លោក អាំង សិរីពិសិដ្ឋ មើលឃើញថា បច្ចុប្បន្ននេះ កីឡាករបាល់ទះកម្ពុជា កំពុងមានទីផ្សារក្នុងតំបន់អាស៊ីអាគ្នេយ៍ ដូច្នេះពួកគេត្រូវតែពង្រឹងសមត្ថភាពខ្លួនឱ្យខ្លាំងថែមទៀត។

ថ្លែងក្រោយជំនួបបាល់ទះមិត្តភាពកម្ពុជា-បារាំង កាលពីថ្ងៃទី២២ កុម្ភៈ លោក អាំង សិរីពិសិដ្ឋ បាននិយាយថា៖«វាសនា ជាកីឡាករខ្មែរទីមួយដែលមានថ្លៃខ្លួនខ្ពស់បំផុត។

ត្រង់ចំណុចគឺជាសារមួយ ដើម្បីដាស់តឿនទៅដល់កីឡាករមានវ័យក្មេងៗ គឺសូមឱ្យខិតខំប្រឹងប្រែងហ្វឹកហាត់ ពីព្រោះថាបច្ចុប្បន្ននេះ ទីផ្សារកីឡាបាល់ទះកម្ពុជា គឺកំពុងតែមានមុខមានមាត់ខ្លាំងក្នុងចំណោមប្រទេសក្នុងតំបន់អាស៊ីអាគ្នេយ៍»។ បន្ថែមពីលើនោះទៀត លោក សិរីពិសិដ្ឋ ជំរុញឱ្យកីឡាករខិតខំបន្ថែមទៀត ពង្រឹងគុណផលកីឡារបស់ខ្លួនឱ្យបានល្អប្រសើរ។

 

ក្លិប Lavie Long An នៃប្រទេសវៀតណាម បានចុះកិច្ចសន្យានាំយកកីឡាករ វឿន វាសនា សមាជិកក្រុមជម្រើសជាតិកម្ពុជា ទៅកាន់ទីក្រុង Long An សារជាថ្មីក្នុងតម្លៃខ្លួនគុណនឹងពីរ បើធៀបនឹងការនាំយកទៅកាលពីឆ្នាំ២០២២ ដែលមានតម្លៃខ្លួនជាង ១ម៉ឺនដុល្លារ។
 

លោកអគ្គលេខាធិការរូបនេះ បានបញ្ជាក់ថា មិនមែនតែប្រទេសវៀតណាមនោះទេ ដែលចង់បានកីឡាករកម្ពុជា ទៅចូលរួមជាមួយក្លិបគេ ។ មូលហេតុនេះហើយទើបសហព័ន្ធ ចង់ពង្រឹងសមត្ថភាពកីឡាករឱ្យមានគុណភាព ទើបតម្លៃខ្លួននឹងកាន់តែខ្ពស់ ។

 

លោក អាំង សិរីពិសិដ្ឋ បន្តថា៖«ខ្ញុំជឿជាក់ថាចប់ស៊ីហ្គេម២០២៣ ក្នុងករណីដែលប្រទេសកម្ពុជារបស់យើងទទួលបានកម្រិតមេដាយ មាស ឬក៏ប្រាក់ ខ្ញុំជឿជាក់ថាតម្លៃខ្លួនអត្តពលិកកម្ពុជារបស់យើងរិតតែថ្លៃថែមទៀត»។ 
 

លោក សិរីពិសិដ្ឋ បន្ថែមថា ការបញ្ចេញសមត្ថភាពនាពេលស៊ីហ្គេមនេះ គឺមានក្លិបធំៗក្នុងតំបន់អាស៊ីអាគ្នេយ៍ នឹងចុះមកមើលគុណភាពកីឡាករ ដើម្បីនាំយកទៅប្រកបអាជីពក្នុងក្លិប នៃលីគកំពូលរបស់ប្រទេសគេ ជាក់ជាមិនខាន។ 
 

មន្រ្តីសហព័ន្ធដដែល ក៏បានសំណូមពរទៅដល់អ្នកលេងបាល់ទះក្រៅប្រព័ន្ធ សូមលេងបាល់ឱ្យត្រូវស្តង់ដារតាមក្បួនខ្នាត ដើម្បីបណ្តុះគុណផលកីឡាករឱ្យមានប្រសិទ្ធភាព ៕