ថ្លែងក្រោយបញ្ចប់ព្រឹត្តិការណ៍បុណ្យទន្លេលើកទី៧ នៅខេត្តកំពង់ធំ លោក វ៉ាត់ ចំរើន មើលឃើញពីសន្ទស្សន៍អ្នកចូលរួមលេងកីឡាច្រើនក្នុងខេត្តកំពង់ធំ។ តាមអ្វីដែលបានមើលឃើញនៅបុណ្យទន្លេ នាពេលអានាគតអគ្គលេខាធិការ CAMSOC សង្ឃឹមថា ខេត្តមួយនេះនឹងផលិតអត្តពលិកកាន់តែច្រើនថែមទៀត។
  

 

«យើងសង្ឃឹមថាវិស័យកីឡានៅខេត្តកំពង់ធំ នឹងមានការីកចំរើនបន្តទៀត។ ហើយយើងក៏សង្ឃឹមថានឹងទទួលបានអ្នកដែលមានទេពកោសល្យច្រើន ចេញពីខេត្តកំពង់ធំផងដែរ»។ នេះជាការអះអាងរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២។
 

លោកអគ្គលេខាធិការ ជឿជាក់ថា ការយកចិត្តទុកដាក់ពីថ្នាក់ដឹកនាំខេត្ត ក៏ដូចជាមន្រ្តីពាក់ព័ន្ធ នឹងជំរុញឱ្យខេត្តកំពង់ធំ សំបូរធនធានកីឡាករច្រើនឡើង។
 

បុណ្យទន្លេលើកទី៧ នៅខេត្តកំពង់ធំ ប្រារព្ធធ្វើឡើងពីថ្ងៃទី៨-១០ ខែមីនា ដែលមានការបង្ហាញកីឡាថ្មី២ប្រភេទគឺ កីឡាបាល់ទាត់ឆ្នេរខ្សាច់ និងបាល់ទាត់លើតុ(Teqball) ក្រៅពីនោះក៏មានការប្រកួតកីឡាបាល់ទះឆ្នេរខ្សាច់ រត់ប្រណាំង និងប៉េតង់ផងដែរ៕