អន្តរជាតិ
នាយករដ្ឋមន្ត្រីអូស្ត្រាលី ធ្វើដំណើរនៅហ្វីជីដើម្បីផ្ដល់ការធានាទាក់ទងនាវាមុជទឹកនុយក្លេអ៊ែរ លោក អាន់តូនី អាល់បានីស ជួបជាមួយនាយករដ្ឋមន្ត្រីហ្វីជី Sitiveni Rabuka។ រូបថត AFP
× ចេញពីអាម៉េរិក នាយករដ្ឋមន្ត្រីអូស្ត្រាលី អាន់តូនី អាល់បានីស បានទៅហ្វីជីថ្ងៃទី១៥ខែមីនាដើម្បីផ្ដល់ការធានាជុំវិញកម្មវិធីនាវាមុជទឹកដើរដោយថាមពលនុយក្លេអ៊ែរដែលមានតម្លៃ២៤៥ពាន់លានដុល្លារដែលនឹងមិនបំពានលើការសន្យាមិនរីកសាយភាយនុយក្លេអ៊ែរឡើយ។
អូស្ត្រាលី ជាភាគីមួយនៃសន្ធិសញ្ញាគ្មាននុយក្លេអ៊ែរជាមួយប្រទេសនៅតំបន់ប៉ាស៊ីហ្វិកខាងត្បូងចំនួន១២ផ្សេងទៀតរួមទាំងហ្វីជីដែលស្ថិតក្នុងតំបន់ដែលមានហានិភ័យផ្នែកនុយក្លេអ៊ែរ ដោយសារឥទ្ធិពលនៃការធ្វើតេស្តអាវុធនុយក្លេអ៊ែរដោយអាមេរិក និងបារាំងនាពេលកន្លងមក។ បច្ចុប្បន្ន តំបន់នេះក៏ត្រូវមើលឃើញថា ជាទីតាំងប្រទាញប្រទង់រវាងអាមេរិក និងចិនជុំវិញមហិច្ឆតារបស់ក្រុងប៉េកាំងក្នុងការបង្កើនវត្តមានសន្តិសុខ។
ក្នុងទស្សនកិច្ចនៅទីក្រុងស៊ូវ៉ា លោក អាន់តូនី អាល់បានីស ជួបជាមួយនាយករដ្ឋមន្ត្រីហ្វីជី Sitiveni Rabuka ដើម្បីពិភាក្សាពីបញ្ហាសន្តិសុខក្នុងតំបន់ បន្ទាប់ពីអូស្ត្រាលីទើបទទួលបានផែនការនាវាមុជទឹកដើដោយថាមពលនុយក្លេអ៊ែរជាមួយជាមួយអាមេរិក និងចក្រភពអង់គ្លេស។
លោក Rabuka បានកោតសរសើលោក អាល់បានីស ចំពោះការជួយជ្រោមជ្រែងហ្វីជីលើការឆ្លើយតបជំងឺកូវីដ-១៩ កិច្ចសហប្រតិបត្តិការផ្នែកយោធានិងសន្តិសុខ សេដ្ឋកិច្ច គំនិតផ្ដួចផ្ដើមសកម្មភាពអាកាសធាតុ ការការពារមហាសមុទ្រ និងបរិស្ថានជាដើម។ នេះបើតាមសេចក្ដីថ្លែងការណ៍របស់រដ្ឋាភិបាលហ្វីជី។
បើតាមមន្ត្រីការពារជាតិរបស់អូស្ត្រាលី អូស្ត្រាលីពិតជាត្រូវកងនាវាមុជទឹកនុយក្លេអ៊ែរជាចាំបាច់ ដើម្បីទប់ទល់ឥទ្ធិពលចិនក្នុងតំបន់ប៉ាស៊ីហ្វិក។ យ៉ាងណាមិញ ប្រេសិតពិសេសចិនប្រចាំតំបន់កោះប៉ាស៊ីហ្វិកលោក Qian Bo ក្នុងខែនេះស្វែងរកការគាំទ្រពីប្រទេសនានាក្នុងតំបន់មានហ្វីជី វ៉ានូទូ ប៉ាពូអាស៊ីនូវែលហ្គីណេ និងកោះសូឡូម៉ុនសម្រាប់ការហ្វឹកហាត់ផ្នែកសន្ដិសុខ៕
© រក្សាសិទ្ធិដោយ thmeythmey.com