ពីពិធីប្រគល់សញ្ញាបត្រជូននិស្សិតនៃវិទ្យាស្ថានបច្ចេកវិទ្យាកម្ពុជាជិត ៥ពាន់នាក់ នាព្រឹកថ្ងៃទី១ មីនា សម្ដេច ហ៊ុន សែន ស្នើឱ្យពិនិត្យ និងធ្វើវិសោធនកម្មច្បាប់ ដើម្បីបើកផ្លូវឱ្យពលរដ្ឋ មានឱកាសអាចចិញ្ចឹមសត្វព្រៃនៅក្នុងផ្ទះបាន ប៉ុន្តែសត្វទាំងនោះ ជាប្រភេទសត្វកម្រ។
 

ជុំវិញករណីចិញ្ចឹមសត្វក្ងោកនេះវិញ សម្ដេច ហ៊ុន សែន យល់ថា អាជ្ញាធរមិនគួរយកទោសពៃលើពលរដ្ឋ ដែលស្រលាញ់ និងចិញ្ចឹមសត្វទាំងនេះទេ ហើយបើសិនជាចង់យកទោសនោះ គឺសម្ដេច ជាអ្នកមានទោសមុនគេ។
 

«អ៊ីចឹងទេ បើសិនជាមានការខ្វះចន្លោះប្រហោង យើងគួរធ្វើវិសោធនកម្មច្បាប់ ដើម្បីផ្ដល់ឱកាសឱ្យប្រជាជនអាចមានលទ្ធភាពចិញ្ចឹមសត្វដ៏កម្រ។ ហើយបើនិយាយពីជាប់ទោសវិញ អ្នកជាប់ទោសមុនគេ អ្នកណា?គឺនាយករដ្ឋមន្រ្តី ហ៊ុន សែន ជាប់ទោសមុនគេ ព្រោះចិញ្ចឹមក្ងោកច្រើនជាងគេ ច្រើនជាងអ្នក(ចិញ្ចឹមក្ងោក)នៅកំពង់ឆ្នាំងទៀត»។ នេះជាការលើកឡើងរបស់សម្ដេច ហ៊ុន សែន ដែលបានបន្ថែមថា កូនប្រុសនិងកូនស្រីសម្ដេច លោក ហ៊ុន ម៉ានិត , លោកស្រី ហ៊ុន ម៉ាលី និងលោក ហ៊ុន តូ ដែលជាក្មួយប្រុសនោះ ក៏មានទោសដែរ បើសិនជាមានការអនុវត្តច្បាប់មែន។
 

បើតាមសម្ដេច ហ៊ុន សែន លោក ហ៊ុន តូ ចិញ្ចឹមសត្វព្រៃប្រភេទកម្រច្រើនណាស់ ក្រៅពីក្ងោក ក៏មានសត្វកេងកងផងដែរ។ តែយ៉ាងណាលោកនាយករដ្ឋមន្រ្តី មើលឃើញថា ការចិញ្ចឹមសត្វដ៏កម្រទាំងនេះ សុទ្ធតែនាំមកផលវិជ្ជមាន ទើបបញ្ជាឱ្យមានការកែប្រែច្បាប់ ដើម្បីសម្រួលការចិញ្ចឹមរបស់ពលរដ្ឋ។