ដោយ ហេង ម៉ូលីកា អ្នកស្រាវជ្រាវនៃអង្គការវេទិកាអនាគត
ការរីកចម្រើនផ្នែកបច្ចេកវិទ្យា ការផ្លាស់ប្តូរប្រជាសាស្រ្ត ក៏ដូចជាព្រឹត្តិការណ៍ជាយថាហេតុណាមួយ ដូចជាជំងឺរាតត្បាត Covid-19 បានជះឥទ្ធិពលដល់តម្រួវការជំនាញផ្នែកឌីជីថល កាន់តែខ្លាំងសម្រាប់រដ្ឋសមាជិកនៃសមាគមប្រជាជាតិអាស៊ីអគ្នេយ៍(អាស៊ាន) ដើម្បីឆ្លើយតបនឹងទីផ្សារការងារ ទាំងនាពេលបច្ចុប្បន្ន និងនៅថ្ងៃអនាគត។ ក៏ប៉ុន្តែដើម្បីធ្វើឲ្យតម្រូវការនេះទទួលបានផ្លែផ្កា បណ្តារដ្ឋសមាជិកគប្បីពិចារណាបង្កើតកម្មវិធីឧបត្ថម្ភធនសម្រាប់ទ្រទ្រង់ដល់ការលើកកំពស់ចំណេះដឹងក្នុងវិស័យនេះ។
ជាមួយនឹងការផ្លាស់ប្តូរនេះ ចំណេះ និងជំនាញឌីជីថលបានក្លាយជាគុណសម្បត្តិដែលនិយោជក(ភាគីថៅកែ)ទាមទារជាចាំបាច់មុននឹងផ្តល់ឪកាសដល់អ្នកស្វែងរកការងារ។ អក្ខរកម្មឌីជីថល បានក្លាយទៅជាសមត្ថភាពដែលមិនអាចខ្វះបាននៅកន្លែងការងារនាពេលបច្ចុប្បន្ន។ អក្ខរកម្មឌីជីថល គឺសំដៅលើសមត្ថភាពរបស់បុគ្គលម្នាក់ៗក្នុងការប្រើប្រាស់វេទិកាឌីជីថលប្រកបដោយទំនុកចិត្ត និងស្វ័យភាព ដើម្បីរៀនសូត្រ ធ្វើការទំនាក់ទំនង និងចូលរួមក្នុងសង្គម។
តម្រូវការវិនិយោគលើសមត្ថភាពជំនាញសម្រាប់កម្លាំងពលកម្ម
យោងតាមការស្រាវជ្រាវរបស់អង្គការយូនីសេហ្វ (UNICEF ) នៅឆ្នាំ២០២១ យុវជនភាគច្រើនក្នុងតំបន់អាស៊ានមានសមត្ថភាពឌីជីថលកំរិតមធ្យម។ ការស្រាវជ្រាវដដែលបង្ហាញទៀតថាមានភាពខុសគ្នាយ៉ាងច្រើនគួររឲ្យកត់សម្គាល់រវាងប្រទេសដែលមានការអភិវឌ្ឍន៍តិចតួច និងប្រទេស ដែលមានការអភិវឌ្ឍន៍។ ជាក់ស្តែង ប្រទេសសិង្ហបុរី ដែលមានសេដ្ឋកិច្ចរីកចម្រើនខ្លាំងក្នុងប្លុកអាស៊ាន មានកម្រិតអក្ខរកម្មឌីជីថលខ្ពស់បំផុត ក្នុងនោះ មានយុវជនប្រមាណ ៦២% បានបង្ហាញថាចំណេះដឹងផ្នែកអក្ខរកម្មឌីជីថលរបស់ពួកគេមានកម្រិតល្អប្រសើរ ធៀបនឹងនៅប្រទេសឡាវ ដែលមានយុវជនត្រឹមតែ២៣% និង យុវជនចំនួន២០% នៅប្រទេសមីយ៉ាន់ម៉ា មានចំណេះដឹងផ្នែកឌីជីថល។
