ទូតបារាំងប្រចាំនៅកម្ពុជា បានធ្វើពិធី ៥០០ថ្ងៃមុនព្រឹត្តិការណ៍ប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស ប្រទេសបារាំង នាព្រឹកថ្ងៃទី១៤ ខែមិនា ឆ្នាំ២០២៣។ ពិធីនេះ ធ្វើនៅពហុកីឡដ្ឋានជាតិអូឡាំពិក ដោយមានការចូលរួមជាពីអធិបតីភាពលោក Jacques Pellet និងលោក ហង់ ជួន ណារ៉ុន។
 

 

អគ្គរដ្ឋទូតបារាំងរូបនេះ បានថ្លែងប្រាប់ពីគោលបំណង នៃការរៀបចំកម្មវិធីនេះថា លោកចង់ឲ្យព្រឹត្តិការណ៍អន្ដរជាតិមួយនេះ ក្លាយជាឱកាសនៃការពង្រឹង ទំនាក់ទំនងមិត្តភាពកម្ពុជា-បារាំង។ ម្យ៉ាងវិញទៀត វា ក៏ជាឱកាសសម្រាប់បញ្ជ្រាប សកម្មភាពកីឡាទៅដល់ក្មេងៗ ដោយរាប់បញ្ចូលនូវសាមគ្គីភាព ​បរិយាបន្ន និងផ្នត់គំនិត ដែលជឿថាមនុស្សគ្រប់គ្នា គឺអាចលេង និងចូលរួមក្នុងសកម្មភាពកីឡាបាន។ ចំណុចសំខាន់ មួយទៀតក្នុងថ្ងៃទី១៤ ខែមីនានេះ គឺពហុកីឡដ្ឋានជាតិអូឡាំពិក ជាហេដ្ឋរចនាសម្ព័ន្ធកីឡាមួយ បង្ហាញពីនិមិត្តសញ្ញាមិត្តភាពកម្ពុជា-បារាំង។ ជាពិសេសវា ក៏ជាការរម្លឹកទៅដល់អតីតកាលឆ្នាំ ១៩៦៦ លោក Charles De Gaulle អតីតប្រធានាធិបតីបារាំង បានថ្លែងសុន្ទរកនាពិធី សម្ពោធទីតាំងកីឡដ្ឋានអូឡាំពិកមួយនេះ។ 
 

ក្នុងឱកាសនេះដែរ លោក ហង់ ជួន ណារ៉ុន ក៏បានថ្លែងប្រាប់ទាំងសេចក្ដីរីករាយថា នេះ គឺជាឱកាសសម្រាប់រូបលោក ចូលរួមកោតសរសើរ ដល់អត្ដពលិកកម្រិតខ្ពស់ អត្ដពលិកអាជីព និងអត្ដពលិកផ្សេងទៀត។ រដ្ឋមន្ដ្រីអប់រំរូបនេះ ជឿថាសកម្មភាពកីឡា មានសារសំខាន់សម្រាប់អប់រំយុវជន និងប្រជាពលរដ្ឋទាំងអស់។ 

 

«ទោះបីជាព្រឹត្តិការណ៍ថ្ងៃនេះ មិនមានភាពប្រកួតប្រជែងក៏ដោយ ប៉ុន្ដែខ្ញុំ នៅតែចង់និយាយអំពីស្មារតីនៃការគោរពចំពោះដៃគូប្រកួតរបស់ខ្លួន ការខិតខំប្រឹងប្រែង ការយកឈ្នះលើខ្លួនឯង ភាពក្លាហាន និងចំណង់ចំណូលចិត្ត។ នេះ គឺជាគុណតម្លៃ មិនត្រឹមតែក្នុងសង្វៀនកីឡាទេ ប៉ុន្ដែក៏មានក្នុងសង្គមទាំងអស់ នៅគ្រប់វ័យ និងនៅគ្រប់បុគ្គលផងដែរ។ កីឡា មានសមត្ថភាព មិនអាចកាត់ថ្លៃបាន គឺបង្រៀន និងលើកតម្កើងស្មារតី។»។ លោក ហង់ជួន ណារុន បានថ្លែងដូច្នេះ។
 

គួរបញ្ជាក់ផងដែរថា ព្រឹត្តិការណ៍កីឡាអូឡាំពិក និងប៉ារ៉ាឡាំពិកនៅទីក្រុងប៉ារីសឆ្នាំ ២០២៤ នឹងក្លាយជាព្រឹត្តិការណ៍ដ៏ធំបំផុតមិនធ្លាប់មាននៅក្នុងប្រទេសបារាំង។ ព្រឹត្តិការណ៍នេះ នឹងប្រព្រឹត្តទៅចាប់ពីថ្ងៃទី ២៦ ខែកក្កដា ដល់ថ្ងៃទី១១ ខែសីហា ឆ្នាំ ២០២៤៕