ក្រុមប្រទេសអ្នកមានទាំង៧ (G7) មិនមានការបាក់បែកឡើយ ក្នុងការគាំទ្រអ៊ុយក្រែនទប់នឹងការឈ្លានពានរបស់រុស្ស៊ី។ នាយករដ្ឋមន្រ្តីជប៉ុន លោក គីស៊ីដា ហ្វូមីអូ បានប្រាប់ លោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែនបែបនេះ នៅថ្ងៃទី២១ ខែមីនា។ មេដឹកនាំជប៉ុន ក៏បានសន្យាផ្តល់ជំនួយទំហំ៤៧០លានដុល្លារក្នុងវិស័យថាមពល ទៅអ៊ុយក្រែន និង៣០លានដុល្លារ ជាជំនួយមិនមែនអាវុធ។
នាយករដ្ឋមន្រ្តីជប៉ុន លោក គីស៊ីដា ហ្វូមីអូ នៅថ្ងៃទី២១ ខែមីនា បានធ្វើដំណើរទស្សនកិច្ចនៅអ៊ុយក្រែនដោយមិនប្រកាសជាមុន ក្រោយពេលបំពេញទស្សនកិច្ចនៅឥណ្ឌា។ ដំណើរទស្សនកិច្ចនេះ ធ្វើឡើងស្របពេលប្រធានាធិបតីចិន លោក ស៊ី ជិនភីង កំពុងបំពេញទស្សនកិច្ចនៅរុស្ស៊ីដែរ។
ក្នុងដំណើរទស្សនកិច្ចនោះ លោក គីស៊ីដា បានថ្កោលទោសការឈ្លានពានរបស់រុស្ស៊ីលើអ៊ុយក្រែន រួមទាំងបដិសេធការប៉ុនប៉ងផ្លាស់ប្តូរស្ថានភាពបច្ចុប្បន្នដោយកម្លាំងយោធា ហើយថែមទាំងសន្យាគាំទ្រសណ្តាប់ធ្នាប់អន្តរជាតិ ដោយផ្អែកលើច្បាប់អន្តរជាតិថែមទៀត។
ក្នុងនាមជាមេដឹកនាំក្រុមប្រទេសអ្នកមានទាំង៧ចុងក្រោយ ដែលបំពេញទស្សនកិច្ចនៅអ៊ុយក្រែន ប្រមុខរដ្ឋាភិបាលជប៉ុន បានថ្លែងប្រាប់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ថា ក្រុមប្រទេសអ្នកមានទាំង៧ មិនមានភាពបាក់បែកឡើយ ក្នុងការគាំទ្រក្រុងកៀវទប់នឹងការឈ្លានពានរបស់ក្រុងមូស្គូ។
បើតាមប្រមុខរដ្ឋាភិបាលជប៉ុន ជំនួបជាមួយប្រធានាធិបតីអ៊ុយក្រែន បានផ្តល់ឱកាស ដើម្បីបញ្ជាក់ពីតម្លៃរបស់ក្រុមប្រទេស G7។ នៅក្នុងឆ្នាំ២០២៣នេះ ជប៉ុន ធ្វើជាប្រធានផ្លាស់វេននៃកិច្ចប្រជុំក្រុមប្រទេសអ្នកមានទាំង៧។
ជាការឆ្លើយតប លោក ហ្សេលេនស្គី នៅក្នុងសន្និសីទសារព័ត៌មានក្រោយជំនួបទ្វេភាគី បានហៅលោកគីស៊ីដា ជាមេដឹកនាំការពារសណ្តាប់ធ្នាប់អន្តរជាតិ រួមទាំងអរគុណភាពជាមេដឹកនាំរបស់ជប៉ុនផង។ នេះបើតាមការចុះផ្សាយរបស់សារព័ត៌មាន Nikkei Asia។
ស្របគ្នានេះ មេដឹកនាំជប៉ុន ក៏បានសន្យាផ្តល់ជំនួយក្នុងវិស័យថាមពលទៅអ៊ុយក្រែនក្នុងទំហំ៤៧០លានដុល្លារ និងផ្តល់ជំនួយមិនមែនអាវុធ៣០លានដុល្លារ តាមរយៈអង្គការណាតូទៅអ៊ុយក្រែន។ ទន្ទឹមនេះ ប្រទេសទាំងពីរ ក៏បានឯកភាពដំឡើងទំនាក់ទំនងទៅជាភាពជាដៃគូសកលពិសេសផង។
«ជប៉ុននឹងបន្តផ្តល់ជំនួយទៅអ៊ុយក្រែនជាមួយលទ្ធភាពដ៏ខ្លាំងបំផុត រហូតទទួលបានសន្តិភាព»។ លោក គីស៊ីដា បានសង្កត់ធ្ងន់បែបនេះ។
មុនជួបជាមួយមេដឹកនាំអ៊ុយក្រែន នាយករដ្ឋមន្រ្តីជប៉ុន បានធ្វើទស្សនកិច្ចនៅក្រុង Bucha ដែលប្រជាជនស៊ីវិលជាច្រើនរូបត្រូវបានសម្លាប់ក្នុងពេលរុស្ស៊ីចូលឈ្លានពាន។ ក្នុងដំណើរទស្សនកិច្ចនៅក្រុងនោះ លោក គីស៊ីដា បានអះអាងថា ពិភពលោកមានការភ្ញាក់ផ្អើលយ៉ាងខ្លាំងដែលបានឃើញប្រជាជនស៊ីវិលជាច្រើន ត្រូវបានសម្លាប់នៅមួយឆ្នាំមុន៕