យោងតាមការសិក្សាឆ្នាំ ២០១៨ ស្តីពីបច្ចេកវិទ្យា និងអនាគតនៃការងារក្នុងតំបន់អាស៊ាន ដោយ Cisco ដែលជាក្រុមហ៊ុនទំនាក់ទំនងឌីជីថលដែលមានមូលដ្ឋាននៅសហរដ្ឋអាមេរិក ប្រទេសដែលមានសេដ្ឋកិច្ចរីកចម្រើនខ្លាំងជាងគេទាំងប្រាំមួយនៅតំបន់អាស៊ាន ដូចជាប្រទេសហ្វីលីពីន ឥណ្ឌូនេស៊ី ម៉ាឡេស៊ី សិង្ហបុរី ថៃ និងវៀតណាម នឹងត្រូវប្រឈមនឹងការបាត់បង់ការងារប្រមាណ ៦.៦ លានកន្លែងនៅឆ្នាំ ២០២៨ ។ ហើយ ៤១% នៃនិយោជិត(ភាគីអ្នកបម្រើការ)ក្នុងប្រទេសខាងលើខ្វះជំនាញសំខាន់ៗ ដែលទីផ្សារការងារនឹងត្រូវទាមទារនាពេលអនាគត ហើយក្នុងចំណោមតម្រូវការទាំងនោះក៏មានជំនាញឌីជីថលផងដែរ ។ ដូច្នេះដើម្បីធានាថាជំនាញរបស់និយោជិតឆ្លើយតបនឹងតម្រូវការការងារ ពួកគេត្រូវរៀន ឬពង្រឹងជំនាញបន្ថែមទៀត។
នៅទូទាំងតំបន់អាស៊ាន តម្រូវការនៃការរៀនជំនាញថ្មីៗ និងការពង្រឹងជំនាញ ដូចដែលបានលើកឡើង ទាមទារឱ្យមានសកម្មភាព និងការចូលរួមពីសំណាក់រដ្ឋាភិបាល ក៏ដូចជាវិស័យឯកជនផងដែរ។
សម្រាប់និយោជក ការផ្តល់វគ្គបណ្តុះបណ្តាលដើម្បីពង្រឹងសមត្ថភាព និងជំនាញដល់និយោជិត មាន
សក្តានុពលក្នុងការផ្តល់នូវអត្ថប្រយោជន៍ទាក់ទងនឹងការបំពេញការងារប្រកបដោយប្រសិទ្ធភាព និង
ផលិតភាពដល់ក្រុមហ៊ុនរបស់ពួកគេ ។ ស្របពេលដែលមានការជំរុញឲ្យមានការផ្តល់ការបណ្តុះ
បណ្តាល ក៏មានជាកង្វល់មួយថា តើនិយោជិតទាំងនោះ «អាចបណ្តុះបណ្តាលបាន»ទេ ឬនិយាយឲ្យស្រួលយល់ថាតើពូកគេមានសមត្ថភាពចាប់យកជំនាញថ្មីៗពីការបណ្តុះបណ្តាលបានឬទេ?
តើបុគ្គលិកប្រភេទណាត្រូវបានគេចាត់ទុកថាអាចបណ្តុះបណ្តាលបាន?
