ទីភ្នាក់ងារព័ត៌មានរដ្ឋ KCNA បានរាយការណ៍ថា មេដឹកនាំកូរ៉េខាងជើងលោក គីម ជុងអ៊ុន នៅថ្ងៃទី២៦ ខែកុម្ភៈ បានដឹកនាំកិច្ចប្រជុំពេញអង្គលើកទីប្រាំពីរនៃគណៈមជ្ឈិមអាណត្តិទី៨ របស់បក្សពលករកូរ៉េ ដើម្បីត្រួតពិនិត្យគម្រោងអភិវឌ្ឍជនបទ។ នេះជាកិច្ចប្រជុំសំខាន់ និងបន្ទាន់បំផុត ដើម្បីបង្កើតយុទ្ធសាស្ត្រត្រឹមត្រូវសម្រាប់ការអភិវឌ្ឍកសិកម្មកូរ៉េខាងជើង។
 

កិច្ចប្រជុំនេះធ្វើឡើងស្របពេលសហគមន៍អន្តរជាតិអះអាងពីបញ្ហាអសន្តិសុខស្បៀងអាហារដែលកាន់តែធ្លាក់ក្នុងសភាពអាក្រក់ទៅៗសម្រាប់ក្នុងប្រទេសនេះ។ ទណ្ឌកម្មអន្តរជាតិ និងវិបត្តិសល់ពីការបិទខ្ទប់ប្រទេសពេលមានជំងឺកូវីដ-១៩ រឹតតែធ្វើឱ្យបញ្ហាស្បៀងនៅកូរ៉េខាងជើងជួបបញ្ហា។
 

កូរ៉េខាងត្បូងនាពេលថ្មីៗនេះក៏បានលើកឡើងពីស្ថានភាពស្បៀងអាហាររបស់កូរ៉េខាងជើងដែលហាក់ដូចជាកាន់តែយ៉ាប់យ៉ឺនឡើងដែរ។ ក្រុមមន្ត្រីទីក្រុងសេអ៊ូលបានសន្មត់កិច្ចប្រជុំនេះថាជាការទទួលស្គាល់ការពិតនៃកង្វះខាតស្បៀងអាហារធ្ងន់ធ្ងររបស់កូរ៉េខាងជើង។
 

កាលពីខែមុន កម្មវិធី 38 North ដែលតាមដានកិច្ចការកូរ៉េខាងជើង បានបង្ហាញនៅក្នុងរបាយការណ៍មួយថា ស្បៀងអាហារបម្រុងសម្រាប់ប្រជាជនកូរ៉េខាងជើងទំនងជាធ្លាក់ចុះក្រោមកម្រិតអប្បបរមា ដែលជាអសន្តិសុខស្បៀងមានស្ថានភាពអាក្រក់បំផុតចាប់តាំងពីគ្រោះទុរ្ភិក្សនៃទសវត្សរ៍១៩៩០។
 

គួរបញ្ជាក់ថា កូរ៉េខាងបានជើងស្ថិតនៅក្រោមការដាក់ទណ្ឌកម្មអន្តរជាតិយ៉ាងតឹងរ៉ឹង ហើយក្នុងរយៈពេលប៉ុន្មានឆ្នាំចុងក្រោយនេះ ពាណិជ្ជកម្មតាមព្រំដែនរបស់ខ្លួនស្ទើរតែត្រូវបានផ្អាកទាំងស្រុងដោយការបិទខ្ទប់ប្រទេសដើម្បីបង្ការការរាលដាលជំងឺកូវីដ-១៩។ កង្វះខាតស្បៀងអាហារនាពេលបច្ចុប្បន្ននេះ ទំនងជាបណ្តាលមកពីការប្រមូលផលមិនល្អ ចំពេលមានអាកាសធាតុក្ដៅខ្លាំងផងដែរ។
 

បើទោះកូរ៉េខាងជើងទំនងជួបវិបត្តិស្បៀងអាហារ លោក គីម មិនរាថយចំពោះការពង្រីកកម្មវិធីអាវុធនុយក្លេអ៊ែរ និងមីស៊ីលឡើយ ដោយនៅដើមឆ្នាំ២០២៣ កូរ៉េខាងជើងបានបាញ់មីស៊ីលបាលីស្ទិកអន្តរទ្វីប និងមីស៊ីលបាលីស្ទិកចម្ងាយខ្លីពីរគ្រាប់បន្តបន្ទាប់គ្នា៕