ភ្នំពេញ៖ រដ្ឋបាលរាជធានីភ្នំពេញ បានប្រាប់ឱម្ចាស់រថយន្តធំៗ វាងទៅឆ្លងស្ពានព្រែកសំរោង ដើម្បីបញ្ចៀសការកស្ទះនៅម្ដុំស្ពានអាកាសព្រះមុនីវង្ស។ លើសពីនេះ រថយន្តធំៗ អាចចេញចូលក្រុង ចាប់ពីម៉ោង៨យប់ ដល់៥ព្រឹកតែប៉ុណ្ណោះ។
ដើម្បីបញ្ចៀសការកស្ទះចរាចរណ៍នៅអំឡុងពេលសាងសង់ស្ពានអាកាសព្រះមុនីវង្ស
រដ្ឋបាលរាជធានីភ្នំពេញ បានប្រជុំនិងដាក់ចេញវិធានការដោះស្រាយម្ដងរួមមកហើយ។ ប៉ុន្តែ ស្ថានភាពចរាចរណ៍នៅតែកកស្ទះ ទើបរដ្ឋបាលរាជធានីភ្នំពេញ កំណត់ផ្លូវឱ្យសាធារណាជន បង្វែរទិសដៅធ្វើដំណើរ។
ជុំវិញការបញ្ចៀសការកកស្ទះខាងលើ លោក ឈាង ប៊ុនថា អនុប្រធានមន្ទីរព័ត៌មានរាជធានីភ្នំពេញ បានប្រាប់សារព័ត៌មានថ្មីៗថា រថយន្តធុនធំទាំងអស់ មិនអនុញ្ញាតឱ្យឆ្លងកាត់ស្ពានព្រះមុនីវង្សឡើយ គឺត្រូវវាងទៅឆ្លងស្ពានព្រែកសំរោង ដើម្បីចូលរាជធានីភ្នំពេញ។ ចំពោះការបើករថយន្តធ្ងន់ធំចូលក្រុង លោក ប៊ុនថា បញ្ជាក់ទៀតថា ត្រូវចូលតាមពេលកំណត់ ចាប់ពីម៉ោង៨យប់ ដល់៥ព្រឹក។
ចំពោះប្រជាពលរដ្ឋ ម្ចាស់យានយន្តដែលធ្វើដំណើរចូលរាជធានីភ្នំពេញតាមផ្លូវជាតិលេខ១ ឆ្ពោះទៅមូលដ្ឋានខណ្ឌដង្កោ ខណ្ឌមានជ័យ ខណ្ឌពោធិ៍សែនជ័យ ខណ្ឌជ្រោយចង្វារ ខណ្ឌឫស្សីកែវ ក៏ត្រូវបង្វែរទៅផ្លូវថៃហ្គ័រ តាមស្ពានព្រែកសំរោងចូលរាជធានីភ្នំពេញដែរ។ ក្រៅពីនេះ ម្ចាស់យានយន្តអាច ជិះស្រឡាងនៅកំពង់ចម្លងកោះនរា។
ប្រជាពលរដ្ឋដែលធ្វើដំណើរចូលរាជធានីភ្នំពេញ តាមផ្លូវជាតិលេខ២ ឆ្ពោះទៅ
មូលដ្ឋានខណ្ឌទួលគោក ខណ្ឌ៧មករា ខណ្ឌចំការមន ត្រូវបង្វែរទិសតាមមហាវិថី ហ៊ុន នាង (ផ្លូវ៣០ម៉ែត្រ) និងមហាវិថីសម្ដេច ហ៊ុន សែន (ផ្លូវ៦០ម៉ែត្រ) បត់តាមផ្លូវផ្សារជីបម៉ុង ចេញតាមផ្លូវលេខ ២១៧វិញ។
ចំណែក ការធ្វើដំណើរចេញពីរាជធានីភ្នំពេញ ប្រជាពលរដ្ឋដែលធ្វើដំណើរចេញពីរាជធានីភ្នំពេញ ឆ្ពោះទៅគោលដៅផ្លូវជាតិលេខ២ ទៅខេត្តកណ្តាល ឬមូលដ្ឋានខណ្ឌមានជ័យ និងខណ្ឌដង្កោ ត្រូវបង្វែរទិសតាមផ្លូវលេខ៤៨៨ ឆ្ពោះទៅរង្វង់មូលផ្សារដើមថ្កូវ ឆ្ពោះទៅផ្លូវលេខ២៧១ សំដៅទៅផ្លូវលេខ៣៧១ ឬតាមផ្លូវផ្សារជីបម៉ុង ចេញតាមផ្លូវ ៦០ម៉ែត្រ។ ជាមួយគ្នាដែរ ក៏អាចចេញទៅតាមមហាវិថី ហ៊ុន នាង (ផ្លូវ៣០ម៉ែត្រ)ផងដែរ។
រីឯ ប្រជាពលរដ្ឋដែលធ្វើដំណើរចេញពីរាជធានីភ្នំពេញ ឆ្ពោះទៅគោលដៅផ្លូវជាតិលេខ១
ក្នុងមូលដ្ឋានខណ្ឌច្បារអំពៅ ឬទៅខេត្តកណ្តាល ត្រូវធ្វើដំណើរតាមមហាវិថីព្រះនរោត្តម ហើយឡើងស្ពានអាកាសក្បាលថ្នល់ បត់ត្រលប់ក្រោយរួចឆ្លងស្ពានព្រះមុនីវង្ស។ ក្រៅពីនេះ អ្នកធ្វើដំណើរ ក៏អាចឆ្លងស្រឡាង នៅកំពង់ចម្លងពីកោះពេជ្រ ទៅកោះនរាតែម្ដង ឬឆ្លងស្រឡាងចម្លងសណ្ឋាគារសុខា ទៅកោះនរា។
រដ្ឋបាលរាជធានីភ្នំពេញ សុំការយោគយល់ពីការប្រជាពលរដ្ឋ ជុំវិញការបង្វែរផ្លូវ និងការកកស្ទះចរាចរណ៍ និងស្នើពលរដ្ឋឱ្យចូលរួមសហការ ដើម្បីកាត់បន្ថយការកកស្ទះ៕