លោក Christian Viegelahn សេដ្ឋវិទូការងារនៃអង្គភាពវិភាគសេដ្ឋកិច្ច និងសង្គមប្រចាំតំបន់របស់អង្គការពលកម្មអន្តរជាតិ(ILO) ពន្យល់ពីភាពខុសគ្នារវាង បុគ្គលិកដែលទទួលបានការបណ្តុះបណ្តាល និងបុគ្គលិកដែលអាចបណ្តុះបណ្តាលបានដោយមានប្រសាសន៍ថា៖ លើសពីកង្វល់ដែលថាបុគ្គលិករបស់ពួកគេទទួលបានការបណ្តុះបណ្តាលមិនគ្រប់គ្រាន់ និយោជកមានការព្រួយបារម្ភ ថាក្រុមហ៊ុនពួកគេទទួលបុគ្គលិកដែលអាចបណ្តុះបណ្តាលបាន មានចំនួនមិនគ្រប់គ្រាន់។»
សេដ្ឋវិទូដដែលបន្ថែមថា «អ្វីដែលនិយោជក(ថៅកែ)ស្នើសុំឱ្យប្រព័ន្ធអប់រំសាធារណៈ ឬរដ្ឋាភិបាលផ្តល់ឲ្យខណៈដែលពួកគេ (និយោជក ឬក្រុមហ៊ុន) រីករាយក្នុងការចំណាយនោះគឺការផ្តល់ជំនាញជាក់លាក់ផ្នែកអក្ខរកម្ម (ការចេះអាន និងសរសេរ) និងជំនាញមូលដ្ឋាន (បំណិនជីវិត) ដល់និយោជិត
ដរាបណាពួកគេអាចរៀនសូត្រ និងមានសមត្ថភាពស្រូបយកជំនាញដែល(ក្រុមហ៊ុន)ត្រូវការទាំងនេះ។»
ក្នុងករណីនេះ “ភាពដែលអាចបណ្តុះបណ្តាល” សំដៅលើសមត្ថភាពរបស់និយោជិតក្នុងការរៀន ស្ទាត់ជំនាញ និងអនុវត្តចំណេះជំនាញបែបឌីជីថលថ្មីៗ។
ដោយផ្អែកលើសន្និសីទអាស៊ាន-យូនីសេហ្វ ឆ្នាំ ២០១៨ ស្តីពីជំនាញនៃសតវត្សរ៍ទី ២១ បណ្តាក្រុមហ៊ុនជាច្រើនកំពុងចាប់អារម្មណ៍លើការជួលបុគ្គលិកដែលងាយបង្រៀន និងមានភាពបត់បែនបាន។ ក្នុងសន្និសីទដដែលនេះ លោក Amarit Charoenphan នាយកប្រតិបត្តិនៃ HUBBA និង Techsauce ដែលជា កន្លែងធ្វើការរួមគ្នា(coworking space)ដំបូងគេនៅក្នុងប្រទេសថៃ បានលើកឡើងថា ១.៨ លានការងារនៅតំបន់អាស៊ាននឹងត្រូវបាត់បង់ និងជំនួសមកវិញដោយការងារដែលប្រើប្រាស់ បញ្ញាសិប្បនិម្មិត(Artificial Intelligence) ក្នុងរយៈពេលប៉ុន្មានឆ្នាំខាងមុខ។ ប៉ុន្តែការងារចំនួន ២.៣ លានក៏នឹងត្រូវបានបង្កើតឡើងផងដែរ ដែលការងារទាំងនោះនឹងទាមទារជំនាញបច្ចេកវិទ្យា និងឌីជីថល។ នេះមានន័យថានិយោជិតត្រូវមានជំនាញទាំងពីរដើម្បីទទួលបានការងារ និងធ្វើការប្រកបដោយប្រសិទ្ធភាពជាមួយបញ្ញាសិប្បនិម្មិត ហើយនិយោជិតក៏នឹងត្រូវសម្របខ្លួនទៅនឹងការផ្លាស់ប្តូររបៀបធ្វើការផងដែរ។
ទាក់ទងនឹងកម្លាំងពលកម្ម ប្រទេសហ្វីលីពីនត្រូវបានទទួលស្គាល់ថាមានកម្លាំងពលកម្មដែលងាយបណ្តុះបណ្តាលច្រើនជាងគេ បើធៀបនឹងប្រទេសក្នុងតំបន់មួយចំនួនដូចជា ឥណ្ឌូនេស៊ី ថៃ និងវៀតណាម។ ប្រធានាធិបតីហ្វីលីពីន លោក Bongbong Marcos បាននិយាយថា “ក្រៅពីមានភាពវ័យក្មេង កម្លាំងពលកម្មមកពីហ្វីលីពីនមានសមត្ថភាពខ្ពស់ ទាំងលើជំនាញភាសាអង់គ្លេស ទាំងលើជំនាញបច្ចេកវិទ្យា និងមានការបត់បែនសម្របខ្លួនតាមវប្បធម៌ផ្សេងៗបានល្អ”។
