ប្រធានាធិបតីចិន ស៊ី ជិនភីង កំពុងធ្វើទស្សនកិច្ចនៅរដ្ឋធានីមូស្គូ ដែលជាទស្សនកិច្ចក្រៅប្រទេសលើកដំបូងក្រោយបន្តកាន់តំណែងនៅអាណត្តិទី៣។ ទៅដល់រុស្ស៊ី លោក ស៊ី ក៏មានជំនួបក្រៅផ្លូវការមួយទល់មួយជាមួយប្រធានាធិបតីរុស្ស៊ី វ៉ា្លឌីមៀ ពូទីន នៅវិមា​នក្រេមឡាំង ហើយលោក ពូទីន ក៏និយាយដល់សំណើ១២ចំណុចរបស់ចិនដើម្បីរកច្រកចេញពីវិបត្តិនៅអ៊ុយក្រែន។

 

​នាជំនួបថ្ងៃទី២០ ខែមីនា លោក ពូទីន និយាយថា រុស្ស៊ីតែងបើកចំហដល់ការចរចា។ ប្រធានាធិបតីរុស្ស៊ីក៏ស្វាគមន៍ជំហររបស់ចិនដែលចង់ដើរតួនាទីប្រកបដោយស្ថាបនាក្នុងការបញ្ចប់ជម្លោះផងដែរ។ ចំណែកលោក ស៊ី វិញ ក៏បញ្ជាក់ពីការចេញចិត្តទំនាក់ទំនងទ្វេភាគីចិន-រុស្ស៊ី។

 

ទស្សនកិច្ចរបស់ប្រធានាធិបតីចិននៅរុស្ស៊ី ត្រូវមើលឃើញថា ជាការអះអាងការគាំទ្ររបស់ចិនចំពោះរុស្ស៊ីដែលឯកោលើឆាកអន្តរជាតិ។ លោក ពូទីន ផ្ទាល់ ក៏ទើបត្រូវតុលាការព្រហ្មទណ្ឌអន្តរជាតិចេញដីកាឱ្យចាប់ខ្លួនផងដែរ។ អាម៉េរិក ដែលចោទចិនថា ប៉ុនប៉ងផ្គត់ផ្គង់អាវុធឱ្យរុស្ស៊ី ក៏នៅតែមិនទុកចិត្តចិនអាចដោះស្រាយបញ្ហានេះបានផែនការ១២ចំណុចរបស់ខ្លួន។

 

ក្នុងសេចក្ដីប្រកាសថ្ងៃទី២០ ខែមីនា ប្រមុខការទូតអាម៉េរិក អាន់តូនី ប្លីងខិន បញ្ជាក់ថា រុស្ស៊ីតែឯងប៉ុណ្ណោះអាចបញ្ចប់សង្រ្គាមនៅថ្ងៃនេះ។ លោក ប្លីងខិន បន្តទៀតថា លុះត្រាតែរុស្ស៊ីបញ្ចប់ អាម៉េរិកនៅតែបន្តគាំទ្រអ៊ុយក្រែន។

 

ចំណែកអ៊ុយក្រែនវិញ ក៏ទទូចជាថ្មីឱ្យទីក្រុងប៉េកាំងប្រើប្រាស់ឥទ្ធិពលរបស់ខ្លួនឱ្យរុស្ស៊ីដកទ័ព៕