អ្នកសម្របសម្រួលអាជីវកម្ម នៃអង្គការអាគ្រីស៊ុត កញ្ញា តាន់ ឌីណារី ប្រាប់ថា ដើមឡើយអង្គការនេះ គាំទ្រកសិករលើការកែច្នៃស្រាចេញពីស្វាយទុំប៉ុណ្ណោះ តែក្រោយមកអតិថិជនស្នើឱ្យមានស្រាស ទើបអង្គការបានពង្រីកវិសាលភាព និងផ្តល់បច្ចេកទេសដល់អ្នកភូមិដើម្បីផលិតស្រាស។ 

 

 

 

ពលរដ្ឋនៅស្រុកបន្ទាយស្រីប្រមាណ២០គ្រួសារ ត្រូវបានចងក្រងលើផលិតកម្មស្រាស និងស្រាស្វាយ។ កញ្ញា ឌីណារី បានឱ្យដឹងថា៖«ស្រានេះជាប្រភេទស្រាបិត វាមានលក្ខណៈពិសេសខុសពីស្រាដទៃ គឺធ្វើជាស្រាបន្ទំ ដូចស្រាស្វាយអី គេច្រើនធ្វើជាបន្ទំ ដោយឡែកអង្គការសម្របសម្រួល និងផ្តល់​បច្ចេកទេសជាប្រភេទស្រាបិត»។

 

ក្រៅពីផ្តល់បច្ចេកទេស អង្គការអាគ្រីស៊ុត ក៏បានប្រមូលទិញស្រាមួយផ្នែកពីកសិករអ្នកផលិតវិញដែរ និងយកមកបិតម្ដងទៀត ដើម្បីដកយកជាតិពុលបន្ថែមពីក្នុងស្រានោះ។ មន្រ្តីអង្គការអាគ្រីស៊ុតបញ្ជាក់ថា ការគាំទ្រនេះដើម្បីលើកកម្ពស់គុណភាពផលិត ក៏ដូចជារួមចំណែកអភិរក្សប្រពៃណីបិតស្រា ដែលជាប្រពៃណីខ្មែរដ៏យូរលង់មក ហើយអង្គការមិនផ្តោតខ្លាំងលើការផលិតទេ ព្រោះស្រាមាន ផលប៉ះពាល់ដល់សុខភាពជាទូទៅ៕