ជម្លោះព្រំដែនរវាងចិន និងឥណ្ឌា នៅតែមិនទាន់ភាពល្អប្រសើរនៅឡើយ ដោយកម្លាំងយោធាប្រទេសទាំងពីរបន្តប្រឈមមុខដាក់គ្នា។ កន្លងមក យោធាប្រទេសជិតខាងទាំងពីរ បានជួបគ្នាជាច្រើនលើក ដើម្បីបន្ធូរបន្ថយស្ថានការណ៍ ក្រោយពីមានការប៉ះទង្គិចគ្នា។ 

 

«តាមគំនិតរបស់ខ្ញុំ  ស្ថានភាពព្រំដែន នៅតែមានភាពផុយស្រួយ ដោយសារតែកន្លែងមួយចំនួន ដែលយើងបានពង្រាយយោធា គឺមានចម្ងាយជិតគ្នា ដែលអាចបង្កឱ្យមានគ្រោះថ្នាក់»។ លោក S Jaishankar រដ្ឋមន្រ្តីការបរទេសឥណ្ឌា បានបញ្ជាក់បែបនេះ នៅវេទិកា India Today ក្នុងថ្ងៃទី១៨ ខែមីនា។ 

 

ប្រមុខការទូតឥណ្ឌារូបនេះ បានបន្ថែមផងដែរថា​ ប្រទេសទាំងពីរ មិនអាចបំពានសន្តិភាព និងភាពស្ងៀមស្ងាត់បានទេ ហើយភាគីចិន មិនអាចបំពានកិច្ចព្រមព្រៀង និងចង់ឱ្យទំនាក់ទំនងប្រទេសទាំងពីរវិលទៅរកភាពធម្មតាដូចមុនឆ្នាំ២០២០បានឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

ទំនាក់ទំនងឥណ្ឌា-ចិន មានភាពល្អក់កករខ្លាំង ក្រោយយោធាទាំងពីរ បានបះទង្គិចគ្នានៅក្នុងឆ្នាំនោះ ដែលបង្កើតឱ្យទាហានឥណ្ឌាស្លាប់យ៉ាងហោចណាស់ ២៤នាក់។ ចំណែកចិន បានអះអាងថា យោធាខ្លួនចំនួន ៤នាក់ បានបាត់បង់ជីវិត។ 

 

នៅក្រៅកិច្ចប្រជុំរដ្ឋមន្រ្តីការបរទេសនៃបណ្តាប្រទេសមានសេដ្ឋកិច្ចរីកចម្រើនទាំង២០ (G20) លោក Jaishankar ក៏បានលើកបញ្ហាព្រំដែនជជែកជាមួយសមភាគីចិន លោក ឈីន កាងដែរ៕