ក្រសួង តម្រូវឱ្យតាមគ្រឹះស្ថានអប់រំទាំងអស់ រៀបចំយន្តការឱ្យសិស្សចូលអាន និងសិក្សាស្រាវជ្រាវសៀវភៅក្នុងបណ្ណាល័យ ដោយចែកវេន ឬរៀបកាលវិភាគឱ្យបានច្បាស់លាស់។ ទន្ទឹមនឹងនោះ គ្រូបន្ទុកថ្នាក់ ឬគ្រូឯកទេសតាមមុខវិជ្ជា ត្រូវយកចិត្តទុកដាក់លើការចូលអានរបស់សិស្ស និងចែករំលែកចំណេះដឹងដល់សិស្ស។ លើសពីការអានសៀវភៅ សិស្សក៏អាចខ្ចី និងបំផុសឱ្យមានការជាវសៀវភៅ យកទៅអាននៅផ្ទះបាន។ ចំណែក គូ្រ ក៏អាចដាក់ចំណោទបញ្ហា ដូចជាសំណួរ ឬលំហាត់ សម្រាប់ត្រួតពិនិត្យ កែលម្អនាពេលបន្ទាប់ផងដែរ។
 

ជាមួយគ្នានេះ អង្គភាពពាក់ព័ន្ធក្នុងវិស័យអប់រំ ត្រូវជំរុញ និងវាយតម្លៃ លើការសិក្សាខ្លឹមសារវប្បធម៌ អរិយធម៌ខ្មែរ ឱ្យបានហ្មត់ចត់ និងមានប្រសិទ្ធភាព ដូចជា ការចេញវិញ្ញាសាប្រឡងប្រចាំខែ ប្រឡងឆមាស និងប្រឡងថ្នាក់ជាតិ ក្នុងមុខវិជ្ជាភាសាខ្មែរនិង អក្សរសាស្ត្រខ្មែរ និងសិក្សាសង្គមជាដើម។ នេះបើតាមក្រសួងអប់រំ។
 

បន្ថែមពីនេះ នាយកដ្ឋានអភិវឌ្ឍកម្មវិធីសិក្សា ត្រូវរៀបចំគម្រោងថវិកា ដើម្បីឆ្លើយតបទៅនឹងតម្រូវការជាក់ស្ដែងរបស់គ្រឹះស្ថានសិក្សាសាធារណៈមួយចំនួន ដែល គ្មានលទ្ធភាពដើម្បីបម្រើឱ្យការសិក្សាទាន់ពេលវេលា និងមានប្រសិទ្ធភាព។ ជាពិសេសត្រូវសហការជាមួយអង្គភាព និងស្ថាប័នពាក់ព័ន្ធ ដៃគូអភិវឌ្ឍនានា ដោយកៀរគររកមូលនិធិ ដើម្បីទ្រទ្រង់ និងបម្រើឱ្យការសិក្សាវប្បធម៌ អរិយធម៌ខ្មែរឱ្យមានគុណភាព និង និរន្តរភាព៕