យោងតាមការស្រាវជ្រាវរបស់ស្ថាប័ន HKTDC ដែលជាស្ថាប័នព័ត៌មានសេដ្ឋកិច្ច និងពាណិជ្ជកម្មដ៏សំខាន់របស់ហុងកុង ការចូលសិក្សានៅមហាវិទ្យាល័យរបស់កម្លាំងពលកម្មក្នុងប្រទេសហ្វីលីពីនមានកម្រិតខ្ពស់ (២១%) ធៀបនឹងប្រទេសសិង្ហបុរី (១៦%) និងខ្ពស់ជាងប្រទេសអាស៊ានផ្សេងទៀតគួរឱ្យកត់សម្គាល់។ បុគ្គលិកជនជាតិហ្វីលីពីនភាគច្រើនមានសម្ថតភាពប្រើប្រាស់ភាសាអង់គ្លេសស្ទាត់ជំនាញ ដែលធ្វើឱ្យពួកគេមានភាពងាយស្រួលក្នុងការទទួលបានការបណ្តុះបណ្តាលពីនិយោជក។ ក្រៅពីជំនាញភាសាអង់គ្លេស ហ្វីលីពីនក៏មានបុគ្គលិក និងវិស្វករផ្នែកព័ត៌មានវិទ្យា និងអ្នកគ្រប់គ្រងដែលមានសមត្ថភាពខ្ពស់ផងដែរ។ នៅប្រទេសហ្វីលីពីន ជំនាញរដ្ឋបាលធុរកិច្ច ការអប់រំ និងបណ្តុះបណ្តាលគ្រូ បច្ចេកវិទ្យាព័ត៌មាន វិស្វកម្ម និងបច្ចេកវិទ្យា និងវេជ្ជសាស្ត្រ គឺជាមុខវិជ្ជាកំពូលទាំងប្រាំដែលបានស្រូបយកចំនួននិស្សិតច្រើនជាងគេ ពោលគឺហ្វីលីពីន ដែឡបានចូលរៀនមុខវិជ្ជាទាំងនេះមានចំនួនប្រមាណជា ៧៧% នៃនិស្សិតចូលឧត្តមសិក្សាទាំងអស់។
នៅក្នុងប្រទេសកម្ពុជា ដោយសារបញ្ហាកង្វះជំនាញ ក្រុមហ៊ុន ឬនិយោជកអាចជួលបុគ្គលិកដែលមានជំនាញមិនគ្រប់គ្រាន់ ដោយគិតថានឹងផ្តល់ការបណ្តុះបណ្តាលបន្ថែមដល់បុគ្គលិកទាំងនោះ។ ទោះជាយ៉ាងណា មិនមែនសុទ្ធតែបុគ្គលិកទាំងអស់មានសមត្ថភាពក្នុងការស្រូបយកជំនាញថ្មីៗដែលនិយោជកផ្តល់ឲ្យនោះទេ។ បុគ្គលិកខ្លះអាចគ្មានសមត្ថភាពចាប់យកជំនាញទាំងនោះ។ ដោយសារបញ្ហានេះ បុគ្គលិកខ្លះអាចសម្រេចចិត្តឈប់ ឬប្តូរការងារ។ ប្រសិនបើបញ្ហានេះនៅតែបន្តដោយពុំមានដំណោះស្រាយ បុគ្គលិកទាំងនោះនៅតែបន្តភាពខ្វះជំនាញ និងបទពិសោធន៍ដែលត្រូវការសម្រាប់ការអភិវឌ្ឍន៍អាជីពរបស់ពួកគេ ជាហេតុធ្វើឲ្យពួកគេប្រឈមនឹងភាពអត់ការងារធ្វើនៅពេលអនាគត។
ការគាំទ្ររបស់រដ្ឋាភិបាលក្នុងការបង្កើនសមត្ថភាពកម្លាំងពលកម្មនៅក្នុងប្រទេសមួយចំនួននៅតំបន់អាស៊ាននៅមិនទាន់គ្រប់គ្រាន់នៅឡើយ។ រដ្ឋាភិបាលក្នុងតំបន់ត្រូវដោះស្រាយបញ្ហានេះ ដើម្បីប្រាកដថាកម្លាំងពលកម្មក្នុងប្រទេសខ្លូនមានចំណេះថ្មីៗ ហើយអាចសម្របខ្លួនទៅនឹងការផ្លាស់ប្តូរនៃបរិបទការងារ និងមានសមត្ថភាពទទួលការបណ្តុះបណ្តាលជំនាញនាពេលខាងមុខ។ .
