អន្តរជាតិ
លោក ប្លីងខិន និងលោក ឡាវរ៉ូវ ឆ្លើយឆ្លងគ្នានាកិច្ចប្រជុំនៅឥណ្ឌា
× អំឡុងវេទិកាសន្តិសុខនៅទីក្រុងញូវដេលីនាថ្ងៃទី៣ ខែមីនា រដ្ឋមន្ត្រីការបរទេសរុស្ស៊ី ស៊ែហ្គេយ៍ ឡាវរ៉ូវ និងសមភាគីអាម៉េរិក អាន់តូនី ប្លីងខិន បានតតាំងសម្ដីគ្នាយ៉ាងខ្លាំង ក្រោយទើបជួបជជែកគ្នាមួយភ្លែតនោះ។ លោក ឡាវរ៉ូវ ចោទអាមេរិកថា អនុវត្តស្ដង់ដារពីរ ក្រោយប្រមុខការទូតអាមេរិកនិយាយថា រុស្ស៊ីមិនត្រូវទទួលបានការអនុញ្ញាតឱ្យធ្វើសង្គ្រាមនៅអ៊ុយក្រែនតាមតែចិត្ត និងមិនទទួលទណ្ឌកម្មនោះឡើយ។
ឆ្លៀតពេលប្រជុំរដ្ឋមន្ត្រីការបរទេសនៃក្រុមប្រទេសសេដ្ឋកិច្ចរីកចម្រើនទាំង ២០ (G20) នៅឥណ្ឌា ប្រមុខការទូតអាម៉េរិក និងរុស្ស៊ីក៏ឆ្លៀតជួបគ្នាប្រមាណ១០នាទី តែមិនមានលទ្ធផលអ្វីទេ។ ក្រោយជួបមុខគ្នាដោយផ្ទាល់ កម្ដៅក៏កើនជាថ្មី។
«ប្រសិនបើយើងអនុញ្ញាតដោយគ្មាននិទណ្ឌភាពហើយរុស្ស៊ីធ្វើអ្វីដែលខ្លួនកំពុងធ្វើនៅអ៊ុយក្រែននោះជាសារមួយទៅកាន់អ្នកឈ្លានពានគ្រប់ទីកន្លែងដែលពួកគេអាចនឹងអាចគេចផុតពីវា (ទណ្ឌកម្ម) ផងដែរ»។ លោក អាន់តូនី ប្លីងខិន ប្រាប់វេទិកាកិច្ចការយុទ្ធសាស្ត្រ Raisina Dialogue បែបនេះ។
ថ្លែងនៅឯវេទិកានេះបន្ទាប់ពីលោក ប្លីងខិន លោក ឡាវរ៉ូវ និយាយថា វាជាស្តង់ដារពីរដើម្បីចោទសួរពីសកម្មភាពរបស់រុស្ស៊ីនៅអ៊ុយក្រែននៅពេលដែលអាមេរិកបានលើកឡើងពីការគំរាមកំហែងដល់ផលប្រយោជន៍ជាតិរបស់ខ្លួនដើម្បីបង្ហាញអំពីភាពត្រឹមត្រូវនៃអន្តរាគមន៍យោធានៅក្នុងផ្នែកផ្សេងៗនៃពិភពលោករួមទាំងសង្គ្រាមនៅអ៊ីរ៉ាក់ ការវាយប្រហារតាមអាកាសនៅលីប៊ី និងការទម្លាក់គ្រាប់បែកនៅយូហ្គោស្លាវី ក្នុងអំឡុងពេលជម្លោះឆ្នាំ១៩៩៩។
លោក ឡាវរ៉ូវ ក៏និយាយផងដែរថា សំណួរអំពីពេលណាដែលរុស្ស៊ីនឹងចរចាបញ្ចប់សង្គ្រាមគួរតែចោទសួរទៅប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី វិញ។
នៅឯកិច្ចប្រជុំ G20 អាមេរិក និងសម្ព័ន្ធមិត្តបានអំពាវនាវឱ្យប្រទេសសមាជិកបន្តដាក់សម្ពាធលើរុស្ស៊ីឱ្យបញ្ចប់ជម្លោះ ប៉ុន្តែ G20 មិនអាចយល់ព្រមលើសេចក្តីថ្លែងការណ៍រួមបានឡើយ ដោយសារតែមានការប្រឆាំងពីចិន និងរុស្ស៊ី។
រដ្ឋមន្ត្រីការបរទេសរុស្ស៊ីបានបន្តចោទក្រុងវ៉ាស៊ីនតោនពីការព្យាយាមធ្វើឱ្យសម្ព័ន្ធកិច្ចសន្ទនាដៃគូសន្តិសុខចតុភាគី (Quad) មានអាមេរិក អូស្ត្រាលី ឥណ្ឌា និងជប៉ុនទៅជាសម្ព័ន្ធភាពយោធា ខណៈក្រុមនេះផ្តោតលើបញ្ហាយុទ្ធសាស្ត្រនៅក្នុងតំបន់ឥណ្ឌូ-ប៉ាស៊ីហ្វិក៕
© រក្សាសិទ្ធិដោយ thmeythmey.com