លោកស្រី ទ្រី ដាណា ដែលមានគម្រោងចង់ផ្សព្វផ្សាយពីវប្បធម៌នោះ បានបង្ហាញអារម្មណ៍មិនសប្បាយចិត្តចំពោះក្រសួងវប្បធម៌ ដែលទំនងជាខាងក្រសួង តម្រូវឱ្យអនុវត្តតាមក្បួនខ្នាត និងបំពេញបែបបទឱ្យបានត្រឹមត្រូវ ពិសេសទម្រង់នៃការផ្សព្វផ្សាយ ក៏ដូចជាឯកសារពាក់ព័ន្ធជាដើម។
 

ដោយសារការមិនសប្បាយចិត្តនេះហើយ ទើបលោកស្រី ដាណា ដែលគេស្គាល់ថា ជាអ្នកជំនួញគ្រឿងអលង្ការដ៏ធំនេះ ឈានទៅសរសេរលើហ្វេសប៊ុកដូច្នេះ៖«នាងខ្ញុំ សុំលុបចោលគំរោង ដែលផ្សព្វផ្សាយវប្បធម៌ខ្មែរក្នុងថ្ងៃសង្គ្រាន ដែលខ្ទង់ចំណាយ(ជាង10ម៉ឺនដុល្លារ បញ្ចាក់គឺគ្រាន់តែកម្មវិធី វប្បធម៌១ប៉ុណ្ណោះមិនរាប់បញ្ជូលកម្មវិធីផ្សេងៗទេ) ចោលហើយ ដោយសារគ្រាន់តែសុំច្បាប់ថតរូបបែបប្រពៃណីនិង វប្បធម៌នៅអង្គរ២ឈុតសោះវេទនាដូចទៅសុំភ្លើងយក្ស ខ្ញុំខ្ជិលណាស់ ព្រោះកម្មវិធីរបស់ខ្ញុំគឺខ្ញុំចំណាយលុយរបស់ខ្ញុំផ្ទាល់គ្មានទទួល ឧបត្ថម្ភមកពីណាទេ គ្រាន់តែចង់អោយកូនខ្មែរជំនាន់ក្រោយមានការចងចាំមួយប៉ុណ្ណោះ»។
 

ក្រោយសំណេររបស់លោកស្រី ទ្រី ដាណា ផុសឡើងបែបនេះ ក៏មានអ្នកចែករំលែកបន្តជិត២ពាន់នាក់លើបណ្ដាញសង្គមហ្វេសប៊ុក រហូតដល់សម្ដេចនាយករដ្ឋមន្ត្រី ហ៊ុន សែន បានមើលឃើញ ហើយចេញសារពិសេសណែនាំប្រាប់ទៅលោកស្រី ទ្រី ដាណា វិញ។
  

សម្រាប់សម្ដេច ហ៊ុន សែន គាំទ្រចំពោះទង្វើរ និងសកម្មភាពរបស់ក្រសួងវប្បធម៌ ។ សម្ដេច បានសង្កត់ធ្ងន់ថា ការងារវប្បធម៌ មិនមែនចេះតែធ្មេចភ្នែក ឬបើកភ្នែកនោះទេ ពោលគឺត្រូវអនុវត្តតាមក្បួនខ្នាត នៃទំនៀមទម្លាប់ ប្រពៃណីវប្បធម៌ឱ្យបានត្រឹមត្រូវ។
 

ត្រង់ចំណុចនេះ ប្រមុខរដ្ឋាភិបាល ព្យាយាមពន្យល់ទៅលោកស្រី ទ្រី ដាណា ថា បើជាការថតឈុតឆាកសម្ដែងនោះ ប្រើប្រាស់សម្លៀកបំពាក់ ការតុបតែង រូបចម្លាក់ ឬរូបបដិមា ដែលវាមិនមែនជាទម្រង់ដើមរបស់ខ្មែរនោះ វានឹងធ្វើឱ្យខូចវប្បធម៌ជាតិជាមិនខាន។
 

«ការបង្ហាញវប្បធម៌ សិល្បៈខ្មែរ ទៅកាន់ក្មេងៗជំនាន់ក្រោយ គឺជារឿងល្អ ក៏ប៉ុន្តែប្រសិនការបង្ហាញនោះ មិនបានត្រឹមត្រូវតាមក្បួនខ្នាត វាស្មើនឹងការបំផ្លាញនូវវប្បធម៌ខ្មែរទៅវិញ ។ ដូច្នេះខ្ញុំសូមឱ្យយកចិត្តទុកដាក់ ជាពិសេសបញ្ហាទម្រង់ ត្រូវតែអនុវត្តឱ្យខាងតែបាន តាមការណែនាំរបស់ក្រសួងវប្បធម៌ និងវិចិត្រសិល្បៈ»។ នេះបើតាមសម្ដេច ហ៊ុន សែន ដែលបានប្រាប់លោកស្រី ដាណា ទៀតថា រដ្ឋមន្រ្តីវប្បធម៌ គឺមានភារកិច្ចធំណាស់ ក្នុងការការពារ និងថែរក្សាវប្បធម៌ជាតិ ជាពិសេសត្រូវទទួលខុសត្រូវចំពោះមុខនាយករដ្ឋមន្រ្តីផ្ទាល់តែម្ដង។