«ខ្ញុំគ្រោងនឹងជួបជាមួយលោក ស៊ី ជិនភីង »។ លោក វ៉ូឡូឌីមៀ ហ្សេលេនស្គី ប្រាប់អ្នកសារព័ត៌មាន បែបនេះនាឱកាសសន្និសីទកាសែតចំពេលការឈ្លានពានរបស់រុស្ស៊ីឈានចូលដល់មួយឆ្នាំ។ លោក​បន្តថា ជំនួបជាមួយមេដឹកនាំចិនសំខាន់ណាស់សម្រាប់សន្ដិសុខពិភពលោក។ យ៉ាងណាមិញ លោក មិនបានបញ្ជាក់ពីពេលវេលា ឬទីកន្លែងដែលលោកគ្រោងនឹងជួយលោក ស៊ី ឡើយ។

 

បន្ថែមពីនេះ មេដឹកនាំអ៊ុយក្រែនរូបនេះបានបង្ហាញពីក្ដីសង្ឃឹមដែលចិននឹងជួយគាំទ្រកិច្ចចរចា សន្តិភាព និងព្រមទាំងជួយអ៊ុយក្រែនផងដែរ។

«ខ្ញុំពិតជាចង់ជឿថា ចិននឹងមិនផ្គត់ផ្គង់សព្វាវុធដល់រុស្ស៊ីទេ។ វាមានសារសំខាន់ណាស់សម្រាប់ខ្ញុំ»។ លោក ហ្សេលេនស្គី សង្កត់ធ្ងន់បែបនេះ។
 

នៅថ្ងៃដដែល ចិន​បានលិខិតប្រកាសជំហរបស់ខ្លួនដោយ​អំពាវនាវ​ឱ្យ​មាន​ការ​ចរចា​សន្តិភាព​ជា​បន្ទាន់។ ប៉ុន្តែ​មហាអំណាច​លោកខាងលិច​មួយចំនួន​បាន​ច្រានចោល​សំណើ​នេះហើយ​ក៏បាន​ព្រមាន​ពី​ទំនាក់​ទំនង​ជិតស្និទ្ធ​របស់​ទីក្រុង​ប៉េកាំង​ជាមួយ​ទីក្រុង​មូស្គូ​ផងដែរ។ 
 

កន្លងមក ទីក្រុងប៉េកាំងបានប្រកាន់ជំហរអព្យាក្រឹតក្នុងជម្លោះនេះ ខណៈពេលដែល​រក្សាទំនាក់ទំ​ន​ង​ជិតស្និទ្ធជាមួយរុស្ស៊ីដែលជាសម្ព័ន្ធមិត្តយុទ្ធសាស្ត្រ៕