ព្រឹត្តិការណ៍ពានរង្វាន់ក្លិបកំពូលប្រចាំអឺរ៉ុប UEFA Champions League វគ្គ១៦ ជើងទីពីរចាប់ផ្តើមការប្រកួតចំនួន ២គូក្នុងរាត្រីថ្ងៃទី៧ ខែមីនានេះ ដើម្បីស្វែងរកក្រុមឡើងទៅវគ្គ ៨ក្រុមចុងក្រោយ។ ក្រុម SL Benfica ស្វាគមន៍ក្រុម Club Brugge ខណៈដែល Chelsea កំពុងស្វែងរកកៅអីវគ្គបន្តយ៉ាងតឹងតែងដោយស្វាគមន៍ Borussia Dortmund។
ការប្រកួតជើងទីពីរធ្វើឡើងនៅទឹកដីកីឡដ្ឋាន Estadio da luz ប្រទេសព័រទុយហ្កាល់វេលាម៉ោង ៣យប់រំលងអាធ្រាត្រ (ម៉ោងនៅកម្ពុជា)។ កាលពីជើងទីមួយនៅទឹកដីប្រទេសបែលហ្ស៊ិក ក្រុមភ្ញៀវ Benfica បានយកឈ្នះ Club Brugge លទ្ធផល ២-០ ដែលលទ្ធផលនេះធ្វើឱ្យក្រុមមកពីព័រទុយហ្កាល់មានប្រៀបក្នុងការប្រកួតជើងទីពីរ។
មុនការប្រកួតមកដល់ Benfica ជាម្ចាស់ផ្ទះបានឆ្លងកាត់ការប្រកួតចំនួន ៤លើករួចមកហើយ ដោយទទួលបានជ័យជម្នះជាបន្តបន្ទាប់ ដើម្បីជំរុញទឹកចិត្តពួកគេប្រជែងក្នុងពាន UCL នេះ។ ចំណែក Club Brugge វិញឆ្លងកាត់ការប្រកួតចំនួន ៦លើកចុងក្រោយមុនមកដល់ការប្រកួតនេះ ពួកគេរកបានជ័យជម្នះត្រឹមតែ ១លើកប៉ុណ្ណោះ។
ការប្រកួតរវាងក្រុមទាំងពីរនេះនៅជើងទីពីរ ក្លាយជាការប្រកួតទី២ហើយ ដែលក្រុមទាំងពីរមានប្រវត្តិសាស្រ្តជួបគ្នាក្នុងពានរង្វាន់ UCL។ បច្ចុប្បន្ន Benfica កំពុងតែបង្ហាញទម្រង់លេងល្អរបស់ខ្លួនយ៉ាងខ្លាំងទាំងនៅការប្រជែងក្នុងលីគ និងក្របខណ្ឌផ្សេងៗក្នុងប្រទេសព័រទុយហ្កាល់ ស្របពេល Club Brugge ហាក់មានទម្រង់ធ្លាក់ចុះយ៉ាងខ្លាំងនៅរដូវកាលនេះ។
ចំណែកការប្រកួតនៅទឹកដី Stamford Bridge តោខៀវ Chelsea ដែលរងបរាជ័យនៅជើងទីមួយ លទ្ធផល ១-០ នៅទឹកដីប្រទេសអាល្លឺម៉ង់ ត្រូវទទួលស្វាគមន៍ក្រុមគូប្រកួត Borussia Dortmund។
Chelsea ស្ថិតក្រោមការដឹកនាំរបស់លោក Graham Potter បច្ចុប្បន្នកំពុងតែជួបបញ្ហា បើទោះបីជាក្លិបបាននាំចូលកីឡាករថ្មីច្រើនមកចូលរួមក្តី។ ចំណាយលុយច្រើនមិនទាន់រកឃើញប្រសិទ្ធភាពនៅឡើយង ខណៈ Chelsea នឹងឆ្លងកាត់ការប្រកួតដ៏តានតឹងទល់ Dortmund ជើងខ្លាំងមកពីអាល្លឺម៉ង់ថែមទៀត។
កាលពីជើងទីមួយកីឡាករ Karim Adeyemi បានស៊ុតគ្រាប់បាល់មួយគ្រាប់បានកែប្រែលទ្ធផលការប្រកួតដោយស៊ុតបាល់ចូល ១គ្រាប់នាជំនួបក្នុងកីឡដ្ឋាន Signal Iduna Park កាលពី ៣សប្តាហ៍មុននៃជំនួបជើងទីមួយជួយឱ្យ Dortmund មានប្រៀបខ្លាំងជាងលើ Chelsea។
ការប្រកួតនៅទឹកដីអង់គ្លេស Chelsea ឆ្លងកាត់ ៦ប្រកួតចុងក្រោយមកនេះរកបានជ័យជម្នះទើបតែម្តងប៉ុណ្ណោះដោយកាលពីថ្ងៃទី៤ ខែមីនា ឈ្នះ Leeds United លទ្ធផល ១-០។
កៅអីគ្រូបង្វឹកនៅក្លិបតោខៀវរបស់លោក Graham Potter កំពុងតែមានកម្តៅខ្លាំងក្រោយដឹកនាំក្រុមមិនបានល្អ បើទោះបីក្រុមបានចាយលុយនាំយកកីឡាករល្អៗជាច្រើនមកចូលរួមក្រុម។ ការប្រកួតទល់ Dortmund នៅ UCL លើកនេះអាចក្លាយជាការពិសោធន៍ចុងក្រោយសម្រាប់សមត្ថភាពដឹកនាំរបស់លោក Potter៕