ព្រឹត្តិការណ៍សហគមន៍ក្រោមទម្រង់ជាពិព័រណ៍ការងារសិល្បៈនេះ ត្រូវបានរៀបចំដោយសិល្បករ ទូតសុឆន្ទៈយុវជនច្នៃប្រឌិត៥រូប ដែលមានបទពិសោធន៍ក្នុងវិស័យសិល្បៈនេះយ៉ាងតិច៥ឆ្នាំ។ សិល្បករទាំងនោះរួមមាន លោក សេម រ៉កឃើ ជាអ្នកចម្រៀង និពន្ធចម្រៀង និងអ្នកនិយាយជាសាធារណៈ, លោក ប៉ុក សំបូរ អ្នកដឹកនាំផ្នែកតុបតែងឆាក ក្នុងវិស័យភាពយន្ត, អ្នកស្រី នាក់ សុផល អ្នកថតរូប, លោក នរោត្ដម រ៉េតវិរៈបុត្រ វិចិត្រករផ្នែកបុរាណនិងសម័យ និងកញ្ញា អែម បញ្ញាទេព អ្នកនិពន្ធ។ 

កម្មវិធីដែលប្រព្រឹត្តទៅនៅសាលពហុបំណង(Kampus) រាជធានីភ្នំពេញនេះ គឺមានការរៀបចំសកម្មភាពដូចជា ការសម្ដែងសិល្បៈ ការចែករំលែកបទពិសោធតែងនិពន្ធ ការថតរូប ការគូរគំនូរ ការបង្ហាញពីដំណើរការនៃការតុបតែងឆាក ការតាំងបង្ហាញស្នាដៃសិល្បៈ និងកិច្ចពិភាក្សាពីសិល្បៈ។ 
 

លោក ប៉ុក សំបូរ រំពឹងថាបន្ទាប់ពីបច្ចុប្បន្នព្រឹត្តិការណ៍សហគមន៍សិល្បៈនេះ គឺលោកក៏ដូចជាសិល្បករឯទៀត ចង់ឃើញយុវជនដែលជាអ្នកបន្តវេនសិល្បៈជំនាន់ក្រោយ កាន់តែមានចំនួនកើនឡើង និងចង់ឃើញរដ្ឋាភិបាលកម្ពុជាបញ្ជ្រាបសិល្បៈ ទៅក្នុងការអបរំតាំងពីថ្នាក់បឋមសិក្សា។ លោកមានគំនិតសុទិដ្ឋិនិយមថា សិល្បៈ ការជាផ្នែកមួយក្នុងការចូលរួមលើកកម្ពស់សេដ្ឋកិច្ចជាតិផងដែរ។ 
 

គួរជម្រាបផងដែរថា ទូតសុឆន្ទៈយុវជនច្នៃប្រឌិតនេះ គឺជាយុវជនមួយក្រុម នៃអង្គការ The Sound Initiatives (TSI) ដែលបានបង្កើតឡើងដើម្បីកសាងភាពជាអ្នកដឹកនាំ និងលើកកម្ពស់កិច្ចសន្ទនា រវាងយុវជន និងតំណាងរាជរដ្ឋាភិបាលកម្ពុជា ក្នុងការចូលរួមដោះស្រាយបញ្ហាប្រឈមនានា ដែលអ្នកធ្វើការក្នុងវិស័យឧស្សាហកម្មកែច្នៃកំពុងជួបប្រទះ៕