កូនផ្សោតទម្ងន់ប្រហែល១០គីឡូក្រាម ប្រវែង១ម៉ែត្រ ត្រូវបានក្រុមការងារប្រទះឃើញកំពុងហែលជាមួយផ្សោតមួយហ្វូងដែលមានចំនួនប្រមាណ៧- ៨ក្បាល នៅកន្លែងអភិរក្សអន្លង់កាំពី ត្រង់ចំណុចគោលខ្ពស់ ភូមិកាំពី ឃុំសំបុក ស្រុកចិត្របុរី ខេត្តក្រចេះ។ 

 

ក្រុមជំនាញ បានអះអាងថា កូនផ្សោតថ្មីនេះ អាចកើតនៅថ្ងៃទី២៧ -២៨ ខែកុម្ភៈ ឆ្នាំ២០២៣។ ជាមួយគ្នានេះ កូនផ្សោតកើតថ្មីអាចមានពីរក្បាល ប៉ុន្ដែមួយក្បាលទៀត ក្រុមការងារមិនទាន់អាចថតបាននៅឡើយ ទើបបញ្ជាក់ត្រឹមមួយក្បាលសិន។ 

 

ជាមួយវត្តមានសត្វផ្សោតថ្មីនេះ ប្រធានអង្គការWWF លោក សេង ទៀក បានលើកឡើងថា កាលណាតំបន់ជាជម្រកផ្សោតកាន់តែមានសុវត្ថិភាព នោះចំនួនរបស់វាមានកាន់តែច្រើននៅក្នុងធម្មជាតិ។ ជាមួយគ្នានេះកត្តាចំណីអាហារ និងការអនុគ្រោះពីធម្មជាតិ ក៏ជាផ្នែកមួយសំខាន់ដែរ៕