បើតាមសេចក្តីថ្លែងការណ៍របស់ក្រសួងមហាផ្ទៃអេហ្ស៊ីប ហេតុការណ៍នៃការលួច កើតឡើងកាលពីថ្ងៃទី២ ខែមីនា ហើយមន្ត្រីប៉ូលិសបានរកឃើញអត្តសញ្ញាណចោរចំនួន ២នាក់ ដែលចំណោមម្នាក់ ក្នុងនោះជាអតីតសន្តិសុខបរិវេណលំនៅឋានរបស់ ​Salah ផ្ទាល់។
 

យ៉ាងណាទំនិញដែលត្រូវបានលួចរួមមាន ទូរទស្សន៍ ព្រមទាំងមេដាយប្រាក់របស់ Salah នៃការប្រកួត Africa Cup of Nations ត្រូវបានរឹបអូសមកវិញទាំងអស់ ដោយភាគច្រើននៃការលួចនោះគឺជាស្បែកជើងកីឡា។
 

បើតាមការបញ្ជាក់ពីសំណាក់ក្រសួងមហាផ្ទៃអេហ្ស៊ីប បានបញ្ជាក់ប្រាប់ទីភ្នាក់ងារសារព័ត៌មាន Reuters ថា សម្ភារទាំងអស់នោះគឺជារបស់កីឡាករខ្សែប្រយុទ្ធ Mohamed Salah។

ប្រវត្តិនៃការប្រកួតពានរង្វាន់ Africa Cup of Nation កីឡាករវ័យ ៣០ឆ្នាំរូបនេះ បានជួយក្រុមឈានដល់វគ្គផ្តាច់ព្រ័ត្រចំនួន ២លើក ក្នុងឆ្នាំ ២០១៧​ និង ២០២១ ប៉ុន្តែសុទ្ធតែរងបរាជ័យនឹងទទួលត្រឹមចំណាត់ថ្នាក់ជាក្រុមរងជើងឯកតែប៉ុណ្ណោះ។
 

Salah ប្រធានក្រុមជម្រើសជាតិអេហ្ស៊ីប នឹងធ្វើដំណើរទៅកាន់ប្រទេសកំណើតរបស់គេនៅសប្តាហ៍ក្រោយ ខណៈដែលក្រុមជម្រើសជាតិរបស់គេក៏ត្រូវប្រកួតជម្រុះពានរង្វាន់ Africa Cup of Nations ទល់ប្រទេសម៉ាឡាវី សម្រាប់ការប្រកួតជើងទីមួយ ថ្ងៃទី២៤ និងថ្ងៃទី២៨ មីនា ជាការប្រកួតក្រៅទឹកដីវិញម្តង។
 

ដោយឡែកកាលពីសប្តាហ៍មុន Salah បានក្លាយជាកីឡាករប្រចាំ Liverpool ដែលរកបានគ្រាប់បាល់ច្រើនជាងគេបំផុតនៅក្នុង Premier League ជាមួយគ្រាប់បាល់ចំនួន ១២៩គ្រាប់៕