កម្មវិធីឥតគិតថ្លៃ/ឧបត្ថម្ភធនរបស់រដ្ឋាភិបាល ក្នុងការរៀន ឬពង្រឹងជំនាញឌីជីថល
កម្មវិធីឧបត្ថម្ភធនលើជំនាញដោយរដ្ឋាភិបាល អាចធ្វើឡើងដោយរដ្ឋផ្តល់មូលនិធិមួយផ្នែកដល់បុគ្គលដែលមានលក្ខណៈសម្បត្តិគ្រប់គ្រាន់ក្នុងការចុះឈ្មោះទទួលយកការបណ្តុះបណ្តាលជំនាញឌីជីថល ហើយថ្លៃសិក្សាមួយផ្នែកទៀតអាចចេញដោយបុគ្គលផ្ទាល់ដោយក្រុមហ៊ុន ឬភាគីទីបីណាមួយ។
មូលនិធិឧបត្ថម្ភធនរបស់រដ្ឋាភិបាលអាចជួយដោះស្រាយបញ្ហាកង្វះសមត្ថភាពហិរញ្ញវត្ថុក្នុងការចូលរួមនិងបង់ថ្លៃវគ្គបណ្តុះបណ្តាល ដែលនេះជាបញ្ហាប្រឈមមួយក្នុងចំណោមបញ្ហាប្រឈមទាំងបីដែលលើកឡើងដោយបុគ្គលិក។ នេះមានន័យថា មូលនិធិឧបត្ថម្ភធនរបស់រដ្ឋាភិបាលនេះអាចធ្វើឲ្យការបង់ថ្លៃរៀនជំនាញ ឬពង្រឹងជំនាញមានតម្លៃសមរម្យ ដែលជាកត្តាទាក់ទាញបុគ្គលិកឲ្យចង់រៀន និងបង្កើនសមត្ថភាពពួកគេបន្ថែមទៀត។
រដ្ឋាភិបាលទូទាំងអាស៊ានកំពុងមានគំនិតផ្តួចផ្តើមជាច្រើនដើម្បី ធ្វើឱ្យកម្លាំងពលកម្មរបស់ពួកគេកាន់តែមានភាពប្រកួតប្រជែងនៅក្នុងសេដ្ឋកិច្ចឌីជីថល។ រដ្ឋាភិបាលនៃប្រទេសមួយចំនួនដូចជាសិង្ហបុរី និងម៉ាឡេស៊ីកំពុងធ្វើបានយ៉ាងល្អ ដោយមានគំនិតផ្តួចផ្តើមដែលបានចេញជារូបរាងរួចទៅហើយ។
នៅប្រទេសម៉ាឡេស៊ី រដ្ឋាភិបាលបាននិងកំពុងអនុវត្តកម្មវិធីមួយចំនួន ដើម្បីជួយបង្កើនសមត្ថភាព ប្រជាជនរបស់ខ្លួន បន្ទាប់ពីជំងឺរាតត្បាត Covid-19។ គំនិតផ្តួចផ្តើមមួយក្នុងចំណោមគំនិតផ្តួចផ្តើមទាំងនោះ ហៅថា MyDigitalWorkforce Work in Tech (MYWiT) គឺជាកម្មវិធីផ្តល់ការបណ្តុះបណ្តាលជំនាញឌីជីថលដល់បុគ្គលិក ដោយមានការបង្រៀនដល់ផ្ទះ។ លើសពីការផ្តល់ជូនការបណ្តុះបណ្តាលដល់បុគ្គលិក គំនិតផ្តួចផ្តើមនេះក៏ផ្តល់ជារង្វាន់លើកទឹកចិត្តដល់ក្រុមហ៊ុននិយោជកឲ្យជួលបុគ្គលិកដែលមានទេពកោសល្យ និងសមត្ថភាពលើជំនាញឌីជថលផងដែរ។ គំនិតផ្តួចផ្តើម MyWiT មានគោលបំណងជួយជនជាតិម៉ាឡេស៊ីចំនួន ៦,០០០ នាក់ឲ្យទទួលបានការងារធ្វើក្នុងត្រីមាសទីបីនៃឆ្នាំ ២០២២ ។
