ថៃ នៅថ្ងៃទី២០ ខែមីនា បានរំលាយសភាចោលដើម្បីរៀបចំការបោះឆ្នោត។ មួយថ្ងៃក្រោយការរំលាយនេះ គណៈកម្មការរៀបចំការបោះឆ្នោត បានប្រកាសពីថ្ងៃត្រូវរៀបចំការបោះឆ្នោត។ ការប្រកាសពីថ្ងៃបោះឆ្នោតនេះ នឹងត្រូវចេញផ្សាយនៅលើរាជកិច្ចឆាប់ៗ។

 

តាមការប្រកាសរបស់ ប្រធានគណៈកម្មការរៀបចំការបោះឆ្នោត លោក Ittiporn Boonpracong នៅថ្ងៃទី២១​ ខែមីនា ថៃ នឹងរៀបចំការបោះឆ្នោតរដ្ឋសភានៅថ្ងៃទី១៤ ខែឧសភាខាងមុខ។ តាមច្បាប់ស្តីពីការបោះឆ្នោត គណៈកម្មការរៀបចំការបោះឆ្នោត តម្រូវឱ្យប្រកាសពីថ្ងៃបោះឆ្នោតក្នុងរយៈពេល ៥ថ្ងៃក្រោយសភាត្រូវបានរំលាយ។ 

 

ទន្ទឹមនេះ គណៈកម្មការរៀបចំការបោះឆ្នោត ក៏ត្រូវប្រកាសពីថ្ងៃចាប់ផ្តើមទទួលពាក្យចុះឈ្មោះ ក្នុងរយៈពេល ៥ថ្ងៃក្រោយសភារំលាយផង។ 

 

តាមការបញ្ជាក់របស់នាយករដ្ឋមន្រ្តីថៃ លោកប្រាយុទ្ធ ចន្ទអូចា រដ្ឋាភិបាលក្នុងពេលបច្ចុប្បន្ន ត្រូវប្តូរទៅជារដ្ឋាភិបាលបណ្តោះអាសន្ន ដោយអំណាចមួយចំនួន ត្រូវបានរឹតត្បិត។ ជុំវិញបញ្ហានេះ គណៈកម្មការៀបចំការបោះឆ្នោតថៃ (EC) ត្រូវដាក់ចេញបទបញ្ញត្តិហាមឃាត់សមាជិកគណៈរដ្ឋមន្រ្តីបណ្តោះអាសន្នពីការប្រើប្រាស់ធនធានរបស់រដ្ឋ ឬបុគ្គលិករបស់ក្រសួង ដើម្បីផលប្រយោជន៍ផ្ទាល់ខ្លួន។

 

កន្លងមក រដ្ឋាភិបាលបណ្តោះអាសន្នថៃ បានអនុម័តកញ្ចប់ថវិកាទំហំប្រមាណ ១៧៣លានដុល្លារ សម្រាប់រៀបចំការបោះឆ្នោតរដ្ឋសភាខាងមុខ៕