អន្តរជាតិ
នយោបាយអន្តរជាតិ
អាម៉េរិកព្រមាន កូរ៉េខាងជើង នឹងរងផលវិបាកខ្លាំងឡើង បើមិនប្តូរទង្វើបស់ខ្លួន លោក Ned Price អ្នកនាំពាក្យក្រសួងការបរទេសអាម៉េរិក។ រូបភាព AFP
× កូរ៉េខាងជើង នឹងបន្តប្រឈមផលវិបាកខ្លាំងឡើង រហូតទាល់តែមានការផ្លាស់ប្តូរកាយវិការរបស់ខ្លួន។ អ្នកនាំពាក្យក្រសួងការបរទេសអាម៉េរិក លោក Ned Price បានបញ្ជាក់បែបនេះ នៅថ្ងៃទី៩ ខែមីនា។ ការអះអាងរបស់លោក Ned Price ធ្វើឡើងក្រោយកូរ៉េខាងជើង បានបាញ់មីស៊ីលបាលីស្ទិកមួយគ្រាប់ជាថ្មីទៅសមុទ្រលឿង។
កូរ៉េខាងជើង នៅថ្ងៃទី៩ ខែមីនា បានបាញ់មីស៊ីលប៉ាលីស្ទិកចម្ងាយខ្លីមួយគ្រាប់ទៅក្នុងសមុទ្រលឿន។ នេះជាការបាញ់មីស៊ីលប៉ាលីស្ទិកលើកទី៤ នៅក្នុងឆ្នាំ២០២៣ ខណៈពេលអាម៉េរិក និងកូរ៉េខាងត្បូង តែងធ្វើសមយុទ្ធយោធារួមគ្នាជាញឹកញាប់។
ក្រោយការបាញ់មីស៊ីលខាងលើ រដ្ឋាភិបាលក្រុងវ៉ាស៊ីនតោន បានបន្តប្តេជ្ញាក្នុងការការពារសម្ព័ន្ធមិត្តរបស់ខ្លួន។ លើសពីនេះ អាម៉េរិក ក៏បានព្រមានកូរ៉េខាងជើងផងដែរ ប្រសិនបើមិនផ្លាស់ប្តូរកាយវិការបង្ករឿងរបស់ខ្លួន។
«យើងនឹងស្វះស្វែងជាមួយដៃគូរបស់យើងនៅជុំវិញពិភពលោក...ដើម្បីធ្វើឱ្យប្រាកដចំពោះកូរ៉េខាងជើង ដែលផលវិបាក នឹងបន្តកើនឡើងទាល់តែប្រទេសមួយនេះ មានការផ្លាស់ប្តូរកាយវិការរបស់ខ្លួន»។ លោក Ned Price បានសង្កត់ធ្ងន់បែបនេះ នៅក្នុងសន្និសីទសារព័ត៌មាន នៅថ្ងៃទី៩ ខែមីនា ដោយបន្តថា ក្រុងវ៉ាស៊ីនតោន ចង់ឃើញក្រុងព្យុងយ៉ាងផ្លាស់ប្តូរកាយវិការរបស់ខ្លួនទៅរកកិច្ចចរចា និងការទូត។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ត្រង់ចំណុចនេះ អ្នកនាំពាក្យក្រសួងការបរទេសអាម៉េរិកជឿថា មានតែការចរចាប៉ុណ្ណោះ ដែលជួយឱ្យមានដំណើរការពិតប្រាកដ ដើម្បីឈានទៅរកការរំសាយកម្មវិធីនុយក្លេអ៊េររបស់កូរ៉េខាងជើង។ ក្នុងសន្និសីទដដែលនោះ លោក Price ក៏បានរិះគន់ក្រុងព្យុងយ៉ាង ដែលបានបាញ់មីស៊ីល ក្នុងពេលថ្មីៗនេះផង។
បើតាមលោក Price ការបាញ់មីស៊ីលរបស់ក្រុងព្យុងយ៉ាងជាការបំពានសេចក្តីសម្រេចរបស់ក្រុមប្រឹក្សាសន្តិសុខ និងបង្កការគំរាមកំហែងដល់ប្រទេសជិតខាង និងសហគមន៍អន្តរជាតិ។ យ៉ាងណាក៏ដោយ អាម៉េរិកនៅតែសន្យារក្សាកិច្ចចរចាជាមួយកូរ៉េខាងជើង។
តាមការចុះផ្សាយរបស់ទីភ្នាក់ងារព័ត៌មានKCNA លោកគីម ជុងអ៊ុន មេដឹកនាំកូរ៉េខាងជើង បានចុះត្រួតពិនិត្យកងកម្លាំងកាំភ្លើងធំ Hwasong រួមទាំងការត្រួតពិនិត្យលើការបាញ់មីស៊ីលហ្វឹកហាត់ ដើម្បីបំផ្លាញអាកាសយានដ្ឋានសត្រូវថែមទៀត៕
Tag:
អាម៉េរិក
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com