ឧទាហរណ៍ដ៏គួរឱ្យចាប់អារម្មណ៍មួយទៀតនៅប្រទេសសិង្ហបុរី ដែលក្នុងឆ្នាំ ២០១៥ រដ្ឋាភិបាលបានបង្កើតកម្មវិធី SkillsFuture Initiatives ដែលជាសិក្ខាសាលាដោយឥតគិតថ្លៃ មានបំណងបន្ថែម និងពង្រឹងសមត្ថភាពការងាររបស់ប្រជាជនក្នុងប្រទេស ។ កម្មវិធីនេះផ្តល់ជូនអ្នកចូលរួមនូវវគ្គសិក្សាជាង ៤០០វគ្គ ជាមួយនឹងកម្មវិធីចំនួន ១០ សម្រាប់ទាំងនិយោជិត និងសហគ្រាស។ វគ្គសិក្សាខ្លះមាន អ្នកចុះឈ្មោះចូលរៀនច្រើន ដែលវគ្គទាំងនោះរួមមាន ការវិភាគទិន្នន័យ ពាណិជ្ជកម្មឌីជីថល បច្ចេកវិទ្យាទំនាក់ទំនង និងផ្នែកសេវាកម្មអតិថិជន។ យោងតាមរបាយការណ៏នៅឆ្នាំ ២០២១ និយោជិតក្នុងប្រទេសសិង្ហបុរីប្រហែល ៦៦០,០០០ នាក់ និងសហគ្រាសចំនួន ២៤,០០០ បានទទួលអត្ថប្រយោជន៍ពីកម្មវិធី SkillsFuture Initiatives នេះ។
ដោយរៀនសូត្រពីប្រទេសសិង្ហបុរី កម្មវិធីបណ្ដុះបណ្តាលឥតគិតថ្លៃរបស់រដ្ឋាភិបាល គឺជាគំនិតផ្តួចផ្តើមដ៏ល្អ ប៉ុន្តែមិនមែនរដ្ឋាភិបាលនៃប្រទេសសមាជិកអាស៊ានទាំងអស់មានថវិកាសម្រាប់ដំណើរការកម្មវិធីឥតគិតថ្លៃប្រកបដោយនិរន្តរភាពនោះទេ។ ដូច្នេះ រដ្ឋាភិបាលនៃរដ្ឋជាសមាជិកអាស៊ាន ជាពិសេសប្រទេសដែលនៅមានសមត្ថភាពបច្ចេកវិទ្យា និងឌីជីថលនៅមានកំរិត គួរតែពិចារណាលើការផ្តួចផ្តើមកម្មវិធីឧបត្ថម្ភធនលើជំនាញឌីជីថលដល់កម្លាំងពលកម្មក្នុងប្រទេស។
ករណីប្រទេសកម្ពុជា គំនិតផ្តួចផ្តើមនៃកម្មវិធីឧបត្ថម្ភធនរបស់រដ្ឋាភិបាលនឹងសមស្រប ហើយដើរទទឹមគ្នានឹងការបង្កើត មជ្ឈមណ្ឌលផលិតឌីជីថល កម្ពុជា-ជប៉ុន(CJDM) ដែលមានគោលបំណងអភិវឌ្ឍន៍ធនធានមនុស្សនៅកម្ពុជាក្នុងវិស័យ បច្ចេកវិទ្យា និងឌីជីថល ដើម្បីបំពេញតម្រូវការកម្លាំងពលកម្មនាពេលអនាគត ដោយផ្តល់នូវដំណោះស្រាយជាការបណ្តុះបណ្តាលវិជ្ជាជីវៈដែលមានគុណភាពខ្ពស់សម្រាប់ឧស្សាហកម្ម ៤.០ ។
