រុស្ស៊ី ជាដៃគូនាំចេញអាវុធដ៏សំខាន់មួយទៅអាហ្រ្វិក។ ខណៈរងទណ្ឌកម្មជាច្រើនពីសំណាក់លោកខាងលិច រុស្ស៊ី កំពុងស្វះស្វែងរកដៃគូនៅតំបន់ផ្សេង ជាពិសេសអាស៊ី និងអាហ្រ្វិក។ ក្នុងសន្និសីទមួយលើទំនាក់ទំនងរុស្ស៊ី-អាហ្វ្រិកនៅថ្ងៃទី២០ ខែមីនា លោក វ្ល៉ាឌីមៀ ពូទីន ប្រធានាធិបតីរុស្ស៊ី បានបញ្ជាក់ពីការពង្រឹងទំនាក់ទំនងជាមួយអាហ្វ្រិក។ 

 

«អនុញ្ញាតឱ្យខ្ញុំបញ្ជាក់ថា ប្រទេសរបស់យើងតែងតែផ្តល់ និងបន្តផ្តល់អាទិភាពលើកិច្ចសហប្រតិបត្តិការជាមួយរដ្ឋអាហ្រ្វិក»។ លោក ពូទីន បានសង្កត់ធ្ងន់បែបនេះ នៅថ្ងៃទី២០ ខែមីនា ដោយបន្តថា រុស្ស៊ី នឹងបន្តផ្គត់ផ្គង់គ្រាប់ធញ្ញជាតិជាមួយអាហ្រ្វិក បើទោះខ្លួនដើរចេញពីកិច្ចព្រមព្រៀងនាំចេញគ្រាប់ធញ្ញជាតិជាមួយអ៊ុយក្រែនក៏ដោយ។ 

 

កន្លងមក រុស្ស៊ី បានយល់ព្រមបន្តរយៈពេលកិច្ចព្រមព្រៀងនាំចេញគ្រាប់ធញ្ញជាតិជាមួយអ៊ុយក្រែន ត្រឹមរយៈពេល ៦០ថ្ងៃប៉ុណ្ណោះ។ 

 

ទន្ទឹមនេះ មេដឹកនាំរុស្ស៊ី បានអះអាងថា ក្រុងមូស្គូ បានលុបចោលបំណុលសម្រាប់អាហ្រ្វិកច្រើនជាង២០ពាន់លានដុល្លារ ខណៈទំហំពាណិជ្ជកម្មរវាងភាគីទាំងពីរ បន្តកើនឡើងជារៀងរាល់ឆ្នាំ។ បើតាមលោកពូទីន ទំហំពាណិជ្ជកម្មរវាងរុស្ស៊ី និងអាហ្វ្រិកបានកើនជិតដល់ ១៨ពាន់លានដុល្លារ នៅក្នុងឆ្នាំ២០២២។ នេះបើតាមការចុះផ្សាយរបស់ទីភ្នាក់ងារព័ត៌មាន Anadolu។ 

 

ក្នុងវេទិកាដដែលនោះ មេដឹកនាំរុស្ស៊ី បានបន្ថែមថា រដ្ឋអាហ្រ្វិក កាន់តែមានទម្ងន់ធ្ងន់ឡើងនៅក្នុងកិច្ចការអន្តរជាតិ។ ត្រង់ចំណុចនេះ លោកពូទីន បានយល់ថា អាហ្រ្វិកនឹងក្លាយជាមេដឹកនាំមួយរូបនៅក្នុងសណ្តាប់ធ្នាប់ពិភពលោកពហុភាគីនិយមថ្មី៕