«ហហ្មុក» ជាម្ហូបខ្មែរមួយមុខ ដែលមានរបៀបធ្វើ និងគ្រឿងផ្សំច្រើន សាំញ៉ាំបន្តិច តម្រូវឱ្យអ្នកធ្វើត្រូវយកចិត្តទុក ផ្ចិតផ្ចង់ក្នុងការចម្អិន ពិសេសការវាល់គ្រឿងឱ្យបានត្រឹមត្រូវ តាមក្បួនខ្នាត ដើម្បីទទួលបានរសជាតិដ៏ឈ្ងុយឆ្ងាញ់។

 

លោក ឌុក ដេត ម្ចាស់ជ័យលាភីលេខ១ លើការចម្អិនមុខម្ហូប «ហហ្មុក» បានប្រាប់ពីរបៀបធ្វើហហ្មុកឱ្យឆ្ងាញ់ ត្រូវមានគ្រឿងផ្សំដូចជា ស្លឹកគ្រៃហាន់១០០ក្រាម,ខ្ទឹមស២៥ក្រាម,ខ្ទឹមក្រហម៤០ក្រាម,រមៀត១៥ក្រាម,រំដេង១៥ក្រាម,ស្លឹកក្រូចសើច៣ក្រាម,ខ្ជាយ៥ក្រាម,ម្ទេសក្រៀម៤៥ក្រាម,សណ្តែកដីលីង៣០ក្រាម,ប្រហុក២៥ក្រាម,ស្ករត្នោត៥០ក្រាម។ គ្រឿងផ្សំាទាំងនេះ ត្រូវបុកបញ្ចូលគ្នាឱ្យហ្មត់ល្មម ហើយឆាគ្រឿងទាំងនេះដោយប្រើប្រាស់ប្រេងឆា៥០ក្រាម។

 

បន្ទាប់ពីឆាគ្រឿងហហ្មុកហើយ ត្រូវយកមកលាយបញ្ចូលជាមួយសាច់ត្រីអណ្ដែងចំនួន១០០ក្រាម,ផ្សិតចំបើង៥០ក្រាម,ស្លឹកញ២០ក្រាម,ពងមាន់១គ្រាប់,ខ្ទិះដូង១៦០មីលីលីត្រ និងបន្ថែមទឹកត្រី១០មីលីលីត្រ,ម្សៅស៊ុប១០ក្រាម និងស្ករស៥ក្រាមផងដែរ។ ក្រោយប្រចល់គ្រឿងផ្សំទាំងអស់បញ្ចូលគ្នារួចរាល់ ត្រូវបត់កន្ទោងស្លឹកចេក ដើម្បីដួសហហ្មុកដាក់ចំហុយរយៈពេល១៥នាទីជាការស្រេច។

 

មុខម្ហូបហហ្មុកនេះ អាចធ្វើតាម២របៀប ដោយចំហុយ ឬឆាក៏បាន។ លោក ឌុក ដេត ថ្លែងថា ទាំងចំហុយឬឆា ហហ្មុកប្រើប្រាស់គ្រឿងផ្សំដូចគ្នា ខុសគ្នាត្រង់ថា ហហ្មុកឆាអាចស្ងួតជាងចំហុយ និងប្រើពេលលឿនជាងផងដែរ។ តែយ៉ាងណា លោក ដេត ណែនាំឱ្យធ្វើហហ្មុកខ្ចប់ចំហុយ ជាជាងយកមកឆា ព្រោះរសជាតិឆ្ងាញ់ និងជាក្បួនធ្វើតាំងពីបុរាណ។ ត្រីរ៉ស់ ត្រីឆ្ដោ និងត្រីអណ្ដែង សុទ្ធតែអាចយកមកធ្វើហហ្មុកបានដូចគ្នា៕