ្វហ្កានីស្ថានក្នុងខែធ្នូតាមការសម្រេចរបស់រដ្ឋអំណាចតាលីបង់ តែក៏អំពាវនាវឱ្យពួកតាលីបង់ផ្លាស់ប្តូរការសម្រេចចិត្តរបស់ខ្លួនក្នុងការហាមឃាត់បុគ្គលិកមនុស្សធម៌ជាស្ត្រីដែលធ្វើការឱ្យទីភ្នាក់ងារជំនួយ។ ប្រហែលមួយភាគបីនៃកម្លាំងការងាររបស់ ទីភ្នាក់ងារមនុស្សធម៌នានាជាស្ត្រីតែម្ដង។
© រក្សាសិទ្ធិដោយ thmeythmey.com