លោក ម៉ី កល្យាណ សាកលវិទ្យាធិការនៃសាកលវិទ្យាល័យភូមិន្ទភ្នំពេញ មានប្រសាសន៍ថា “មជ្ឈមណ្ឌលនេះនឹងបម្រើដល់ការអប់រំប្រជាជនរបស់យើងអំពីឧស្សាហកម្ម ៤.០។ ទន្ទឹមនឹងនេះ នៅក្នុងប្រទេសថៃ ដើម្បីជួយប្រជាជនឱ្យទទួលបានការងារកាន់តែប្រសើរ និងស្វែងយល់បន្ថែមអំពីបច្ចេកវិទ្យាថ្មីៗ ក្រុមប្រឹក្សាឌីជីថលនៃប្រទេសថៃបានផ្តួចផ្តើមរៀបចំវគ្គសិក្សាអំពីការការពារទិន្នន័យផ្ទាល់ខ្លួន ដែលវគ្គនេះអាចសិក្សាតាមអនឡាញ។ វគ្គសិក្សាតាមអ៊ិនធឺណែតអាចជាវិធីចំណាយដ៏មានប្រសិទ្ធិភាពក្នុងការរៀន ដែលទាំងរដ្ឋាភិបាល និងបុគ្គលផ្ទាល់ពុំចាំបាច់ចំណាយធនធានច្រើនពេក។ ជាងនេះទៅទៀត វគ្គសិក្សាតាមអ៊ីនធឺណិតគឺជាវិធីសាស្រ្តបណ្តុះបណ្តាលដែលប្រើប្រាស់ពេលវេលាតិច ហើយអាចដោះស្រាយបញ្ហាប្រឈមមួយទៀត គឺការខ្វះខាតពេលវេលា ដែលបានលើកឡើងដោយបុគ្គលិកភាគច្រើន។
ការងារនាពេលអនាគត និងគំនិតផ្តួចផ្តើមជាច្រើនទៀតនឹងត្រូវការធនធានមនុស្សដែលមានចំណេះដឹងផ្នែកបច្ចេកវិទ្យា និងឌីជីថលបន្ថែមទៀត។ ដូច្នេះ រដ្ឋជាសមាជិកអាស៊ានគួរយកចិត្តទុកដាក់ និង
ផ្តល់អាទិភាពដល់ការវិនិយោគក្នុងវិស័យនេះ។ ដើម្បីរក្សាភាពប្រកួតប្រជែងរបស់អាស៊ាននាពេលបច្ចុប្បន្ន និងទៅពេលអនាគត រដ្ឋជាសមាជិកត្រូវតែធានាថាពួកគេកំពុងផលិតកម្លាំងពលកម្មដែលមិនត្រឹមតែទទួលបានការបណ្តុះបណ្តាលប៉ុណ្ណោះទេ ប៉ុន្តែថែមទាំងអាចទទួលយការបណ្តុះបណ្តាលថ្មីៗបន្ថែមទៀតផងដែរ៕
ហេង ម៉ូលីកា អ្នកស្រាវជ្រាវនៃអង្គការវេទិកាអនាគត | ខ្លឹមសារអត្ថបទរក្សាសិទ្ធិដោយអង្គការវេទិកាអនាគត