ចិន ដែលបានប្រកាសសម្ព័ន្ធភាពគ្មានដែនកំណត់ជាមួយរុស្ស៊ី បានបង្ហាញពីផែនការសន្តិភាពរបស់​ខ្លួន​ដើម្បីរួមចំណែកដោះស្រាយបញ្ហានៅអ៊ុយក្រែន។ អ្នកនាំពាក្យវិមានក្រេមឡាំងលោក Dmitry Peskov និយាយថា គំនិតផ្តួចផ្តើមបែបនេះដែលអាចនាំមកនូវសន្តិភាពកាន់តែជិតស្និទ្ធ គឺសមនឹង​ទទួល​បាន​ការយកចិត្តទុកដាក់។

 

«យើងកំពុងយកចិត្តទុកដាក់យ៉ាងខ្លាំងចំពោះផែនការរបស់មិត្តចិនរបស់យើង»។​ លោក Peskov ប្រា​ប់អ្នក​សារព័ត៌មានបែបនេះនាសន្និសីទសារព័ត៌មាន រួចបន្តថា ជាការពិតណាស់ ព័ត៌មាន​លម្អិត​ចាំ​បាច់​ត្រូវធ្វើជាមួយការវិភាគដោយយកចិត្តទុកដាក់ និងគិតគូរពីផលប្រយោជន៍របស់ភាគីផ្សេងៗ ហើយនេះ ជាដំណើរការដ៏វែងឆ្ងាយទៅមុខ។

 

លោក Peskov ក៏បានបញ្ជាក់ពីការបន្តប្រតិបត្តិការយោធាពិសេសនៅអ៊ុយក្រែន ហើយសម្រាប់ពេល នេះមិនឃើញមានសញ្ញាណាមួយដែលបង្ហាញថាដំណោះស្រាយសន្តិភាពអាចសម្រេចបាននោះទេ។មន្រ្តីដដែលបានបដិសេធមិនអធិប្បាយលើរបាយការណ៍​ប្រព័ន្ធផ្សព្វផ្សាយរបស់អាម៉េរិកដែ​លថា​ចិន​កំពុងពិចារណាផ្ទេរយន្តហោះដ្រូនទៅកាន់រុស្ស៊ី។
 

ផ្សេងពីនេះ ទីក្រុងប៉េកាំងបានបដិសេធមិនបានថ្កោលទោសសកម្មភាព​របស់រុស្ស៊ីក្នុងពេលថ្មីៗ​នេះ​នៅ​ក្នុងកិច្ចប្រជុំរដ្ឋមន្រ្តីហិរញ្ញវត្ថុនៃក្រុមប្រទេសសេដ្ឋកិច្ចធំៗទាំង ២០ (G20) កាលពីចុងសប្ដាហ៍មុនឡើយ​៕